2009年12月28日星期一
2009年12月27日星期日
WINNING ELEVEN之強中之手
WINNING ELEVEN之強中之手
大家都可能已經知道我僥倖咁驘在遊戲展中，由GAME STATION舉辦既WINNING ELEVEN球王杯冠軍！
係最後四強，係滿途同女朋友一同到場打氣既情況底下，能夠脫穎而出實在係太好啦。除左個名銜之外，獎品亦都係一個好吸引既原因啦，因為今次冠軍可以得到PS3 120GB一部，而我亦同滿途講左，呢部機有一半既擁有權係佢既！無佢既既慷慨，無可能成就到今日我既冠軍美夢！
講返比賽，我唔知大家對隻GAME有幾多了解，但我即管講下個幾場波既戰況。抽左籤之後，我面對之前取得過兩屆季軍既對手R，而我地用既隊伍係一樣既，都係皇家馬德里！而係五分鐘既四強賽入面，雙方都互有攻守，在下半場，我把握到一個斜直線，由C朗拿度係禁區左輔位射遠柱入網領先。之後對手R積極策動攻勢，而係88分鐘，更出現了一次黃金既扳平機會！對手都係C朗拿度接應高空直線，撕破左我整個後防線，而當佢殺入禁區既時候，我隊既後防艾比奧爾亦不敢從後攔截，只有眼巴巴看著C朗射門，皮球直飛遠柱，可惜直飛出界，勝負亦正式分曉！我亦昂然晉身最終決賽！
另一場四強戰早在我的比賽前已結束，並由使用巴塞羅拿的對手H以十二碼勝出。而在季軍戰，對手R亦順利勝出，奪得季軍！
滿途一直在台下支持，亦不斷向我女朋友分析比賽的形勢，在之前一場四強戰分出勝負之時就對她說，假若我能進入決賽，冠軍就已經是十拿九穩的了！而當我在四強戰中獲勝之後，他更說奪冠也只是時間的問題云云！他對我有如絲大的信心，而且將這個難能可貴既機會拱手相讓，實在讓我不敢掉以輕心／手！
在決賽前夕，女主持發揮無限的爛GAG能力，問了我如果我勝出，可否將獎品PS3送給她，我就推說我要將這個獎品送給女朋友作禮物以求「大腳解圍」！
到了最後的決勝時刻，十分鐘的決賽，誰勝誰負，就要看這十分鐘！對手H在早兩屆曾經進入過最後8強，現在和我一樣也是第一次進入決賽，而我們彼此都嚴陣以待！
上半場開始，我很快便在中場截到了皮球，並迅速策動進攻，並憑藉第一個攻勢於禁區左路，由賓施馬地波射遠柱入網，先下一城，那時只是上半場的兩分多鐘！及後對手H便作出猛烈攻勢，並一時間連續取得多個角球機會，更在不及十分鐘的時候在乘我方於禁區內多番解圍失誤下，混亂中追成一比一平手！但我方亦在不到十五分鐘既時間，藉洛賓於中路突破，來一個「插花」動作，令對手防守球員有所猶疑的時候，把握這個一瞬即逝既機會引球闖入禁區，面對對方門將冷靜射入，替我方再度領前！而台下既氣氛亦因為這個入球變得高漲起來，一來是因為入球梅花間竹刺激非常外，二來是洛賓既技術與冷靜令觀眾實在嘆為觀止所致！之後戰況變得較為膠著，直至三十多分鐘，C朗拿度推入禁區被對方隊長佩奧爾踢跌，而球證毫不猶疑，直指十二碼點，並給予佩奧爾一面黃牌警告。此時，只見皇馬的領隊振臂高呼，而台下的觀眾亦發出「嘩嘩聲」，大家都在等待看好戲的樣子。
十二碼由巴西國腳卡卡主射，見他是充滿信心，起動、擺腳、一蹴而就，同一時間，只見對方門將域陀華廸斯亦飛撲向相同方向！哨子聲響起，只見卡卡以他既招牌兩手同時舉起食指指向天，感謝上帝的慶祝動作，我方領前到比數三比一。在慢鏡頭所見，卡卡踢出了一記近乎完美既十二碼，皮球直飛撲龍門左邊網頂，實非任何門將可以撲救的角度，亦令賽事首次出現兩球的差距！
可是兩球差距既時間維持不了多久，先見巴塞既美斯從右路邊線帶往中路大位施射，只見我方門將卡斯拿斯飛盡撲出。及後對方由亨利接應妙傳入楔，射入成二比三完上半場。
雙方換邊進入下半場，落後巴塞更見主動，奈何受制於皇馬刻意防守，並以賓施馬及C朗拿度於前場反擊居多。而美斯於下半場漸見活躍，多次在右邊邊線發難，對皇馬的後防做成一定威脅，可惜都未能轉化成入球。而戰至七十多分鐘，我方曾出現可以增添記錄的機會，當時賓斯馬在右路傳中，C朗拿度在離門8碼左右無人看管，飛身以側額攻門，但被神勇的域陀華廸斯救出！
另一邊廂，巴塞中場恩尼斯達把握皇馬後防的失誤，在半單刀的情況下射門，惜被卡斯拿斯瓦解。
比賽的最後十分鐘，皇馬眾攻擊球員都盡量控球在腳，把球帶到兩邊希望盡量消耗時間，可是被硬朗的巴塞後防線一一化解。戰至最後一擊，美斯在右邊邊陲策動攻勢，在突破了兩個守將之後以地波傳中，可惜巴塞的一眾攻擊球員未能及時趕到，被皇馬的守衛解圍。完場的哨子聲響起，台下傳來熱烈的歡呼聲，亦見台上的我緊握拳頭，振臂高呼，迎來人生中最重要的一場WINNING勝利！同時亦不失風度地與對手H握手！但見對手H難掩失望之情，而巴塞的部份球員更加泣不成聲，與正在熱烈慶祝的皇馬球員形成強烈的對比！
頒獎台上，殿軍、季軍及亞軍相繼領獎，而當我在靚靚GAME GIRL手中取得PS3之時，真有想喊和高舉這部PS3的衝動！而在接受爛GAG女主持訪問之時，我透露了我今次獲得冠軍全因為運氣和對手承讓之原故，但女主持似有不悅，反問我她有運氣就可以發達了嗎？我立即指出，只要你有運氣，其實也可以發達的，而這個機會每星期還會有兩次添！只見台下工作人員與觀眾都捧腹大笑，可知我這個GAG都不是太爛吧！
回到台下，先與兩位FANS：女友和滿途來個HUG，再看看戰利品，同時多謝滿途的慷慨就義，成全今日在強敵橫伺的四強中亦能獲勝，我就對滿途說既有一半功勞是你的，PS3的一半擁有權同樣也屬於你的！只見滿途哈哈大笑，表示能夠見證傳奇一刻，見證我揚名立萬的一刻已經十分高興，只求他日有機會用作網上對戰，向世界各個強手挑戰就已經如願足已！
我知道在WINNING世界，隱姓埋名的高手多不勝數，要打敗他們或許永遠不可能，但能夠與他們同場較技，也是一種光榮，也是一種榮幸，期望在較量中建立到友誼，建立起信心，尋找到足球遊戲的樂趣就已經是最大的成就了！
2009年12月26日星期六
WINNING ELEVEN之決勝時刻
WINNING ELEVEN之決勝時刻
重有幾個鐘，我就要面對一生人中其中一個重要既場境。係好偶然既機會下，今日入左遊戲展，參加左WINNING比賽。係面對咁多強手底下，比我僥倖咁打敗左兩個對手，並係最後八強既時候對住老對手「滿途」。佢雖然一早聲言無論如何都會讓我進入最後四強，但我地之間既比賽依然激烈！我係一度領先兩球既情況之下，比佢連下兩城，並曾經有黃金機會取勝，但佢都未能把握。到最後階段，在被我圍攻一輪之際，佢竟然在眾目睽睽之下故意將球射入自己龍門內，讓我出線最後四強，原因只是認為我更有機會奪得冠軍！我覺得好有問題，但呢一刻，我就背負住佢對我既期望，我一定要打好明天既兩場比賽，不枉佢既一番苦心！
決勝時刻，終於來臨，可能係我一生之中最重要既兩埸WINNING比賽，背負住眾人既期望！一路以來夢寐以求的機會就在眼前，一路想參加比賽，依家到左決勝負既一刻，最終又會有乜野既結果呢？
請看下集！
WINNING ELEVEN之強中之手！
2009年12月18日星期五
誠徵--兩年內搵廿萬的方法
兩年內要搵廿萬，有無人可以教下我。而我身上只有零蚊和一部IMAC.....有的話請上mokspark.blogspot.com留這寫低方法。寫得好既，有機會獲得莫伯親筆簽名既Flash Magazine第三期一本！！
快D黎發揮你地既創意啦！莫伯等緊大家既答案嫁！
備註：
呢廿萬唔係賺到，而係係第二年既最後個日，要有廿萬現金係手，亦即係純利有廿萬！
你既方法，可以係天馬行空，不過希望係可以實際完成到既！
你既方法，可以係犯法野，但當然最好諗埋如何可以避過法律既制裁啦！
最後更新備註日期：2009年12月18日
如有任何修改，請再到本站查閱。謝謝！！
2009年11月8日星期日
everyone & everyone?
everyone & everyone?
地下鐵內跌蕩醉酒失平衡
坐在馬路角落與她等零晨
床邊滿瀉嘆號句號
殘骸 留低美好
情慾化身
好情人選替身 卻總不會自禁
疑假似真
怕空虛再熱吻
幕後製造美麗來騙身邊情人
墮入了情絲 惡魔的靈魂
床邊滿瀉嘆號句號
殘骸 留低美好
情慾化身
好情人選替身 卻總不會自禁
疑假似真
每天都發生
情史總有因 醉人在極放任
誰能忍這生 早中晚被困？
談情可迫真 也只不過散心
everyone & everyone & everyone & everyone & everyone &
everyone & everyone & everyone & everyone & everyone
Then, can everyone be everyone?
2009年10月31日星期六
衝—給一向沒有衝勁的我
衝—給一向沒有衝勁的我
要做夢 無謂唱足一世未曾動工
再耐用 遲遲未敢出發 抱負成空
如期望被冊封 誰能放鬆 好好捉實那寸衝動
從來烈士進功 全憑大勇 遍歴劫卻編了美夢
台前站十秒鐘 全憑練功 風光怎會剎那啟動
談到宏願 誰怕這世界大紛亂
時間 已經開出不到你挑選
談到宏願 誰怕搏鬥刺痛不斷
時間 已經開出不到你挑選
談到宏願 誰人計較奮戰有多倦
固執 直到一天可炫耀著這辛酸
2009年10月21日星期三
新鮮滾熱辣—IMAC
新鮮滾熱辣—IMAC
大家都知道我部PC打左柴啦，想買mac機嫁啦，無奈地無錢，得個恨字！今晚上apple官方網頁見到好似有新imac出喎，真係齌睇片都引死人啦.......快d比我中六合彩頭獎啦，否則要下世先可以買到嫁啦~~~
2009年10月19日星期一
勝利十一人
勝利十一人—Winning Eleven
勝利十一人，即係絕大部份男仔都會識，或者知道既一隻電視遊戲，內容就係一隻足球遊戲，控制整支球隊進行足球比賽。
遊戲畫面如下：
老實講，我由中六、中七就開始玩呢隻game，我自問都幾勁嫁，無論進攻同防守都有板有眼。我最唔鐘意只係識得利用速度，係兩邊不斷帶住個波走黎走去既人，因為咁樣根本唔似係踢波。呢隻遊戲除左叫做winning eleven，另一個名就係實況足球，你有無見過d足球比賽成場波d人都係帶住個波係邊線附近跑黎跑去嫁？無組織、無技術含量可言，只係鐘意四圍跑既對手，我係好睇唔起嫁！我同我個fd滿途成日都去d電玩展都係玩呢隻game，想同多d唔同既人切蹉比試，見多d，玩多d先會進步。當然我都算輸得少既，記得有一次試過對住一個擺明只係識得利用兩翼不斷跑既人，只係去到game入面既頭30分鐘，已經輸左三球，重要連半場都過唔到添，佢重要有少少黑面對住我添，個時我都有少少比佢嚇一嚇，即刻防鬆左防守，比佢過半場......
