兩個婚禮。五段關係
上星期六到今個星期四，參加了兩個婚禮，兩個婚禮當中我都有幸可以現埸拍攝花絮，實要多謝兩位朋友的包容及信任。因為大家畢竟很久很久沒見，而我知道他們結婚的時候，也突兀地要求給我拍攝，他們都欣然地答應了我，我實在要再一次衷心地多謝你們！亦在這裡再一次送上我誠心的祝福，現今的世界變幻無常，可以覓到最愛殊不輕易，希望你們都可以白頭到老，永結同心！！
兩個婚禮
本以為這個婚禮再也見不到任何熟悉面孔之際，更離奇的事情就發生了......伴娘的男朋友算是不可多得了，來觀禮之餘也幫忙照顧一下伴娘，我望著他的面，就覺得很眼熟，於是我忍不住問他：「我係咪應該識你嫁？」
「你識那個應該係我阿哥！我地個樣好似！」伴娘男朋友答道。
「哦~~你阿哥讀st. b嫁嘛？」
「係呀！」
其實，我連佢阿哥叫乜名我都唔知，只不過係當年做prefect既時候，我係負責守佢阿哥個層，認得有個咁既人，而呢個人個樣好似，所以先問。其實我有個習慣，就係將我所認識既人同我新見到既陌生人先做「配對」，到我真係認識左呢個陌生人，先開一個新「file」，記著新既record，一個新認識既人！
我的中學生活，除了中一和預科既時間之外，我係過得好唔開心既，不屑與極度幼稚既同學仔為伍，我行我素，目空一切，令我幾乎半個朋友也沒有！反而畢業多年後，有幾個同學還有聯絡，一年都會聚頭一次吧！
而這個伴娘男朋友因為晚上有另一個喜宴要參加，所以無一齊飲，而我亦無意中聽佢講電話既時候講左一個名出黎，而呢個名反而係我真係識既人，咁我當然唔好意思再查證那個人名吧。
到了晚上的喜宴，我正忙得不可開交之際，我在宴會的門口與我第一份暑期工的老闆和老闆娘相遇了！他們見到我的出現也相當出奇，原來他們是男家家長的朋友，而我是新娘的朋友，這樣也可以相遇，怎能說這不是巧合？這個老闆其實是我女朋友老闆的前度拍擋，是後來自立門戶，自己建立新公司，我女朋友幫我介紹下，做了一個暑假！
那個暑假，在我離職前的幾天，我和這個老闆因為某些言語上的誤會，鬧得很不愉快，之後大家都沒有什麼聯絡，直到年多前再因為女朋友的緣故再見面，還答應了替他做個網頁，但現在我仍未有時間替他做，就這樣一拖就年多了，我也不好意思和他多談，免得大家談多了又尷尬了吧！
更離奇的還有，應該是我的小學同學的不知是甚麼關係的親戚，是我在旅行社第一份工作的同事，那時我是人事部的，他們兩個都是領隊來的。當然，我們那時不熟，而我看見他們在場都忙著與親戚們寒暄，就不好意思上前「相認」了，假若他們不認得我的話，我就很尷尬了，還是若無其事比較穩妥。
我的第一份工作，以第一代副學士畢業生之名出來工作，還記得當時我上司對我說，那時他們只想請個中五畢業的而已，沒想過會請到我！而我也沒想過我會接受那五千多元一個月的薪水，只比OA多一百元，但工作量卻不符比例！每星期工作是五又四份三日，星期六人事部的辦工室內，我是唯一一個收四點鐘的人！！我最記得有一次，人事部的另一個同事，都係高職級過我，我係我個部門係最細那個。佢先過我離開公司，但到我離開了後又轉了一個大圈成了這間公司人事部的經理，對我講左一番話：
「stephen，你睇我，我做唔晒d野，我星期六都要係度ot呀！」大約意思啦，詳細點講就唔太記得嗱~當時我唔記得做緊乜啦，應該係度玩緊，唔係做緊野既！我當時無出聲，我係比佢嚇呆左！我重好記得佢個日ot到未夠四點就走左！大家明白嗎？個實情係佢ot完，我都未放工！！！大家一個部門、一個office，你係度ot緊，我重返緊工嫁！你份糧起碼多過我一倍，工作時間我估我唔少得過佢，只係計每個星期六那多左出黎個兩個鐘，一個月我都已經多左一日啦，工作壓力我都唔係細嫁，我個時試過發夢個時都係返緊工！而且我地公司個陣重有ot claim，我係上述的情況底下咪就係「雙失」囉！我呢件事放左係個心到好耐！最後，我做左年幾就無做，因為辛苦，而且不忿人工低！
五段關係
星期四，這是預科同學結婚，我都有去影婚禮。同學仔比之前開朗了不少，成日笑，唔係單單因為結婚，而係同學仔以前返學做野都係認真的人，出黎做野係改變左個人既性格吧！到晚上去飲，見到幾個舊同學，傾下計食下野，我自己就無飲酒都high high地，無他既，開心丫嘛，我去飲親戚個d，我係無乜感覺既，但朋友個d，就好開心好想去，可能係熟d掛！我唔清楚，只係好「鄧」佢地高興！可能係曾經一齊「出生入死」咁係學校到拼過命，互相鼓勵堅持咁撐到考試最後，又或者朝見口晚見面咁噓寒問暖掛，呢d野，有邊個親戚比到你呀？
今年，聽聞係好年，雙春兼閏月，年紀大過我既結婚，和我同年既結婚，連細過我既都結婚。我呢？我都有諗過既，但都係個句，無錢，所以未係時候！聽我阿媽講，我今年結婚其實都好嫁！不過，佢話如果我今年真係要結婚的話，都會好大獲喎~~我都知，所以我好「小心」！！三月重有一單，年尾已知既就有四單！今年做人情，預左會做到窮！但我仍然好享受，享受別人和我分享他們的喜悅！享受別人和我分享他們的愛！
雖然成輯相未final晒，但我自己好鐘意呢幅相，希望相中人唔好介意我post呢張出黎先啦~~
文章
沒有留言:
發佈留言