新春廣州之行—人物篇

新春廣州之行—人物篇

講完事，就講下人。之前提過堂妹同佢表妹(為方便計，以下簡稱表妹)，我地呢十年八年既新年見到就雞啄唔斷，乜野都講，次次傾通霄，屋企人唔出黎阻止都唔停！到左近幾年，我堂妹同我堂妹夫一齊之後，年年新年都去旅行，變左我地少左傾計，但感情仍然好好！

今年返去，我堂妹都已經結左婚都年幾，今年重係第一年親手派利是比我，我無所謂嫁，有利是收喎，重好開心添！往年都無乜咁留意，今年有些少改變，發覺我堂妹對佢老公好好，以前唔係唔好，不過我可以以「全情投入」咁去形容。我堂妹既愛情閱歷比我多好多，佢接觸既人同工作既關係，好多假假真真既野，迫佢去妥協、迫佢去接受，好彩近一年左右，佢個工作環境開始有所改變，佢都搵到一個真正適合佢既工作，可以充份發揮自己既能力，我覺得佢天生都係好有表演欲，同表演天份既人，依家如魚得水既工作亦令佢係生活上更充實。阿堂妹既感情道路從來都無出現過一平坦途，我咁膽咁講，依家堂妹夫當年既出現，我知佢對我堂妹付出過唔少，亦感動到堂妹開始明白，乜野先係佢想要既？我見到佢咁幸福，我都真係好安慰！

至於表妹呢？呢個人，我可能比佢更明白佢自己既一個人，好多原因令我摸通晒佢d思想行為模式，但有d野，佢唔講，我就真係估唔到嗱！例如d乜呢？例如分左手既男朋友，隔左咁耐，都重可以放張相係銀包到既？我真係唔係親眼見，我都唔信，但同時我又好明白，我同佢都係同月同日生日既人太重感情，要「摃得起、放得低」，除非我地本身就不想摃起，否則要放低，根本無可能！！佢話唔得閒，費時攞出黎喎，因為太熟既關係，我都唔好意思唔踢爆佢咁話，我地呢類人，如果真係咁討厭，我地唔會忍得到唔攞佢出黎「碎屍萬段」既，你呃得到自己都呃唔到我啦，佢笑左一笑，跟著就無出聲！我對d朋友真係丁點都唔會留口/手，一定會講到出面，要佢一點要明，如果唔係做朋友有乜意思？我唔知佢明幾多，又或者佢都唔想去面對，但以佢咁天真無邪，外表咁單純同遲鈍的話，要佢重新振作，真係有一定程度既困難，對佢.......真係有d擔心！

講開又講，咁堂妹阿媽同阿爸，我叫佢地造五叔五嬸，對我都幾好既，都係同我傾到下計既親戚黎既，咁啱講起我結婚既野，佢地就同我講返我阿媽阿爸同佢地傾計既時候係點諗既，其實我同阿媽阿爸都無好好咁坐低詳詳細細咁傾過，今日反而由五叔五嬸口中講返出黎，我反而充滿疑惑，因為同我係佢地口中講既同我與阿媽阿爸相處所get到既出入好大、落差很遠，搞到我都唔知應該點樣做好？有時覺得父母同自己，好多野反而由另一個人既口中得悉返d消息，係幾失敗既，而我就更加連佢地幾時生日都無記入腦，就更加係失敗中既失敗嗱！或者佢地都知我諗唔到，所以唔出聲，或者唔知點同我講，所以無傾到，點都好，若果有咁既契機的話，好好咁傾下都係有咁既需要既，或者等我ready好d啦！呢個日子希望唔好太遠啦！