我女朋友一向都唔鐘意我打機嫁啦，尤其是見我玩呢隻game就成日話有乜咁刺激，又無爆炸場面，只係係度㩒㩒下，將個波踢黎踢去，無乜技巧可言。每次滿途聽到，佢都會話，其實呢隻game要㩒既制都好多，要做出複雜同細微既動作，其實反應同頭腦都要好好配合，係極短既時間同極少既空間低下，完成某d動作，都可能成為成場波既「關鍵」，而好多想玩得勁，而又勁唔到既人就往往忽略左呢d細微既動作。
話說星期六，約左阿蘇、阿秋、阿ben同滿途去食飯。係尖沙咀做完野，同滿途同我女朋友行去尖沙咀，又走左入adidas睇下有無人玩xbox Winning，而滿途又見到上次同佢打過既南亞裔小朋友喎，咁啱有機會玩，咁當然要會一會佢啦.........而且滿途重輸過比佢添......咁我一定要睇下佢乜野來頭啦。一開波半場未過就遙遙落後左三球啦......竟然........下半場都無乜諗過點踢，但追下一球，追下又一球，竟然比我反勝4比3喎~~我記得我係成個WINNING生涯入面重未試過可以追返三球反勝！！因為我一向都係會領先既一個，而先落後既逆景波我真係好少追得返，今次可以一舉反勝~~~~老實講，幾有成功感嫁，雖然對手唔係真係好強勁，而且下半場小朋友明顯戰意鬆懈得太緊要，所以先比我有機可乘，但對於一個長期都無乜成功感，只係靠係呢個小小既「球場」先可以搵到「真我」既人黎講，呢個又確確實實地係一個好重要既鼓舞。回顧返整個過程，都係不外乎比賽中間既細緻同經驗，只係呢兩樣野，令小朋友輸得好似不明不白，但賽果卻是合情合理。
無論如何，現在的我正正需要的可能就是一個小小的信心和堅持，只要我能堅持，相信機會總會是有的。
2009年10月17日星期六
Mr. 如果我是陳奕迅
Mr. 如果我是陳奕迅
近黎聽下RubberBand，順便又聽下同期既Mr.，發現大家都係各有不同，其中最鐘意呢首歌.........如果我係某某人，如果我可以複製到一個人既成功，係咪一件好事呢？還是成功始終都要有個人風格呢？呢樣野值得大家諗諗佢呀！
自問表現不差過人，浪漫濱繹還會震音
獨站在鎂光下逃離樹蔭，真相是其實我不去面對苦困
白日夢破醒了，滿腔餘音？
我也希望可以成功，是否我不夠努力，還是.......甚麼呢？
2009年9月13日星期日
2009年9月12日星期六
The Bra & I
The Bra & I
無拿拿一開youtube個網頁就見到呢條片，睇完覺得好神奇，有無人知乜野原理呀？知的話請通知我。謝謝！！
另外呢兩個我覺得拍得好好，因為我覺得個感覺好舒服，差d搞到我都想戴埋一份。好鐘意日本拍既廣告，成日都拍得好靚，睇得出係好用心機去製作，所以我去親日本旅行，返到酒店都一定會睇佢地既電視節目，因為個感覺真係好特別，好好睇！！
2009年9月11日星期五
2009年7月12日星期日
變形金剛的那一夜
變形金剛的那一夜
終於！終於！終於都睇左變形金剛，星期五係imax睇左巨幕版！之前同同學仔係九龍城街巿上面個熟食中心食個餐飯都幾好食，有機會一定要再去多次食！
先講返套戲，特技CG既野應該係做得不能再TOP的了。劇本方面，正如很多人所講，係薄弱左少少，而FALLEN被柯柏文兩下就搞定，略嫌兒戲外，都沒有甚麼可以挑剔的了。我想指出一點，好多人話咁大個製作，咁多CG，但個劇本真係麻麻地既說法。呢套戲，開宗名義都係走「官能刺激」的路線，其實只要拍得緊湊，場面夠大、夠精采，劇本稍遜也可以被彌補。要是我想看劇本的話，同期或再等一會也有其他選擇，斷不會需要選變形金剛吧？這算是將戲中的賣點對錯了吧！
沒有人替我拍我穿上變形TEE的模樣，這個不重要。最重要的是我回到家的時候突然停電，一直到第二天的下午五時才恢復電力供應，這個我就很難接受了！我回到家已經凌晨一時半，全屋都斷電了，要摸黑洗澡，還要沒有空調。幸好，當晚的氣溫不太熱，將所有的門窗都打開後，還有陣陣涼風，倒算是幸運！
另外一件事，對我來說，又有另一番意義。在乘的士到IMAX的途上，和戴小姐和余小姐談起些小學的事。原來當年余小姐常常返校後都抄我的功課，因為我的成績都尚可，而且功課定必做齊。還有戴小姐說起有一年因我考的名次比她高，所以整個學期都不理睬我，我問她功課時，不等我問完就答我說她不懂！我還記得當時派成績表時，班主任在全班面前說了一句話：
「大家唔好睇莫振中個樣呆呆鈍鈍咁，只要稍一不慎，就會比佢過左頭！」
我覆述這句話之後，戴小姐便說，班主任的這番話其實是對她說的。說起來也是，因為我記得當時我望向戴小姐的時候，她是「鼓起泡腮」，露出不悅的神息！
不單如此，我還記得有一次，算是我成績上的最大突破，我竟然可以考到第二名，超越了一向實力強横的張小姐。我當時可是興奮了一段不短的日子，亦算是爆出一個很大很大的冷門！(雖然不是第一，而考到第一名的那位同學也算是半冷)還有這個晚上，良久沒有試過打開單位的大門睡晚覺了。對上一次還是在小學時代，還是住在屯門的時候，這突然再次勾起我的回憶，又再想起了些開心的日子！
近一、兩個星期，工作算不上很忙，但就很多事情要跟進，總是覺得自己做得不夠好，樣樣事都好像力不從心，相信不是能力問題，我想是方法找不對吧！但就令我自己感到有所壓力，又再覺得自己一事無成！可幸還有幾個小學同學，令我想起了好些開心的往事，令我想起了我還有優點，不是可有可無的傢伙。我知自己還可以做得更好，但就老是嫌自己進展得慢，做得差，於是就失去了信心，繼而畏首畏尾。
無論如何，缺點和弱點只有靠自己才能克服，既然來到這個地步，就只有咬緊牙關，拼死也要闖過這一關了！我相信大家也會支持我吧！
2009年7月8日星期三
2009年7月7日星期二
環法單車賽開催!!
環法單車賽開催!!
自從三年前開始睇環法單車賽，就愛上左睇呢個比賽，因為成個比賽包括既原素有好多，有團隊戰術，個人毅力、智慧與意志既較技，加上變化莫測既局勢，分分鐘比足球比賽更加精采！
今個七月又再有環法睇，多得有線，亦多得佢地肯請個真真正正既職業車手—何兆麟黎做旁述，用專業既角度去帶領觀眾去欣賞比賽，呢一點實在係不可多得！而且今年既環法非常有睇頭，先係前連續七屆冠軍，Armstrong復出參賽，佢自己就聲稱係返黎享受比賽，咁究竟係龍係蟲呢？真係要睇過先知。當然重有上屆冠軍「沙斯查」，前屆冠軍「干達度」，連續兩屆總亞軍Evans，衝刺王「卡蘭迪殊」，「舒力克」兄弟等等，一眾好手數之不盡，令今屆賽事份外熱鬧！
今屆特色之一是由法國南部的摩納哥為起點，第一站亦係個人計時賽，亦即係各有各踩，以最快速度衝過終點分勝負，之後都係另一d普遍類型既比賽，成班人一齊踩。已經睇左4站，其實環法入面有好多野，尤其是個玩法同一d值得欣賞既地方同原因，想同大家分享多d，今個月有時間，我會詳細同大家講解下！如果追得切，亦會同大家一齊重溫d精采鏡頭/場面。希望大家有興趣既就繼續支持下啦~~
環法official英文網站請按我
2009年7月2日星期四
累人的親切感
累人的親切感
上兩個星期看過了「未來戰士2018」。總的來說，故事內容尚算有劇力，但若是要看耀目的特技效果，我只會說，還是留給「變形金剛」去演繹吧！
想看的第一個原因是因為蝙蝠俠「基斯頓．比爾」，從他的「美式殺人狂」開始欣賞他，到新版首兩輯蝙蝠俠，他的演技都非常吸引。另一個原因就是盛傳將會接基斯頓棒，成為新蝙蝠俠的「森．禾霍頓」，究竟有甚麼能耐可以挑戰「前蝙蝠俠」？當然還有因為長期看有線電影台，時常斬件式地反覆重看未來戰士3的結果。既已知道首兩集的發展，再從第三集了解到主角「約翰．康納」如何敵不過命運的安排，成為救世者，因此繼而追看第四集的劇情發展吧。
第四集看過了，與阿蘇討論過，發現反駁位很多，拍得最出色的除了首幾場戲外，對其他場面的印象大多不太深刻，反而覺得一如以往，雖然主角仍然是康納，但主線永遠是圍繞著機械人，而今集的主角便是馬格斯。馬格斯的角式衝突做得簡單，只是輕輕帶過，沒有很大的矛盾位，故事就如解謎一樣，令他最終發現自己機械人的身份及箇中的來龍去脈。
看完了以後，再結合我近來一位友人的不愉快經歷，令我想起了些事情，想在這裡分享一下。其實不單是這一輯，連帶上兩輯也有所關連。
如果大家有觀賞過第三集，「阿諾」的角式是被派往保護康納，要他覺醒他仍然是救世者的現實，並在途中透露出康納將會死的原因。他對「阿諾」這個形號的機械人太有好感，或者所謂的親切感，這是因為他在第二集時被這外形的機械人所救，並且成為朋友，再於第三集被同一款的機械人所救，而對同款機械人沒有介心，因此在未來在豪無防備之下被這款機械人滲入而近距離殺害！
到了第四集，康納整個過程都因為這個「親切感」而身陷險境！首先，他因為馬格斯深信自己是人類的眼神而表示可以幫他滲入機械城，並拯救自己的生父卡里斯，但他萬萬也想不到，馬格斯只是天網的一只魚餌，來個請君入甕計劃。其次，在機械城內，面對「阿諾」外形的機械人便完全陷入猶豫狀態，根本不像一個身經百戰、久經沙場的戰士，這一切都因為那累人的親切感！還有只要聽到卡里斯的聲音便又再掉入陷阱的那一幕，康納明明知道卡里斯早就逃脫了，而遠在十幾年前就已經領教過同一招數的他，再次因為那份感覺，而方寸大亂，出了岔子，那你還敢說親切感不會累死人嗎？
我也知道自己有點強詞奪理，立論理據未必夠充份，但我只想提醒我的朋友一點：縱然有如潮水般湧過來的親切感都不一定是真實的，畢竟時代久遠，年代過去，很多東西都不可以單純地相信感覺，這個人類最不可靠而又常常依賴的東西。要是你赤裸裸地瞎目的擁抱這份「親切感」，最終只會害得你焦頭爛額、遍體鱗傷！這樣又值得嗎？
最後，還是那個句話，你不是那樣差，你值得得到更好！
很期待變形金剛，很期待新一集蝙蝠俠，亦很期待下一集的未來戰士，不過也及不上我最期待你能走出這個陰影！！
2009年7月1日星期三
認真地，考慮收山的問題
認真地，考慮收山的問題
星期日，與滿途、阿ben、阿蘇和秋姐火鍋聚會。席間滿途指秋姐的文章寫得好，甚至比絕大部份的人都要好！此時，阿蘇謂曰，若果要追得上秋姐的水平，恐怕要像玩網上遊戲一樣，重新註冊一個戶口，重新建立一個角色，才可以修練到如斯的水平，簡單點說，就是要來生才有機會了！阿ben不太明白，我就用一個比喻給他解釋，就是阿ben現在生一個小朋友，從小就開始栽培，方有可能達到那個水準！
滿途亦指出現在有許多的blogger，文章寫得不好，達不到秋姐的水平，就不應該寫！當然，秋姐也謙稱自己也不是寫得很好，不必如此過份抬舉。此時阿蘇就說，莫伯也是寫blog的，他也沒有秋姐的程度，難道也叫他不用再寫了嗎？滿途爽快地答了一句：是的！接著阿蘇便開玩笑地叫我應該拿起鍋具潑向滿途了！
這幾天，我真的有認真地考慮過是否繼續寫作的問題？我自問說教性、富討論性、有建設性的文章欠奉，文章的說服力亦不足，那麼，寫下去還有意義嗎？
其實，現今寫blog的文化就是因為可以人人都寫，未必要寫得好，但最少可以寫，不像以往只有大文豪才可以出版書籍，只有他們才可以分享意見，傳達思想，現在的風氣就是將出版平民化，每個人都可以發表自己的意見，不管你能力高或低。
喜歡寫blog的人，從來都只享受可以暢所欲言，與不同的人分享自己的生活點滴而已，至於文章寫得好與否，他們根本不在乎，或從另一個角度看，看的人也不期望可以看到華麗的筆鋒或精鍊的文字，他們需要的也許只是那份真摰而實在的感情抒發，或是令人會心微笑的一份共鳴。至於能不能寫blog的資格也犯不著我們任何一個人去判斷吧！而且寫blog不是比賽，不是你死我亡的生死競逐，不用那麼認真吧！就算是，亦總會有人得第一、第二，亦有人會包尾吧。最要的是有份參與，樂在其中。
在席上，我又問滿途，他有那麼意見、見解，為甚麼他又不嘗試去寫呢？他直言自己寫得不好，不能達到秋姐的境界，於是亦沒有打算去寫、去試。我只是想說，世界那麼大、那麼廣，沒有一個人是完美的，那可以妄自菲薄呢？寫作亦然，你擅長處理的不等於他一樣會寫，又或者大家的對象不同，手法也不同，那又怎可以相提並論呢？重要的是享受過程，只要喜歡，又不冒犯他人，又何必想那麼多呢？
我還要繼續寫，只因為自己高興，而不是為了向別人交代！
2009年6月29日星期一
解構莫氏公園
解構莫氏公園
有留意的朋友都應該會發現，莫伯公園的標題加插了一幅相片，而公園名稱亦變為「mok's park」及「莫氏公園」。用這個名字的原因是從前一輯甚受歡迎的卡通片「衰仔樂園」而來的，衰仔樂園的英文名是「south park」，當時我則很想擁有一個屬於自己的網站，於是便用了「mok's spark」，直譯過來，中文便是「莫氏公園」了。後來我的電郵地址等都以這組英文字為主。
這幅相片是我上一次到大阪旅遊時所拍攝的，我個人覺得拍得蠻不錯，所以用來應景，作為莫氏公園的背景圖片，但現在大家看到的效果都有目共睹—差強人意。我原本不認為效果會這樣差，但姑且暫時放一段日子，直至製作出一張更好效果後才再作替換吧！
另外，大家也看到了「莫氏公園博客總部」的字樣，那是甚麼意思呢？在這裡先賣個關子，卻給各位一個提示。能夠稱得上是一個總部，好歹也要個支部存在才行。而這個支部將會設在那兒呢？屆時再向大家公佈吧！
2009年6月26日星期五
變形金剛之博派上身
上個星期日，飲茶個時睇到報紙話沙田有得買變形金剛tee，重話著住變形金剛tee去睇變形金剛勁正，重係特價添，心思思就同女朋友去左睇。
去之前已經心目中有個數，話要買邊個款嫁啦，去到又真係幾多款揀喎，我地睇完第一次，再行下，返黎睇第二次先買到。其中發覺我買呢件博派tee，就係白色好睇d，如果係狂派tee的話就係黑色好睇。之前都有諗過係買黑色，但件衫純綿，我個人又係熱底，都係買件白色無咁吸熱啦！
其實都重有帽呀個d賣，女朋友就鐘意帽多d，但佢就話唔買，衫佢都無乜興趣。比錢時誠惠209蚊，己打7折！少少肉痛但係為左可以著變形金剛tee去睇變形金剛，而且一年先買一、兩件衫，而一件衫又著十年八年，無乜所謂啦！
值得一讚既係兩個年輕活力既sales妹妹既服務態度相當好！我行左兩次先買，重左揀右揀，都係買一件咁大把！到真係比錢個時，開左兩件新衫出黎比我呢個「驗屍官」左睇右睇都發現到少少瑕疵，佢地重要不辭勞苦入個倉度幫我攞件新既出黎，出黎個時重話幫我check左一次，問我有無問題添，成個過程都無黑面，依家好少妹妹仔會咁嫁啦！認真抵讚！咁我地本來走嫁啦，但見個衫袋印晒transformer字幾靚，又好貪心咁返去問小妹妹可唔可以比多個吉既比我地？佢地都搵個新既比我！係度真係要再一次讚佢地，連一向挑剔既女朋友都出口讚佢地好好services，咁就知道有幾難得啦~~希望佢地可以keep住，亦希望佢地可以賺多d啦~~好！廢話唔講咁多，睇下我件變形戰衣先啦~~
圖1 左：除袋未變形版 右：未除袋Normal版
圖2 變形全開(正面)
圖4 正面連衫牌
圖5 衫袖博派Logo close up
圖6 變形全開(背面)
圖8 背面博派小Logo close up
請於7月10號陪我去imax睇巨幕版既朋友仔幫我係個日影返幅沙龍相！thank you!!
2009年6月25日星期四
2009年6月17日星期三
最強比喻
最強比喻
昨晚返到屋企上facebook，有個朋友仔寫左呢段比喻，我覺得好正！想同大家分享下！
最怕個啲個口說接受你,但背後用刀「吉」你既人......
網友A：邊個邊個???
網友B：認同
網友C：邊個咁仆街？
咪係啲回鍋肉law，而家「PK」超級市場諗住將啲豆豉
我睇完真係自愧不如呀！真係一山還有一山高，呢個比喻都可算是經典！
2009年6月16日星期二
Who beats Susan Boyle? Divserity!!
Who beats Susan Boyle? Divserity!!
靚聲阿嬸，Susan Boyle大熱倒灶，敗給跳舞團隊Divserity，只可嘆奈何！換個角度睇，Divserity亦絕對有實力！大家可以睇下佢地既比賽片段，雖然未至於決賽其中一個評判所講，半步都無錯，但其實整體既步覆都十分齊整，表演亦十分具創意，我非常之欣賞！！
由於utube無得link ，就只好要大家按以下連結了！
初賽片段
準決賽片段
決賽片段
2009年6月15日星期一
是誰的錯？
是誰的錯？
正生書院與梅窩居民的對立，直今時今日，我都不認為雙方有錯。正生書院梅窩的校舍設備不足，現在要遷往一所更好的地方繼續他們的使命，當然無可厚非。反過來說，很多人就指梅窩居民不近人情等云云，但是設身處地，將心比己，他們也不是全無道理，政府硬要他們接受，他們的強烈反彈亦完全可以理解。
那麼，整件事應該誰要負起責任呢？最終還是政府的錯。第一錯就是在對學校及年青人的教育不足，大部份學校的對濫藥問題的處理手法依然落後，這就表明了政府根本沒有明確的指引，亦沒有足夠的配套措施去預防及支援學校，那麼怎不可以說是政府的失職？
第二錯，就是將正生書院與梅窩居民推向對立面，令兩個互不關連的團體扣在不是你死，就是我亡的生死線上。正生書院沒有地方遷址，為甚麼就不能新建一座？梅窩學額不足夠，為甚麼就不能新建一座？可以和平解決，甚至乎本來不算是一個問題的事，就是因為政府的政策失當而將兩群風馬牛不相干的人爭過你死我活，那麼怎不可以說是政府的失義？
第三錯，就是官員們沒有實在地解決問題，個個都是光說不做。李少光、唐英年、曾蔭權都說大家要多包容，問題卻是大家實在是容不下，要大家冷靜面對，是要梅窩的居民冷靜地面對政府硬給他們的所謂諮詢會議？還是要正生書院的學生冷靜地面對被拒絕，四面楚歌般的噩夢？今早還有記者在聽完特首對事件的發言後，問了特首一句，正生可否搬到禮賓府？曾特首又推說禮賓府是歷史建築，不能隨便改建等等，也就是要說給大家知，呼籲還呼籲，實際上還是無能為力，半個解決方案也沒有提出來，完全對所有人欠缺承擔，那怎不可以說是政府的失責？
對這個失職、失義、失責的政府早已心灰意冷，不抱有半點期望，只希望事件能夠盡快並完滿地解決。值得一提，而且令我深深地感動的是在場的陳敏儀小姐的說話，道出了天下父母的心聲，也提醒了我們人間還有情，我們不是對立的，我們也都可以同一陣線的，沒有甚麼問題是解決不了的，只要我們之間還有愛的話。
聲音處理得不夠好，聽的時候較困難
接納家居附近有部份設施，是最起碼的犠牲
那你的犠牲又在那裡？
香港那麼多的古蹟、集體回憶、舊情懷都因為失救而消失殆盡了，那座金碧輝煌的禮賓府又算得上是甚麼古蹟？
難道那幾塊舊石頭比浪子回頭來得更有價值嗎？
2009年6月14日星期日
現代愛情故事
現代愛情故事
近來，尤其是近一個月來，見識了很多關於愛情的事。或許我是保守，又或者是我的愛情路平坦得驚人，我發現在我身邊發生的，好像離我的認知範圍很遠很遠，我就活像一個火星人般，生活在一個陌生的星球裡一樣。
昨晚，和阿ben及戴小姐在青衣城外面，對著如心廣場和青衣橋吃KFG，又再分享了一些感情見證和經歷。我說我近來見得太多，離離合合，錯綜複習的感情瓜葛，好像沒完沒了似的，我說我落伍了，看不通亦看不透。或者就正如阿蘇對我說，你成日說自己開通，其實你越說得多，你就越看不開，要是你看得開，根本就不會提，因為不屑一提！但阿ben亦提出了一點，好值得思考。我們成長於八十年代，我們的思維及尺度也是八十年代時建立的，但到了現在，2010年也快到了，那我們要跟隨那一個尺度呢？當然是現今的尺度吧！
於某些程度上，我是同意的，但我始終認為時代過去，不代表所有事情在根本上會有所改變，是非黑白模糊不清，只是大家的尺寸變闊了，不等於一件錯事就可以變成一件對的事！引用黃敏德在野獸刑警開場不久的一句說話：「你可以話我聞塞，但我認我係！」
選了以下這首歌，以下這個版本。八、九十年代的歌曲，當時聽的時候已經覺得內容和意義相當前衛。現在聽，聽著那時或許還在襁褓中的嬰兒，現在唱著這首歌的時候，我便意識到也許時代真的變了，但是是變好了，還是變壞了呢？天曉得！
2009年6月10日星期三
我的回憶不是我的
我的回憶不是我的
第一次聽到這首歌，是致電給一個朋友時所聽到的電話候接鈴聲，起初不覺有甚麼特別，最特別的就是當聽到~~
oh~~baby 當晚與你記著「蒲」！~~~~公英~~~~
為甚麼歌詞說的會是「蒲」的呢？啊！原來是要說「我的回憶不是我的」.......？
要怎樣才可以讓我的回憶不是我的呢？大家一起看一下~~
難道送別你，回頭總是虔誠
誰能怪我，總是太感性
若果這個回憶不再屬於我的話，這個回憶就沒有半點意義；
若果我不再擁有這段回憶的話，這個我也就變得支離破碎！
同一段回憶可以是痛苦的，可以是苦澀的，也可以是甜美的，一切都只視乎在怎麼樣的時候和怎麼樣的心情，我就選擇把這段回憶永久保存，直到我死後，就算不能帶走些甚麼，最少也可以讓回憶中的你永遠地陪隨著我，來填補你在我心中永遠的空缺。
2009年6月9日星期二
2009年6月8日星期一
又再姨丈到啦
又再姨丈到啦
又再次一個月一次既情緒週期問題。唔知點解，傷心既說話，總係出自你最親既人既口，唔明白，真係好唔明白！
想寫返d blog好耐，但有時間既時候，坐低，對住電腦，雙手放在keyboard上面時，又甚麼都不想寫，係個人dry，定係好攰，寫blog為左乜？一下子湧出黎，唔想諗，只係知呢一刻，我無乜野心情寫落去，卻又唔捨得唔update，等各位竟然不斷支持既blog友失望，認真係矛盾。
不如講左今日先啦，話說今日七點幾就收工，自己行左出旺角，睇下野，坐巴士返屋企個時，見到旺角e出口對出既彌敦道好多警車同報館車泊左係度。有個男人話，唔通又有人掟野落街？我心諗係個度？又落緊雨，唔會掛？跟住個男人話可能捉老翻，咁重無聊，個度有乜翻版野捉呀？返到屋企食飯先知，原來真係又有人掟野落街，又傷左廿幾人。跟著上到facebook，就留低左句說話，又同其他朋友msn咁講左以下幾句說話：
次次都咁好彩，每次都經過，每次都唔中--旺角腐蝕彈
我剛剛係附近行過，同一條街，應該係兩、三個街口左右吧.......唔夠一百米。
時間亦係最近，三十分鐘之內。好彩我第二個destination抄左第二條路行，無行過去。我尋日都有經過，都係咁上下時間
對上兩次出事，我當日前前後後都有係該地點出現，而今次相距事發時間最近，而相對黎講，我在當時與出事距離亦係最近。其實都無驚，但原來我真係可以隨時出事，諗起，我都算好好彩！！返到屋企，今晚竟然整左鮑魚仔，重有五仔咁多添。睇晚間新聞個時，我同屋企人講左兩次我個時應該係附近，佢地竟然出奇地聽唔到咁，無回應到，係平時，佢地應該有d野講吧，今次無......算係失望吧！哈哈~~
尋晚有人問
尋晚屋企人問我幾時轉工？下？轉工？我做左都無一年，講學野，應該係5%都學不到。佢地話，出去睇下有乜機會，賺多d錢丫嘛~~嘩~~乜講得咁輕易。有時好多野，我唔願同屋企人講，係因為我覺得同佢地講，要講得佢地明，係一件好困難既事，所以我都唔係好想講比佢地知，好多野我都唔會提！可以做到老闆助手，老實講，我真係恨左好耐，一定唔係呢一年內既事，而且呢個位如果係比識既人應徵的話，我估無人唔想黎爭呢個位！況且，我係黎度學到既除左係工作上既知識之外，重有好多額外既野，好多想接觸而又未接觸過既野，而且我相信呢度既發展空間同機會遠遠比外面好，所以我先咁堅持留係度！
今日又有人提
今日又有人提起，佢媽子同佢講我做乜咁多工唔做，係都要做呢度，正正經經返份工，如果唔係點養人個女？如果你信件事work，你唔會唔撐我，唔會倒返轉頭同我講，你好懷疑係咪自己揀錯左人！我除左衣衣哦哦，支吾以對，重可以做d乜野？講左你又唔聽，聽左你又唔明，講又講左好多次，咁重要我講咁多次做乜？我唔想再講，講得多又會嘈交~~
先知先覺
蘇哥幾年前已經提起過，你對住d fans咁識耍太極，點解對住女朋友唔耍，係都要硬生生咁要佢接受d好難接受既事實？個時我點答，我唔多記得，但都離不開係就係因為女朋友，無乜野需要粉飾，無乜野要包裝，氹你開心既野應該有咁浮誇得咁浮誇。實際事呢？實事求是囉！氹你落答，來日揭開左唔係個會事，又有乜野謂？
近幾日都係咁，個人無乜心機，連寫呢篇blog都寫到一塌糊塗，希望大家提升大家既領悟能力，睇得明呢篇blog，亦多謝各位係暗角支持我既blog友，雖然你地未必知我做緊乜，但都依然繼續支持我，十分多謝你地！希望d姨丈口水無污染到大家吧。
2009年6月2日星期二
法蘭西野，台灣與日本的不同演繹
法蘭西野，台灣與日本的不同演繹
記得幾年前，係我最愛玩既「winning e呢人」入面聽過呢首歌，但一路都唔知佢叫乜名。之後係間電器舖見到首歌改左造以下呢個台灣version，一向都好想搵返出黎，前幾日的起心肝，終於搵到，原來除左台灣版，原來最初還有個日文版，兩個都好搞笑！係呢度分享下！
台灣版
日本版
原裝live
好佩服改版既人，佢地改得好特別，公仔都畫得好得意！！
2009年5月30日星期六
莫伯廿九歲生日番外篇—雨中(!) 敢碳爐
莫伯廿九歲生日番外篇—雨中(!) 敢碳爐
成兩個星期無update個blog，唔係因為爆廠，係因為工作忙得太交關，上個星期頂左三晚通宵，莫講話update個blog啦，連瞓都唔夠時間呀(雖則我本身就瞓得好少)。到左今個星期，終於開始無咁忙，於是乎就要回顧返呢個月其中一個最重要既日子，就係5月17號返左屯門蝴蝶灣燒野食嗱！呢次燒野食其實主要發起都係因為我話我呢個月生日，想大家搵d野搞下，而邊爐打得多，想燒下野食，又因為我對係蝴蝶灣燒野食有d情意結，所以就希望班小學同學仔一齊出席呢個燒野食活動嗱！
又係個幾隻腳撐起成個活動，因為戴小姐同余小姐話，蝴蝶灣燒野食d人係傻既，最好一早就落去霸爐，否則好難滿足呢個願望，而且我地亦計劃好plan B，如果真係霸唔到爐的話就去咖啡灣租爐燒！但一早落去霸爐呢個重任由邊個負責呢？就係由自告奮勇既余小姐同戴小姐負責嗱！余小姐因為住得近，所以自願作為先頭部隊，去做呢個霸爐既工作。好！當一切都安排好晒之後，事情發展到之前一日........
四隻鐵腳眼見成個星期既天氣非常咁唔穩定，於是就計劃定Plan B，萬一真係落雨就改去咖啡灣租爐，因為戴小姐已經準備好羊扒同大量一級肉腸，重按我既強烈願望要求飲好酒之下，已經連酒都買左~~故此內部決定當日按原定計劃附以plan B，以防萬一！
5月17日 晴......(本來)
今日11點幾就醒左，因為知道有人霸爐會悶，所以諗住早D入去，陪下負責霸爐既戴小姐同余小姐！但係姿姿左左，成點鐘先出門口，雖然按計劃我係3點鐘先蒲頭，但咁多位人兄咁眾志成城，我又點可以撇低勞苦功高既霸爐先鋒呢？早D入去吧啦~~巴士去到屯門公路，一點九個字，余小姐打電話黎，話佢已經到左，爐係霸到，但就無瓦遮頭，佢就坐埋一邊睇書打發時間！你話呢D朋友去邊到搵丫？我話我已經入緊黎，到左再CALL你！轉個頭，收到戴小姐電話，話搞緊D羊扒，好快可以出門口咁話。
巴士去到美樂街巿，我就落車，行去ok買d野飲兼且攞錢，之後再踏上個條既陌生又熟悉既路入去燒烤場，終於見到余小姐啦，真係會曬到暉嫁喎個位！佢就坐左埋一邊，有少少樹遮下既都，睇住本雜誌，我坐低就同佢傾計打發時間，個時先兩點幾，重有好多好多時間。依？咁戴小姐重係邊呢？咁耐都未到？原來重係屋企同d羊扒搏鬥緊，而阿ben哥就成3點幾先出現，但就成個「奇洛李維斯」既LEO造型行過黎。戴住黑超，白背心，戴住個handfree，不知幾咁型！到左佢話要換返條短褲喎，重帶左條泳褲添，但無人打算落水喎~~浪費左條泳褲！四點幾，司機陳重要早過戴小姐黎到，吹吹下水，戴小姐就終於帶著成個露營背囊出現啦，跟著係個袋到係咁將支酒呀、羊扒呀、腸仔呀、刀刀、三幾支調味料舖晒出黎啦，成個袋清晒出黎，成張枱都係野，幾咁厲害呀~~之後就放低阿ben係度睇爐，我、戴小姐同司機陳就出去會合出左去搞返d野既余小姐準備去買其他野食同用品哪~~
出到去會合返余小姐，就行過蝴蝶邨商場睇下買d乜野，先去大昌，再上惠康落黎join返金小姐再落街巿。係菜檔買金菇、生菜、蕃薯、矮瓜、青黃紅椒好多好多菜，而主力講價同揀料既竟然係司機陳，而其他三位都只係附助，而司機陳重識得砍價，令到三位女仕都嘆為觀止！買完菜去買海鮮，先買左條烏頭魚，之後再去買蝦、帶子同扇貝。整個過程我都係拿住d餸行埋一邊等，十足十我小學個時咁，睇住司機陳帶頭衝鋒陷陣，為我地砍左咁多價，買左咁多好野，都真係不得不佩服。或者可能以為人父，加上要自力更新吧！我無諗過，佢係主力買餸個一位！返過去美樂個邊再買返d正常野食，牛豬雞扒、炭呀之類個d，再入美樂街巿買野飲。d野飲可以就咁叫，轉頭佢地會有個魚檔用咁大個發泡膠箱，放好晒冰，再放d野飲落去，用車仔車入燒烤場，唔使自己搬入去。搞好晒d野，行返入去燒烤場，張經理已經黎左，亦都已經成五點幾，太陽終於都無咁曬。女仔去左洗野，我地係到等，但等左好耐，佢地人形都無，於是司機陳就話佢入去睇睇發生乜野事，到佢出黎個陣，講左句，好彩佢入一入去，如果唔係都無得食，因為班女仔唔係好識洗野，搞唔掂，佢幫下手先有得食，真係好彩有司機陳.......如果唔係真係唔知要等到幾時咯~~
等左咁耐，終於都有得燒啦~~起爐都算快手，因為阿ben哥有帶lighter過黎，幾野就點著左d炭精，好快d炭都著埋，連報紙都唔使用！唔知點解，覺得越大個人燒野食，經驗越多，帶既野越多，食既野種類更多，快樂指數都好似高d咁！大家一開波，就例排燒腸嫁啦，但我地今次燒既唔係普通既腸，係d德國肉腸，又有d白色既豬肉腸，反而無傳統既廚師腸！d肉腸真係好好好食！食左兩條，唔知點解已經覺得飽！？唔住我一個係咁，張經理都有咁覺得，但就衰在d腸真係好好食，個感覺反而覺得好唔抵咁！食完腸，男仔就開始燒羊扒啦，女仔就由開始到個時都無停手咁係咁用錫紙包d金菇呀，d菜蔬咁，認真唔話得丫！燒燒下，聽到隔幾張枱咁遠，有班人係度唱生日歌，又有蛋糕咁，但就全個燒烤場都好靜，無人理佢地，但佢地就係咁「薯」d人，我都唔知佢想全部人一齊唱丫，定係一齊靜晒聽佢地唱？總之就成個場都靜晒係啦，當佢地唱完，咁我地就發揮我地既搞事本色，一齊拍晒手話好野~~~同樣地，成個場都係無乜反應既！誰不知~~邪惡既事啱啱就要開始.......
雨中(!)敢碳爐
唱完生日歌，唔到半個鐘，先係幾滴雨水落係眾人既頭上，落下落下，雨越落越大，又無瓦遮頭，全場人全部照頭淋 *____* 而唱生日歌那枱就消失得無影無蹤！我地係有些少狼狽，將所有袋集合一齊，收係阿ben把遮下面，而戴小姐個袋防水就就咁放係度由佢淋；另一把遮就用黎遮住部份野食，但佢地重有心情係度落住雨咁繼續用錫紙包起d野食！漫天風雨，我地個爐都叫硬淨，重越燒越旺添，當然啦，我地就係因為怕佢會燒完，係咁燒d肥既肉，又切左d肥膏出黎放入個火度助燃！而燒起既野食又要放返上枱把遮入面，一人食d一人食d咁。司機陳同阿ben有帶帽，戴小姐就用大毛巾包住個頭，阿ben又有多兩條毛巾，就比金小姐同余小姐褸著個頭，但雖然係落雨，但其實都好焗好熱，所以褸左一陣都係頂唔住，都係要放低條毛巾照頭淋！我個時有擔心過大家會唔會想走呢？呢個咁既環境，行街都要擔遮啦，何況燒野食？如果有人提議要走的話，我都一定唔會扭住唔走既，因為係關乎大家既健康問題，我食野個時係連肉帶雨水咁食，我呢d人就無乜所謂，但話晒有女仔，只要有人講一句，我一定會走！但就係唔知點解，大家係咁燒完就食，食完又繼續燒，但雨勢無停過，而旁邊有幾枱人已經走左，而望過去，一大片狼藉，我開始諗咁落去，重係唔係辦法呢？
海鮮一出 雨過天清
雨落在一個鐘有多，我地燒d肉食都已經七七八八，或者都已經開始無乜心機再磨落去，因為落住雨咁燒，體力消耗原來非常厲害，亦因為咁大家好多野都食唔晒，但重有帶子同扇貝喎，重有條烏頭魚，點算呀？阿ben同張經理就好少理，攞左一早準備好既網舖平係個爐上面，放晒d帶子同扇貝上去，而個雨勢終於都開始細左好多，大家又回復返之前燒野食既愉快啦！見到金小姐個頭好似沖完涼咁，濕鬼晒，司機陳同張經理就話要同金小姐影疑似「出浴照」喎！佢地重影得鬼咁開心添，咁我都無理得咁多，攞埋我部相機出黎影！大家都問我，重落緊雨喎，你部機.......怕唔怕呀？我就話無乜所謂啦，比起剛才，呢d小事黎既啫，最緊要大家開心~~坐下坐下，半個鐘頭到已經無晒雨啦，d帶子同扇貝都食得嗱，我試左幾隻，係d扇貝有少少韌之外，味道真係好鮮好甜，無得頂呀！食緊海鮮既途中，所有野都包好晒啦(大家要注意，落緊雨個時都無停過手包嫁)，放晒上個爐到。
食完晒d野，就到條烏頭啦，係街巿個度，賣魚阿姐知我地係用黎燒野食，已經幫我地泊左d鹽上條魚到，但事實係得金小姐咁樣食過，但佢係唔知點整出黎，於是大家又開始諗呢條魚點搞嗱？呢個時候又係司機陳出手既時候，佢同戴小姐兩個人四隻手包下包下就搞好條魚啦，戴小姐重將專登帶黎既香茅放入個魚身入面添，搞好晒之後，大伙兒又圍返係個爐邊，邊吹水，邊等食啦~~講開又講，由個班人唱完生日歌之後就落雨，我地邊等邊係度咒罵佢地「累街坊」呀！而佢地消失得無形無蹤亦被我地嚴正卑視呀！而我地亦總結返我地之前係有諗過plan B，我都都算到好盡嫁啦，但千算萬算都算唔到會燒燒下落雨丫，行唔到plan B呀！係噃，講講下差d唔記得左支紅酒，開定佢，等到條魚都差唔多，我地幾個人小心翼翼先開到支紅酒，第一口.......因為未放夠時間，味道麻麻地。
由於我地都放左好多野係爐邊，是但攞返d上黎都可以食，而剛才係雨中食左d矮瓜呀、金菇個d都好好食！吹左陣水，張經理同金小姐講d養狗既野，睇黎金小姐都幾鐘意狗喎，係咁叫張經理下次要帶埋隻狗出黎比佢玩喎。講下講下，都唔記得左要幫條魚計時添，於是就燒多左陣，跟手上枱。咁上枱呢個任務又係交比曾經做過廚房既司機陳主理，一打開錫紙，大家都重諗緊d魚皮點起，司機陳話用刀一起就起到，就真係一起就見到d肉，食得！一人分返雙筷子，無幾耐，半邊肉就食晒，味道唔錯係老左少少咁，到反轉佢食另一邊，反而呢邊就好滑好滑，兩個字形容—好正！食完魚，再飲啖紅酒，都重係麻麻地味道，之後就圍住個爐吹水……張經理同戴小姐都先後食左條「塞米」，而本來話已經好飽既我，忽然間又開始肚餓係黎，食左支「塞米」又真係幾好食喎~~跟著又吹水又開返d野食，坐下都成十點幾啦，第日係星期一，大家都要返工，於是就早d散水啦，但係呢個時候，我一個人係咁「隊」左成包蝦，其他人就收野，我都幾唔好意思嫁，其實……食完包蝦，去飲埋最後一啖紅酒........依？又ok喎，味道最好就係一啖，戴小姐果然無介紹錯呀！
隔離大想頭
咁啱又講開豬流感，我地咁淋住雨咁燒野食，會唔會感冒嫁？於是乎大家就做左一個約定，如果其中一個人中在流感要隔離，大家就立即自首，咁大家就可以一齊被隔離，順便放七日假，重可以一齊玩返七日添。而張經理同戴小姐重係度研究邊個隔離中心好玩D，究竟係鯉魚門定係麥理浩夫人好玩D呢？最終大家得出左係麥理浩夫人渡假村係好玩D既(如果我無記錯的話)，咁於是大家就約定左約果中招的話就集體申請入去隔離(玩返)一個星期咁話~~超無聊呀哦，我承認我地係，而我亦不諱言有咁樣諗過~~請大家原諒我~~哈哈~~
黎到呢個時候，由於太多太多野剩低啦，生既野大把，而張經理因為係無飯屋企，於是就攞在可以擺得最耐既腸丸類返屋企，而肉個d就硬塞左比余小姐.......重有半支酒同燒好晒既野食，諗緊點搞，但隔離張枱班後生過我地既後生仔就走過黎問我地有無d「救援物資」喎，於是我地就拿拿臨張d食得既野全部推晒比佢地，其實都幾多好野嫁，戴小姐去完洗手返黎，連個半支紅酒都送埋比佢地添！令佢地都呆左一呆，心諗：呢班友係咪傻嫁？最後連d紙碗呀都送晒比佢地裝酒飲，令到我地乜都無剩，亦無浪費到d野咁嗱！
成村人行返出去，司機陳同戴小姐係好後既位置跟著食「事後煙」，咁我地同張經理講返張太今日推張經理唔出黎既理由，呢個真係一個好有智慧既答案，值得各位參考下嫁，內容如下：
張經理：老婆，我今日同d小學同學去燒野食，重溫返d小學時代生活呀，你黎唔黎呀？
張太：唔......我係你小學個時，都唔存在既，我都係唔阻你重溫你既小學生活啦~~
嘩！認真具智慧，就咁就推左，而事實亦證明佢呢個選擇無錯！最少唔使變「落湯雞」先啦~~行到去停車場，戴小姐順路跟張經理車，其他人就繼續行返出去！余小姐自己返入美樂，司機陳同阿ben去坐巴士，而我就順路同金小姐返屋企，因為我架巴士係金小姐屋企附近，而我未搬之前都係住金小姐個座既！就快去到個時走左班車，我都係唔追啦，實在太攰，送金小姐到樓下行返轉頭係巴士站等車。等等下，有對男女係我後面排隊，排排下，我聽到d聲望下佢地，佢地竟然係我旁邊「打車輪」喎，重「啜啜」聲好忘我添。又等等下，竟然見到崔小姐個陪娘個男朋友喎！佢啱啱送完女朋友返黎，準備坐車走，上到車再傾就陣，十二點幾就返到黃大仙，轉211返到屋企，完成左一個咁難忘既燒野食活動嗱！！
後記：
首先真係好多謝好多謝咁多位同學仔係咁既情況底下都肯陪我癲，完全係奮不顧(濕)身呀！容許我係度向你地躹個九十度既躬呀！希望大家無因為咁樣而病啦！而當大家經過麵包舖既時候，余小姐問使唔使買個生日蛋糕喎？其實食係想食既，但都唔好意思要大家咁破費啦，我當正呢個係我既生日會嫁，而大家肯為我搞咁多野，我已經好滿足嫁啦，有無蛋糕都唔重要哪！況且，今日唱生日歌切生日蛋糕，最後變為我地燒野食途中不斷咒罵既對象，唔買生日蛋糕都算係一個明智既選擇丫！我會記得呢一日，記得每一位陪我過呢一日既人和事，呢一日真係難得又難忘，再係度唔好嫌我又再沉氣咁再多謝每一位！無你地，呢個活動唔會咁精采，唔會咁好玩！謝謝！！
當日精采片段請按我!!
2009年5月16日星期六
莫伯廿九歲生日的前中後—後篇：捨命陪君子/淑女
莫伯廿九歲生日的前中後—後篇：捨命陪君子/淑女
估唔到，前日係有10個visits既！我星期四上堂，重要有人話追緊我個blog既添，令我真係受寵若驚呀！我寫d野應該唔吸引丫，但大家都咁支持，認真多謝！定係大家係度睇緊我幾時死？幾時爆廠呢？我唔知啦，無論如何，點都好，只要我一日唔死，我都會繼續堅持寫落去既！而係呢個後篇入面，大家唔好諗住有d乜野大件事呀，高潮位呀，呢d，一定無嫁，只係個title大下人咁嫁咋，大家唔好太認真。好！唔阻大家時間，進入最終章—捨命陪君子/淑女！！！
係公司收工已經係六點八，老闆話佢唔記得我要去食buffet要走，點解唔同佢講？好老實，野雖然唔趕，未做完就未做完，你唔叫我走，我係真係唔敢走，而且去玩呢d野應該及唔上工作重要掛，所以唔記得唔係老闆責任，無叫我走，亦唔係d乜野唔應該既事。老闆~~已經係好好嫁嗱~~
衝左落街，「砍」落地鐵站既時候，打比戴小姐，以為佢差唔多去到啦~~點知.......佢係美孚準備上地鐵~~依~~咁我落到地鐵站就差唔多喎，最後係太子站join埋係尖沙咀落車，期間余小姐已經打過搵我地，要佢自己一個入左去坐住先，認真唔好意思！坐低一陣，戴小姐就將佢尋日係同一間地方食雪糕buffet既track record攞左出黎，睇下今日要食邊幾樣先？余小姐見佢咁，亦都準備今日做返個track record。我見佢地咁認真，我就覺得奇怪，想食邊樣就邊樣啦，無謂咁認真吧！又或者我因為個午飯食得遲左少少，又食多左少少，加上未100%回復既關係，係有少少就一就既。係地鐵個時已經同戴小姐講左早兩日係有dd唔舒服嫁啦，佢問我點解唔通知佢，最多唔食既啫，但我一黎係想食，二黎係唔想掃大家興既~~再補上一句，捨命陪君子丫嘛~~
咁個buffet可以點一款甜品當main course，再每次每個人可以點3個球，點左之後，咁未有野食，好似係余小姐問起，問我早一日去左邊到慶祝之類既說話啦~~戴小姐就搶住咁答話：
哈哈~~我係佢生日個日第二個見到既靚女！
我即時呆一呆，咁我係咪要講野嫁呢？係呢個場合講？得唔得嫁呢？跟著我就話啦，其實同余小姐都講得既，佢都應該係一個口密既人黎既~~於是乎戴小姐就話之前都講左比余小姐知少少嫁啦！跟著繼續講(聲音/文字 經過特別處理) ：
唉~~o gpd vfgr vhpa, oss yfiku gyo gi gihab o afhhh dbu, nk gihab o dkmym dbu heii, hjwg ytk gwg ym an ehkp !! rsp orijb jbmc ohvf mwv sgjwp jka kb ocsh rqyt, onf rtm nini knib bcrl pp hqi qdam oyg!! 比戴小姐潤到好應!!
余小姐：ohvf rfd jbmc ohvf sgjwp jka kb ocsh hghu? hnlh agdi hqi vfgr vhpa, onf janl mwv ytk m dm pp hqi rbbr ~~
唉~~我出唔到聲~~因為我都唔知點解釋，但就心諗：如果你地真係結婚的話~~~~~~~我無乜所謂既~~~哈哈~~~
跟著就開始食呀食~~因為我就住就住既關係，而且坐得麻麻地，所以食到無乜心機，但d雪糕又確實係幾好食既，當食到第二輪之後，即係食左9個球，我就放棄嗱！戴小姐同余小姐就再食多一輪！佢地每人食左11個球！！但據戴小姐講，早一日黎，佢都食左15球~~~呢一日好明顯係失左準啦~~我亦都好好奇，佢個身形可以keep得到，有機會真係要請教下佢。
食緊途中，都有傾下其他八卦事，好似以前有d小學同學既新聞都有所聽聞。從消息得知，有個以前全級第一既女仔，已經結左婚，重生左小朋友，戴小姐話無乜咁出奇，反而個消息提供既人反而剎有介事咁話，個女同學，結左婚無耐，就生左啦喎，都重要係近黎既事。戴小姐就話啦，我地呢個年紀~~結左婚既都大把啦，要生小朋友既，都係合適年齡啦~~況且，呢個咩年代呀？逢子成婚都唔係乜野新奇事啦，而且人地老公肯負責任喎！！重想點呀？
食完個雪糕，就去左尖東ceo新法唱k，約阿ben哥8點半，我地重要早過佢去到。成$150一位，佢話可以唱到11:30~~都貴貴地......坐低無耐，阿ben哥就出現啦，出現都唔單住，佢重要帶住個口罩~______~ "" 我地話你病就唔好出黎啦，但對於阿ben哥黎講，唱k呢家野簡直係靈丹妙藥呀~~又係一個捨命陪君子既典範啦~~
好~~又係呢幾隻腳唱k啦，效果同狀態好似忽然間返晒黎咁~~除左阿ben帶住口罩唱，忽然間變得更加似左李克勤之外，我同戴小姐都好似返左黎咁。一黎係個ceo d音響真係靚d，重有獨立廁所添，二黎我估係d腳既互相影響！戴小姐話同其他fd都無唱得咁開心，咁放！同我地呢幾隻腳就出現左傳說之中既「連攜」嗱！
我同戴小姐都如大神坐一樣，狀態越唱越有，阿ben都唱開返把聲，重甩埋個口罩，盡情咁唱~~余小姐因為初段講電話，遲左入局，但後來亦變返一貫既「千化」唱腔！但原來余小姐自己話，其實佢只係唱到佢個key，實際上佢唔係鐘意「千化」嫁~~下？呢一野，真係有d始料未及喎~~戴小姐又繼續點返d首本名曲，有d就唱半隻就算，但點知隻隻歌d砍辭都「梗」到好應！真係越唱越見鬼！下下頂到應！！阿ben就學返唔少中文字，尤其是「繾綣星光下」，佢先知個兩個字點讀~~重問埋點解？我話即係兩個人攬埋一舊咁囉，余小姐就補充左一句，用字精鍊，而我亦覺得非常貼切既就係--重有d摸身摸勢個d動作囉~~嘩！大家係想像得到幾咁「繾綣」！
唱下唱下，到左預定交房時間都無人黎，於是乎就繼續唱啦~~唱下一個鐘唱下又一個鐘，差唔多到左兩點幾~~我地確定左我地可以唱到第朝都無人理我地嫁啦！於是就覺得肚餓啦，亦諗住唱完所有歌之後就去食牛腩麵！我好耐都未試過唱到口都干，氣都開始無~~幾經辛苦終於都唱完成張playlist！係三點幾，終於離開新法，去食麵！諗住大家都要去旺角坐車返屋企，於是坐的士落旺角，係朗豪坊條街搵左間荼餐廳食，而大家又真係食牛腩麵。唔知係咪因為肚餓呢？d野又幾好食喎！食完，大家搵返車搭返屋企，我返到屋企已經係四點幾，搞好晒所有野之後，成五點鐘先瞓！不過，講真，玩得咁開心係值得既！
差d唔記得左一樣好重要既野，就係唱k個時阿ben哥用張紙係上面寫左張生日賀「紙」比我，重有戴小姐同余小姐既簽署，重有畫公仔添~~認真認真多謝佢地為我賀呢個生日，我真係覺得呢三日之中，呢日係過得最開心既！而大家十幾年前認識，到近黎相認返，重玩得咁埋，我覺得呢個係緣份，我希望我地呢個友誼可以繼續落去，亦好需要多謝除左呢幾位朋友之外，身邊重有好多不斷支持我既人，我成日都覺得自己幸福，因為身邊好多朋友都好包容我，我真係好多謝你地每一個！
就係咁様，莫伯廿九歲生日既前中後，就咁就結束左，踏入新既一年(?)，莫伯需要面對更多更多既挑戰，希望莫伯可以與一大班朋友一齊面對！一齊成長！再次多謝每一個身邊既朋友，無你地既支持、鼓勵同鞭策，莫伯便甚麼都做不到，亦搵唔到自己既生存空間同意義！希望大家可以見到不斷進化的莫伯，一個依然有火，依然有心有力既莫伯！
一班捨命陪我既君子和淑女
ps. sorry~~so far咁耐，我都分唔邊個打邊簽名，而右面那個個鴨蛋超人係邊個畫嫁？
2009年5月14日星期四
莫伯廿九歲生日的前中後—中篇：四大美人陪我過生日
莫伯廿九歲生日的前中後—中篇：四大美人陪我過生日
話就話四大美人啫，大家唔好以為我真係咁好艷福先得嫁，得一個係我女朋友之嘛，其他都係fans黎啫~~唔講咁多嗱~~唔阻大家睇片
生日當日既記錄start~~
十點鐘，起身，無懶床，因為好緊張咁執埋d手尾野！行出廳，見唔到有「烚蛋」食，可能因為阿媽舊曆生日個時已經整左一次，所以今日無整，又或是怕我食得太多蛋既緣故，所以無整，我搞唔清楚啦，總之就執埋d相，應承左個fd今日比佢，但到今朝都重有少少未整好，更唔好話燒碟啦，嗱嗱臨搞掂佢！約就約十二點半，但車程斷估都要一個鐘掛，十一點八到先搞好晒出門口，到摩士出面個巴士站，睇清楚d巴士路線先發現有一架比原先預算坐既巴士又快、又近既車，最重要既係呢架車係我面前出現，二話不說即刻上車，又再去我呢個又熟悉又陌生既地方—屯門！
話到無咁快，真係半個鐘到就到左巿中心，actually我又無話約定個fd既時間同地點，只知道佢大約食十二點半，成個巿中心周圍都食到厭，無乜所謂~~於是百無聊賴咁四圍逛，逛下逛下又比我逛到我個fd做野間「錢莊」出面喎，佢咁啱坐門口，我又廢時叫佢啦，重見到佢放蚊添~~乜咁無野搞咩？再逛左陣，因為身上得廿皮，無乜安全感，過左對面銀行提款，在提款途中個fd就打黎問我係邊，於是就講出位置回合。因為附近太多野食，而想食個間又要排隊，於是就去又一間日式舖頭食野。我係幾估唔到巿中心係午飯時間係咁冷清，我重以為呢頭好難搵食添，原來係我多疑而已。
邊傾邊講邊揀野食，點完餐，我就話要做返d正經事，比左佢個日結婚，幫佢影相個隻碟佢，咁佢問我，做完正經野，又可以有d乜野唔正經呢？我係個袋到攞左本相簿出黎，話你份禮呢~~我就確實唔會比你嫁啦，本相簿當係禮啦~~阿fd佢睇落都幾鐘意，咁我都ok滿意既~~佢話唔怪得之前我話要執d野啦，原來要搞埋呢本野~~個謎底咪就係咁囉.......哈哈！食緊飯個時都傾左好多唔同既野，又講下屯門，又講下佢既婚後生活，又講下東講下西，其中有一段係咁既(大約意思啦)~~
我：睇得出你阿哥都幾錫你喎~~
fd：你又知既？你係邊到聽返黎嫁？
我：其實feel到既，我個日又唔知係邊度聽過有人話你阿哥幫你打點晒d野。而且你老公呢，都睇得出佢好錫你嫁，肯花咁多心思，擺酒唱歌喎~~好野呀~~
fd：如果佢個日唔搵d野搞下？佢就知死呀~~之前問過佢，佢又話乜都無諗住搞喎~~
我：我都係個時有人走黎同我講話有呢段咋，都係有心思啦......其實我都feel到你全屋企人佢地都好錫你~~
fd：你講到我好多人錫咁喎，但又無講話我好錫佢地咁，乜我係咁既咩~~
我：其實好多野...... 無得話點計既，邊個對邊個好亦無得話返轉頭既.......
(有句話到左咀邊，但諗左陣......呢句說話出自我口唔太恰當，所以吞返落個肚到~~係乜野？我唔寫啦~~因為我都已經唔記得左係乜野嗱)
fd又講開，以為我係d好安於正常working hour既人，我話以前係「大中華」已經唔係好想咁樣落去，因為咁樣其實無乜前途咁，於是乎是想轉行。咁佢就問我女朋友頂得住？無壓力咩？點會無丫~~見招拆招啦唯有~~都好多謝阿fd替我擔心呢個問題既~~
食完，同完阿fd返公司，之後又諗起戴小姐今日放假，無野搞，立即想約佢食tea(係！係食完個飯就約人去食tea！)順便傾下計(或者傾下心事咁啦......彼此)。打比戴小姐，根據佢既說法，佢已經係「砍住」出街，話轉頭打返比我，我stop住佢話我都係屯門呀~~你去邊呀？一齊/我陪你/你陪我坐車丫~~出順利邨？我唔順路嫁，反正無野搞.......一齊啦。
於是係巿中心個巴士站坐返我入黎架車出返去，唔單止，係去得重遠過我黎既黃大仙，係去順利邨。因為架車其實係經左戴小姐樓下先到巿中心，所以我係個站度等左兩架車，戴小姐坐第三架車先到，但係佢架車入站轉灣個時已經感覺到戴小姐股「氣」，架車真係「砍住」入黎嫁~~上車見到戴小姐，傾左唔少野.......順便比佢「潤」左幾句既......出到彩虹，重要轉巴士上順利。上左巴士到落巴士既時候，戴小姐同司機叔叔有幾句言語上既衝突！其實唔太關戴小姐事，因為佢好有禮貌同好客氣咁問叔叔野，但叔叔就「得返」戴小姐.....戴小姐落車後就係我面前爆粗啦！我都係嚇左半跳既，於是我勸佢冷靜d冷靜d~~
戴小姐上順利邨運動場玩戶外攀石既~~一向好動既佢，我覺呢d活動都真係幾切合度佢個性，總之我覺得呢個運動同佢係好match既！去到攀石場，佢一大班fd已經係度，循例都介紹下既，但就講明我呢個係fd唔係男朋友囉，even講，都無人信啦~~我呢款style又點襯得起咁高貴既戴小姐先？我好hea咁睇住戴小姐攀石，唔知因為乜野原因，戴小姐今日係狀態大勇喎~~我話佢心有所思，唔專心攀，所以先會咁~~無論如何啦~~只要開心，其實好多事情只要隨遇而安就ok既，呢句係我覺得戴小姐係現階段好需要既一樣野~~開心！真係好重要！
hea左差唔多成個鐘，同戴小姐道別之後，攞住阿fd本相簿去廠度搞維修既事。坐緊車途中，女朋友已經call我，問我係邊，Actually~~我今日放假......我無講比我女朋友聽，亦無講比我阿媽知......原因，大家自己估下啦~~我話係個客度囉....唯有係咁講。上到工場，放低d野，之後第三位靚女，好耐無見既Nancy就打電話黎問候我啦，重祝我生日快樂！約食飯添~~係度多謝Nancy咁有心呀~~
放低左D野係工場，去回合返女朋友，就出左尖沙咀。本來想食「萬両」既，咁啱佢地做緊「瀨祭」八點半先完，我個時先六點三，幾時先等到呀？於是走左去附近間「風」到食！食個時都係就就下，因為尋晚嘔完，今日都未復原晒，又唔敢講比女朋友知食生冷野，而且重約左第日同戴小姐同余小姐決戰「haagan-daz」既雪糕buffet喎！唔敢食太多，亦都見少飽就收手啦~~女朋友請我食，都ok啦，跟著就返屋企！返到去，三個仔同我唱下生日歌，睇左陣電視，就打道回府啦~~
今個生日都過得好滿足既~~見到咁多人，做到咁多野，重送左份小小既生日禮物比自己添！真係非常多謝老闆，竟然係呢個普通忙既時間都重批準我放假，可以令我生日呢日可以hea一下~~我真係多謝佢。
生日完左，之後重可以玩乜野？又可以玩得出d咩花樣？請留意下回：
莫伯廿九歲生日的前中後—後篇：捨命陪君子/淑女
2009年5月11日星期一
莫伯廿九歲生日的前中後--前篇：嘔住過生日
莫伯廿九歲生日的前中後--前篇：嘔住過生日
莫伯，不經不覺，又行近三十歲一年了。回望一年，莫伯除了離開左「大中華」之外，還走左去做影樓助理。人工比之前少一半，雖然好多人聽左唔係好信，但跟手好多人會話都係莫伯鐘意既野，無乜所謂啦~~我都會諗下，其實大家係咪真係咁諗呢？會唔會係背後笑莫伯戇居呢？我唔知，亦無必要知，我自己知道自己做緊乜就得嗱！
五月六日，生日前一日，係影樓度過，因為有個初級班畢業既exhibition，所以要乖乖地咁係公司度過。完左個exhibition之後，散得既都散嫁啦，但知道有個今日畢業既同學仔呢日生日，所以阿Patrick同Terry夾埋d同學仔一齊買個蛋糕返黎賀下個同學仔。
Patrick攞個蛋糕出黎，同學仔唱生日歌，到臨切蛋糕既時候，Terry話我聽日就生日，順便叫埋我一齊切蛋糕~~我係有d打個突，而且係唔好意思既，因為我始終同呢班同學仔唔係熟得好犀利，所以有d唔好意思既！不過，大家都無乜介意，重玩得幾開心咁添！講真，莫伯都好耐無切過生日蛋糕啦！對上一次，斷估都係我中六個年生日去左唱k，個度幾十人一齊玩，都可算係經典嫁嗱！
啪左兩件tiramisu生日蛋糕，再加上之前不自覺咁飲左兩杯超濃既朱古力，加上近黎既持續超夜瞓，個人開始有少少唔舒服！跟著重要開會，傾公司既工作方向，搞下搞下個人真係超級唔舒服~~到左十二點到，阿Terry同Patrick同我講生日快樂，我都無乜反應，因為我已經係死下死下。好不容易開完個會，一諗起之後一日個行程~~立即想死！但又無法子，鬼做自己約好晒人咩？又未做好晒d野，唯有借埋公司部mac book返屋企，第朝一早起身整埋d野佢啦~~
返到屋企，終於都可以好好咁嘔返大量谷住係肚入面既朱古力同tiramisu嘔返出黎啦！嘔完之後個人舒服返好多！但之後重坐係電腦前面睇住巴塞點樣掏汰車路士，睇完都已經係五點既事啦，拿拿臨走去瞓，較好十點個鬧鐘響，第朝重有手尾要跟，就咁就瞓左啦~~
莫伯就係咁過左廿九歲既前一日，究竟佢又點過廿九歲呢日呢？欲知後事如何，請看下回 — 莫伯廿九歲生日的前中後—中篇：四大美人陪我過生日
2009年5月6日星期三
First of MAY
First of MAY
唔知點解，從踏入五月既第一日就開始燥底，又有姨丈到既徵狀。唔知係咪因為又就快大一歲，個腦又係度諗，我呢一年又再度一事無成啦！個腦一不自覺咁諗到呢度，個人就開始燥底！
呢個月開個頭係有D唔順既，首先係五一去睇解放軍昂船洲軍營，阿滿途係我阿爸阿媽面前指責我飲食習慣既野，係巴士度又係我女朋友面前，話我瞓得得三個鐘，半夜三更都重打機云云！呀！呢個朋友都唔知話佢唔話得，定唔識做好！真係搞到我都燥底晒。相反阿ben就醒好多，知道有d乜野要講，乜野唔應該講！好多野大家心照就算，講出口，係人地屋企人面前捅自己個fd有乜為？
臨近生日，心情更差更壞，唔知點解，近年個幾個生日都係過度特別唔開心，可能係我特別在意個時個心情掛，越在意，反而越容易比些少事破壞情緒！唉~~又過一年啦，壓力又要大一年，唔知重要過幾耐，心情先可以順返d呢？
2009年4月29日星期三
外母
外母
係我既印象入面，我聽過好多人唔鐘意外母，原因有好多，我聽過外母嫌女婿唔叻啦，搵錢唔多啦，又或者係傾「禮金」既時候「過份進取」令到好多女婿對外母都恨之入骨！
我雖然未結婚，但我同女朋友一齊左咁耐，我估我叫我女朋友阿媽做外母都不為過。而我嘛，我其實未至於到好唔鐘意，但對佢某處事方式就有所保留啦~~
我覺得外母好多時都好語重深長咁教訓我/我地，但有時講一套，做一套，好難去說服我地去信你個一套！而我女朋友有時向我發脾氣，尤其是近年有關結婚既問題，我就真係多得佢唔少。我明白，我唔係搵得錢多，職業亦唔係d乜野高尚既行頭，但我女朋友近黎成日同我講，阿外母成日同佢講幾擔心我養佢個女唔掂，我都明，愛錫兒女係人之常情，但我都好想佢明白，每次當我花左好多既力氣先可以安撫到佢個女既時候，可能佢既幾句說話，又會令到我女朋友好唔開心，向我責難！要知道佢個女耳仔非常軟，但又好硬頸，易放難收，我多得你唔少！
另外重有一樣好不滿既就係外母問我女朋友，我為乜唔搵份政府工，有萬幾蚊，工作穩定唔好嗎？我花左太多時間去解釋比我女朋友聽點解我要做依家呢份工，一黎呢個係我既興趣，二黎我覺得前景會好！外母同我女朋友個家姐、姐夫都係做政府，又或者因為我識得佢地，知道佢地平時既做野方式同態度，所以我係極其討厭政府工。況且我都有投考過幾次，半份feedback都返過，我諗政府唔收我呢d庸材係有原因既，可能係因為我唔夠庸吧！早幾日先同我女朋友講，如果有份工，要你返一至五，朝九晚六係返去坐監，坐足五日，又pay你萬幾蚊個月，你做唔做？我斷估你個興趣唔會係坐監吧，每個月比萬幾蚊比你，你又會唔會開心呢？我就開心唔出啦！
還有一樣野，因為我應該都無錢買樓結婚嫁啦，可能都要同屋企人一齊住，老實講，我估我全屋企，包括我都好唔想！不過因為我唔爭氣，無法子，侷住一齊住！傾都未傾，講都未講，外母就話女朋友同我阿媽難共處，又話d奶奶點樣同d新抱鬥法個d。我真係就快比人激「恨」死！我都唔知呢d係「忠告」定係「咒詛」，我只知道依家我女朋友係屋企住都唔係真係好開心，好如意！又可以憑乜野去作出以上既判斷？
或者你會覺得，唓！莫伯自己自私自利，自我中心，唔企係人地既角度睇野啫！你或者可以咁講，但識我既人就知道我係個乜野既人，我可以幾咁設身處地咁為人想，甚或乎蝕底比人都可以暗啞底唔出聲，因為我覺得呢d野無乜所謂，無謂計較得太多。但我覺得我成日為人設想，我自己無好好地咁為自己打算過！我已經失去同放棄左好多，還有很多長久追求既事唔應該放棄。
有時覺得無乜人明白我，或者會明白既人自然就會明白，所以我都習慣左好多事都唔會講，尤其是屋企人同女朋友，我唔想解釋太多，因為我係一個點樣既人，佢地應該好清楚！意見唔需要好多，只要你地默默咁撐我，返到黎可以比我一個平平靜靜既安心立命，享受家庭既地方就可以了！
ps. 唔知點解，近排發現自己個blog既「牛腩」人數好似不知不覺間多左。今日唔計自己入黎寫blog個1個visit，竟然有十個其他人黎過我呢個blog。我都唔知去邊到搵呢班人返黎，以我所知既，得幾個人識得黎呢度睇我呢個blog，但留言人數永遠係零！無論如何，都好多謝大家「默默咁撐」呢個blog，我都深感壓力，而且有感自己既寫作能力每下愈況，實在係多得大家錯愛！希望我可以繼續努力，寫多d更有質素既文章係日後同大家分享！！
THANKS EVERYONE!!!
2009年4月28日星期二
想得太多
想得太多
收到你的電話，應該算是開心吧。以為時間計算得準備無誤，怎料就是棋差一著！如果在明天先見一次面，那麼我便可以在下一次再借故約你多見面一次了！但那時那刻的想法是 — 再見多一次？我不想再惹麻煩！我不想找藉口，這個於根本上改變不了現實的舉動，我不想再花心思、再耗心力，這個你永遠不會明白，永遠不會知道的心意，就由得它隨那份禮物送回你的手裡去吧！
連我自己都想不通，為甚麼到了這個時候我會覺得，多一次不如少一次。是我想平伏內心泛起的漣漪，還是這次的苦澀已經足夠我再三回味呢？無論如何，我很清楚記得自己講過，見多幾次，又可以怎樣？
我這麼鎮定，還是有原因的：生日臨近，或許我想為自己泡製一件生日禮物......也說不定！總之，隨機應變吧！/也或許是我想得太多了吧！
2009年4月26日星期日
阿叔與曼聯
阿叔與曼聯
今個星期收到阿叔離開我地既消息，係幾突然，一個陪住我地成長既人就咁就離開左，傷痛難免。見到阿叔老來喪偶，後來越來越孤獨，不禁有d擔心自己去到那個年紀，自己會變成點？我有諗過，如果有得揀你死先，定你老婆死先，我會揀老婆死先......我估我女朋友(應該都係老婆嫁嗱~~如果佢唔係唔要我的話！)咁勞氣，又咁悶，得返佢一個人，佢會好辛苦；我唔同，我比較頂得到悶，一個人四圍逛都得，最緊要既係喪偶咁傷既野，都係由我呢d男人去頂！
講返波，今晚睇左上半場熱刺作客曼聯，曼聯落後二比零完上半場，我個心都沉左一沉，但我聽到兩個唔同台既英文旁述不勝其煩咁remind返d歷史~~早幾年，曼聯作客熱刺，半場落後零比三，下半場曼聯反勝五比三！！我聽完，心諗，唔係掛，個時熱刺比依家呢隊差得遠喎！佢地係咪真係咁有信心呀？熱刺亞Gomes上半場識飛咁嫁喎~~
下半場，睇web版要load，又搞下其他野咁，直到見到十二碼先開始坐定咁睇！先追返一比二，真係有希望搶返一分喎.......點知話口未完，Rooney已經追返二比二，再轉個頭已經狂風掃落葉：五比二！不枉我捧下半場呀！
場波結果就唔多講，反而想講下好多死硬反曼迷既觀點！好多人都話曼聯D球員好叻咩？實力上，比唔上邊隊邊隊啦~~事實上球員既實力，我唔多認同曼聯比其他強隊差好多既，但有一點可以肯定既係主要個隊形打得好！配合做得好，形成左每一個位置上所出現既破綻唔會特別顯著！呢個係教練既能力，而且可以震得著班球員，令佢地每一個人按足戰術部署，發揮出120%既實力！
另外兩點我所想提出既就係有利迷話，就算曼仔今屆可以攞到英超，比利物蒲雙殺，攞呢個冠軍都無意思咁話！我會倒返轉頭咁睇，如果我係費Sir，假若年年都可以攞到英超，我年年比你雙殺又何妨？英超冠軍係睇全季38場波既勝負，唔係2場！呢度唔係歐聯！所以利物蒲等左19年係有原因既，而曼聯係近廿年攞過咁多聯賽冠軍亦唔係撞彩！
有人話曼聯成日比球證偏心，老費成日出口術等等......我唔排除有咁既可能性，大球會一向都係有些少goodwill，我呢樣野唔否認有咁既機會！至於老費出口術，其實呢家野好多人都識，但以費Sir幾十年既江湖地位當然唔係白白得黎既！我相信如果雲加真係留係阿仙奴多十年八載，我相信佢都會有咁既功力！賓尼迪斯嘛？如果佢真係可以留到係利物蒲咁多年的話......我相信佢都得！
2009年4月23日星期四
男兒當入樽
男兒當入樽
我一向唔多睇漫畫，唯獨是細個既時候偶然之下接觸到「入樽」之後就愛上了。這本漫畫除了畫功出色之外，劇情舖排及人物感情的刻劃也相當獨到，風靡一時的確有它的長處。其他野唔講，單是劇情節奏，已經比一代漫畫「龍珠」及「足球小將」流暢得多！它也會一個鏡頭一個動作內加入回憶往事，但速度與程度都拿捏得恰到好處，適可而止，不會一個動作便回憶大半個小時！
早幾個月便知道香港會出返成本書結局之後的真正結局：「10 days after」。前日放工出左信和，一問之下，驚覺已經於上星期四出左，重大部份舖頭已經售罄，行到B1那層，發現是有的但索價$199，而原價是$142！當然唔會買啦！咁又走返過去太子聯合，幾個星期前，係呢度問過有無得訂，佢話無，出左就有得賣。頂丫！$239！？我之前就係因為問過佢地無得訂，所以先無行過去信和問有無得訂，而家標呢個價，咪即係當我係「水魚」！？我當然唔會就範啦，寧願唔買嫁啫！
其實，早在幾年前，我去日本個時，當時應該剛剛出日本版「10 days after」，我係間舖頭到見住成堆dvd係度，重有部電視係度播添~~我個時都竟然無買，依家諗返都有些少後悔。個時我諗因為係日本版，我買左返去，睇都唔會明，只可以係估估下，諗住會有一日係有中文版既，不過估唔到係隔左咁多年啫~~而我前年去大阪個時，係神戶間書局度都見到另一本有湘北幾位主角既做封面既雜誌，我都開過黎睇，發現入面都係得三兩版真係講slam dunk，所以都無買到。所以話呢，有d野錯過左就錯過左，一念之差就係一念之差。不過，無所謂既，要買返呢d東西唔會太困難，錢亦唔會比當時超出好多好多，反正我都知道晒d內容既，有都係還個心願，唔趕既，等下先囉~~
「入樽」入面，各個角色都無乜邊個我特別喜愛，三井呢個射手係比較有好感，而我個人既打法係屬於宮城那種，但實力上卻像安田靖春。安田係一個唔起眼既後備球員，我覺得自己似既原因係因為我打籃球唔係真係咁勁，但安田係球隊入面卻起到一d好特別既作用，亦係一個相當可靠既人，要佢好貫徹咁去執行某些任務，佢一定會做得妥妥當當，而且擁有一股外表看不出來的勇氣。我覺得我係性格上和實力上都好似佢，我沒有像三井那樣的天才，亦沒有宮城那樣的速度，但我總有一個屬於我的位置，而且我會比心機守好自己的本份，雖然不會是主角，也要用心做好每一分，每一秒！
莫伯依家少打籃球了，恐怕連跑都跑不動，但我還是很懷念預科時候，一班打籃球的伴！因為跟他們打是最棒的！實力上我們不是一等一的，但防守時的相互補位，進攻時不斷走位接應，做單擋傳空位，令我們縱使身高往往陷於劣勢，也不是能夠輕易地被擊敗！我們打的是整體戰，不需要太多的單打獨鬥，這本身就不是我最擅長的打法，我本身缺點就很多，沒有隊友的互補，在球場上就是閒人一個！現在球場上，太多英雄主義的球員了，彷彿球就是自己一個人打，完全沒有團隊精神可言，自我為中心！所以在其他地方，很少球伴可以讓我打得快樂！大家睇得太多NBA了，我倒喜歡看歐洲的籃球，團隊籃球才是力量！才能體驗到團體運動的意義！這次談到這裡，下次有機會再談！
PS. 在前晚回家的途上，收到一個電話......少少高興吧！算是一個少少失落中的一個安慰了吧，儘管最主要的目的不會是我最渴望的那樣！而且......原來我在你的心目中已經夠資格與女友同居了！哈哈！我也蠻開心的~~~你這樣抬舉我！！呀！我記得你以前是喜歡流川的，現在還是嗎？還是你的老公就是那個流川了？~~
2009年4月21日星期二
Google ads
Google ads
各位如果有留意，會見到我個blog度多左幾個ad位，係因為遇著金融海嘯，經濟低迷，為左要開源，所以係個blog度加左Google ad，希望可以提高一下收入，幫補一下！
本來都唔記得左有呢一樣野嫁，係早兩日係阿BEN個BLOG度見到佢有，我先諗起，係喎，我都知嫁喎，我之前都有諗過要加個Google ad嫁喎，又有大個例子係度，於是乎就去申請啦！真係話都無咁快呀，廿四小時都唔使就批左，重教晒你點用，點ADD，但係我比較豬，我都係search yahoo冷知識先識搞入個blogger入面，前後都唔使十分鐘就ok，都幾方便！
開個Google ads其實好容易，但暫時YAHOO個邊就唔可以加到Google ads啦，因為始終唔係同一個機構嘛~~如果大家想知點加入Google ads的話，可以聯絡我，再同大家分享下！
希望大家有時間、無聊又或者想幫補下小弟的話，請閒黎無事，幫手CLICK下D AD，小弟將會十分感激！謝謝各位！！
2009年4月19日星期日
Out爆的我
Out爆的我
尋日同滿途，我阿媽同女朋友係pizza黑食午飯，呢個組合幾咁特別~~咁我之前係公司做緊野個時，睇到「娃娃舜」係youtube條片，原來呢期呢位人兄咁紅既，咁我食飯個時就同佢地講啦，知唔知邊個「娃娃看天下」？滿途話佢知~~重話上次同阿秋佢地食飯個時咪講過囉.......個時佢重以為我知添，原來到今日先知我唔知；ok咁都算啦，連我女朋友呢個生於「石器時代」(我覺得)既人，唔係好問世事既人都知，重答到口；點知跟著我阿媽都答到口話，哦~~~我知，近排無端端搵返出黎講那個丫嘛~~~吓！吓！吓！？咁我咪係四個人之中最遲知那個！？
我跟著就講左句：咁我咪好out！？我係最遲知個個，重要連我阿媽都知添~~
我諗我真係out爆囉~~
我唔太鐘意post d「騎呢」野出黎，我貼返個正版啦~~
我今日沖涼個時，諗下個時都巿閒情那個時候我做緊乜野？我諗返我個時原來返緊「東仔」，簡唔中我係茶會室食飯個時，都有睇過呢個環節。我個時......唔係，應該講到左今時今日都對呢d節目好反感！
如果係要發掘新人拍戲，可以透過訓練班；要識唱歌既人，可以透過新秀；唔該唔要d唔pro既人去做d pro既野，要以佢地既出醜去娛樂大眾，呢d係十分無良既事！亦對做緊呢樣專業既人唔尊重！我成日覺得呢d才藝表演同「殘酷一星」一樣，大家想睇既唔係別人既才華，而當中既樂趣就係透過對別人既取笑而得黎，咁成個社會以呢d事為樂，個社會只會越來越低俗。參加既人本以為自己有能力，倒頭來被人奚落取笑，對呢班人又未免太過殘酷。甚麼「獎門人」呀，「魔女廠房」呀，「殘酷一星」呀，呢d節目我都無乜點睇過，好笑咩？或者係，但因為別人出醜而笑得出，我就真係不敢苟同！或者係我保守啦，又或者我古板啦！總覺得睇呢d節目與我地由細到大所學，要追求善與美既理念背道而馳咁。其實追求快樂，可以有很多方面，許多層次，要透過取笑別人黎得到既歡樂，我覺得連貓貓狗狗因為可以吃得飽而得到的快樂都不如！我們作為人，成日覺得自己係萬物之靈，要是可以不愁衣食的話，要追求快樂，就應該有更高的一個層次。要做些甚麼？其實因人而異，如其在家中閒著看些無無謂謂的節目，不如做下善事，幫下人，或者豐富下自己有用的知識，充實下自己，那不是更有意義吧？
或者我咁講會得罪好多人，但覺得自己既想法無錯！對我自己認為對既事，我係絲毫都唔會退縮既！呢個就係我既人生態度！呢個就係我！！
2009年4月16日星期四
從99到100%
從99%到100%
上星期五，同阿ben，滿途，秋姐同阿蘇打邊爐，透露左幫個fd整個本相簿可以話到左99%完成度，差好少好少，阿蘇就話，通常download既野，最後個1%往往係等得最耐，去極都去唔到咁，jam住唔郁，有時重等得耐過之前個99%，我重加多句話，有時download完，重要從新check一次d data添~~都可以更耐~~
星期日，拜山個陣，做緊法事個時，我同堂妹出左去hea，傾開計，話本相簿都終於去到最後階段，搞定佢，送左出去，就算係「恩斷義絕」啦！堂妹笑笑口咁「得」左我一句，係你自己以為係咋？~~ 我無出到聲~~
今日晏左返屋企，一黎又要開始忙第二次exhibition既野之外，二黎係今日正正式式完左本相簿，重upload去廠造，了左件心事！足足個半月有多既時間，係我咁多年黎認真工作排行榜上面肯定係頭十名之內既事！
越唔緊，又彷似係勁緊張；好似好緊，但其實又無乜野咁，咁究竟係點呢？由99%去到100%，老實講，我今日都只係用左個零鐘去完成，之前個99%既心機，同精神花左唔知有幾多，不過我覺得這些東西還是值得的，起碼我學會了些東西，不論是技術上，還是思想上。
有些東西其實無必要一定要放低(尤其是回憶)，只要知道自己站在甚麼位置？在做甚麼？將要怎麼樣？其實已經很足夠。100%的完成度很滿足，成品出黎既效果亦令人期待，不過無論如何，希望呢份禮物能夠帶著我衷心的祝福，送到 的手上就好了！
ps. 唔知印刷個邊會造成點呢？這個還是有少許擔心的說~~
2009年4月13日星期一
拜山。之外
拜山。之外
呢個復活節，四日有三日返左鄉下肇慶拜山，呢個假期又就咁又無左，想好好咁休息下，唔知又要等到幾時？
我地要拜山，係真係要行山路上山個種，無石屎路，只有佈滿泥既不明顯的一級級路，無扶手，乜都無，要好小心翼翼咁行先得，總之唔似香港拜山個種，似係大家真係去遠足咁上下個d！大家唔係咁易明白。而今年除左拜山之外，重有特備節目，就係超渡d過左身既親人，一黎可以幫佢地早登極樂，亦可以為我地d後人積下德既。
而今次拜山就真係出左d事啦，話說我地阿太爺個墓，比人惡意破壞左其中一邊既石牆！我地去到睇到，個心都唔舒服，邊可以咁嫁，有事咪慢慢講囉，唔使搞到d先人丫嘛。而今次已經唔係第一次，已經係第四次嫁啦，我地都已經忍左佢地嫁啦！第一次係個墓碑上面鑿走左個字，第二次係墓前既一對手球咁大既石頭柱頭，其中一邊成個無左，第三次係其中一邊既一棵小柏樹唔見左，今次就成邊石牆碎左！你話幾過份呢！
我本來都唔係信得好厲害嫁，但咁樣搞法，唔多唔少都係有d心理壓力，唯有樣樣事都小心啦！而據聞搞事個家人係d窮人黎嫁，而佢地又近年先葬係度，佢地要自己好風水，於是就鑿我地祖先之說~~據我地一個幫我地安排呢d事既叔父講，鑿人祖先山墓呢d野損人不利己，搞左都會折福嫁，但首先就係影響我地呢邊d子孫，而按照位置黎講，阿太爺墓受損既位置係排行第四既，而我阿爺就係排行第四啦，即係話，今次食到應既就係我阿爺呢家人啦~~
事件已經交左比人跟嫁啦，希望唔會有係有d不愉快事件發生啦，而咁啱今次超渡先人既積福積德，希望都可以用黎擋一擋呢單野啦！
海嘯入侵
除左拜山之外，都有見到我個堂妹同個玩左好多年既堂弟既！估唔到金融海嘯既衝擊會去到佢個邊，連佢都要「待崗」，即係公司唔炒你，只要你每日都返到公司報個到就走得，每個月都會幫你供社保，重有五百月薪添！但其實呢個數，係人都知唔夠使啦，應付基本生活都唔多夠，堂弟雖然無話d乜野，但佢又可以講d乜野丫？我係佢個眼神到睇到佢都有d無奈，有d惆悵。
港女症
同堂弟傾開計，佢地都跟到香港d電視節目好足下，就連「港男港女」既電視節目佢地都有睇過，佢就話連係肇慶，好多女仔都有港女病，搵女朋友都唔容易，港女有既問題，佢地個邊既女仔都有唔少，連佢都慨嘆，個社會係咪好唔正常，大家都想錢，想到瘋了，尤其是大陸「一孩政策」行左成三十幾年，小朋友自我中心既問題更嚴重，亦令情況變得更惡劣。
信與不信
堂弟其實就係識得搞風水命理個叔父個仔，我其實有忍唔住問過佢，其實佢信唔信佢阿爸講既野？佢就話，佢阿爸批外人就真係會準既，但批我堂弟佢就麻麻地準，佢都有d認命咁話，有時命運既野食幾多著幾多，整定，不由人去決定既！對於我呢個半信既人黎講，到呢一刻我都只係相信人可以掌握到部份，但點樣都好，都要努力先可以成功！只要時時刻刻都準備得最好，不放棄，做到問心無愧，機會終會有一日落到自己面前！呢個就係我依然生存係信與不信之間既原因，亦只有繼續堅持呢個信念，我相信人生存係世上先有意義，因為只有更努力先可以掌握到更多！減少件事可以變差既機會，咁成功既機會就自然可以提高到啦~~
2009年4月12日星期日
Skater Boy
Skater Boy
之前其實post過link，依家post返個mtv，雖然畫質差d，但都可以睇到d既.......
早幾日聽返首歌，睇返歌詞先知道歌既內容。估佢唔到咁rock既歌係有咁深既意思係裡面，大家可以睇返以下呢個純歌詞版：
Too BAD that you couldn't see
See the man that boy could be
There is more than meets the eye
I See the soul that is inside........
寧欺白鬚翁，莫欺少年窮
一個好男人，唔係睇佢十來廿歲有幾成功，有幾多成就，而係佢有無上進心，有無潛能，呢首歌道盡呢一切！依家好多香港女仔要d男友有乜有乜，唔似得以前阿媽既年代，要揀既都揀個窮得黎勤勤力力既男人，因為阿媽個輩人肯付出，同個好男人共患難。依家呢個貪婪既即食年代，重有幾多女仔肯比機會d有上進心，但未搵到好多錢既男仔丫？無付出，何來收獲？係「港女」聲大夾惡咁指責「電車男」不濟既時候，請「港女」撫心自問，自己憑乜野？憑姿色？定智識？還是廣闊既胸襟(香港大部份女仔都無乜嫁啦~)和眼界？
之前，阿堂妹同阿五嬸話叫堂妹個奶奶介紹「好男仔」比阿表妹識，後來有一次堂妹過黎個時講起單野有乜下文，堂妹話佢地都想介紹個係有d錢，如果個生活環境同表妹差唔多就不如算啦~~我話佢奶奶都有頭有面，佢介紹得既都有咁上下嫁？堂妹就話唔一定嫁，咁我就咁講過：一個男仔好唔好係在乎佢有無能力同上進心，同有幾鐘意個女仔，試問一個廿三、四歲又無家底既男仔可以做到d乜野？依家呢個年紀無乜成就真係「理所當然」(最少我咁認為！)，最緊要個男仔人品好唔好啫，夾唔夾到表妹！呢個先係我既concern，如果係好人既，我真係唔怕佢窮！講完之後，堂妹語塞，jam左無講野，我唔知佢係唔想答我與我一般見識定乜野？但我覺得我咁樣諗並無乜野錯囉！唔知大家又係唔係咁諗呢？~~
ps. 話時話，我記得以前聽到d女仔講話鐘意男仔d乜野，間唔中都聽到話鐘意d有上進心既男仔嫁......不過，依家我已經聽唔到囉，依家最常聽到既都係嫁個有錢人囉.......呢個社會係咪出左個大問題呢？真係要好好探討下........莫伯依家好似都係無乜上進心，不過，曾幾何時......我依稀記得有人咁樣讚個莫伯.......但係邊個就唔記得囉.......會係邊個呢？
2009年4月10日星期五
世界上的另一個。我 @Life Project - Stone。石
世界上的另一個。我 @Life Project - Stone。石
3月29號同4月5號，公司搞左個exhibition，主題係圍繞住「Life」呢樣野，而今次既題目係石頭。本黎我諗左好耐好耐都未諗到點影，但係有一次去灣仔同「珠光寶氣」既eva食飯個時，講起我中學個時學chem既野，於是就諗到要點樣影石頭啦！最終就影左上面個幅相出黎，係今次既Life Project個度展出。
咁究竟當時講個d乜野咁化學(chemistry)，令我諗到個構思去影呢？到左今日，我終於係網到搵到呢個名稱：不對稱合成(詳情請按我) 。
我點會聽過有關既野呢？就要講返起我中七補chem個時，名師K.Kwong所講既一番說話......
個話題係講開d solution溝完之後既化學作用，變成左一d鏡像既物體，即係個d structure一樣，但互相係鏡像既物質。跟著佢就話啦，佢係一個基督徒，作為一個科學既人，又點會相信呢個世界有神既存在既呢？佢就講返話呢個世界係由一連串既爆炸之後而形成既！(內容大約啦，係咁上下)咁係呢d爆炸之後，就產生左好多物質，而物質既鏡象同時咁產生左出黎，如果呢兩個鏡象同時存在的話，就會因為互相抵銷而唔存在，但係奇怪既事情發生左，係爆炸後既同一時間，所有既鏡象都同時間消失左，剩低落黎既物質就係咁發展，形成左今時今日既宇宙萬物，咁究竟係d乜野令到所有鏡像同時消失呢？又係d乜野擁有咁強大既能力呢？佢就話如果無神既話，又係d乜野東西會咁樣做？因此佢就相信呢個世界有神既存在.......(去補習，就係補左呢d野返黎，大家知補習點解咁搵到食啦？如果我個時記得既係其他野，我會唔會好叻呢？)
就係呢個concept令我諗到點影呢幅相！
我係展覽講解既，除左上面一d內容之外，還有以下呢d......在此不仿同無黎到參觀既朋友分享下：呢幅相，係呢個concept之下，我就利用左兩塊鏡去反射返塊石頭既唔同既面出黎，總共四個形象，塊石頭係特別揀過，四個唔同既面，無論形狀、質感同顏色都各有不同，其實就好似我地人咁，係唔到既地方，有唔同既身份，有唔同既態度，有唔同既面貌一樣！
除此之外，人生係世上，係無完完全全既另一個我，如果要搵返佢，唯有係鏡裡面先可以搵到一個一模一樣既我，因為鏡入面照出黎既一定係我，佢完完全全咁反映出我自己既樣貌，我生暗瘡，鏡入面既我都有暗瘡；我舉起一隻手，佢都會舉起一隻手。問題係，當我舉起我右手既時候，鏡入面既我係舉起左手既，鏡入面既我，做既野係一樣，但同我地既方向卻係剛剛相反既，咁鏡入面既我係同我「一樣」既同時，亦同時與我「不一樣」！咁......鏡入面那個，重係唔係我黎既呢？呢樣野值得大家好好咁去諗下！
係咪好似好深咁呢？其實都係想比大家多d想像既空間啫。相，我並唔覺得自己影得靚，只不過個題同幅相好match，帶出到個主題同相之間既關係。希望今次呢篇野唔會悶親各位，亦希望各位繼續支持，下一個topic已經進行得如火如荼，希望下次可以係展覽場地見到大家。謝謝！
訂閱：
文章 (Atom)
文章
