再見2008

再見2008

2008年去到最後一日，大家見到呢篇blog既時候，我都唔知自己將會係邊，因為呢篇野係因為時間關係，已經預先寫好左嫁嗱！

我成日都話，成日都唔明，點解一年未過，個個電視台都搞回顧，一年未完，重有大把事會發生，齌係呢個十二月都發生好多事啦！情況要來個急轉直下，何等容易！呢個月，對我黎講都係咁上下，無事無干，又一個月。但總括今年，尤其是年尾，心情同情緒都出現咁大個人以黎最大既起伏，唔知咁樣係好定係壞啦，但個人就幾難過。雖然事業上轉左新環境，經濟亦出現過問題，但我始終覺得我走啱個方向，成功從來都唔係輕而易舉既事，只要我努力，我諗我終有一日可以成功既！

今年除左轉工轉環境係一件值得高興既事之外，我個人就好開心可以係十一月既時候搵返一班小學同學出黎聚一聚嗱！呢件亦係我近年黎玩得最開心既一晩！直頭可以放係我近年既精華片段入面呀！或者一班一齊經歴過青過唔青既青蔥歲月既同學仔，耐無見，再聚頭，好多好多的話題，好多好多的回憶令我再諗返起好多好開心既事。我成日覺得自己太過眷戀住小學既日子，造成面對艱難既時候，發生逃避既情況！我成日都怪自己小學後就一事無成，每一次遇到困難都望返自認為最輝煌既小學時代，這樣是我最討厭自己既一樣野！人唔能夠成日回望，過去係歴史，將來先係依家應該好好準備既課題。不過，經過呢次，可以一次過搵返一班朋友的確係一件值得高興既，而且最少再一次肯定自己係有一個存在既意義同價值啦！

來年展望方面，其實都係想做好現時既工作啦！因為來年係工作上既挑戰都相當大，一方面要面對金融海嘯既沖衝，另一方面要積極地提升自己既實力，盡快令自己可以獨當一面。此外，要積極搵錢啦，因為結婚最需要既係錢，我最無既亦都係錢，要比好生活老婆，錢真係唔可以少，而且老爸到左退休左右既年紀，加上威尼B人又唔同佢玩啦，佢都無乜野好搞，周圍搵工，但都無乜聲氣，而我咁大個人都好應該負返起供養父母既重責啦，我屋企人咁錫我，我一定一定要好好咁報答返佢地！

最後，都要許下新年願望啦！其實我一向都無做呢樣野，因為我一向都覺得新年過左，日子咪又係咁過~~野依然要做~~過去個幾年都係咁樣係無希望既環境下諗野既方向，其實積極D咁睇，有希望，先有目標，有目標先有動力既！我覺得我今年黎到年尾呢個階段，真係對生活有些少正面既改變，呢個又一件好事！講返願望先，咁呢個新年願望就係希望「大小姐」佢可以盡快平復返個心情啦！因為啱啱「撞傷撞瘀」左，我估佢今次都要花點時間先可以回復過黎，希望佢可以盡快解得開個結啦！另一件，就係希望可以搵返張小姐呢個小學同學啦，我發現任何緣份都無得強求，而我又差少少搞到返唔到轉頭，所以希望我之前既語無倫次唔好影響到搵返呢個好朋友既機會啦！最後就係，我身邊都好多好多同學啊，朋友啊，同事啊將會係黎緊呢一、兩年結婚，希望佢地個個都有個幸福美滿既婚姻啦！尤其是......阿「uog」啦，畢竟......都係唔好多講啦！唉！你睇下，如果要開名幾麻煩(詳細請按我)。我自己嘛，我無諗過為自己許願，因為我自己既野，從來都係掌握係我自己既手裡面，我要達到D乜野目標，就要憑自己既努力，一步一步咁去達成！「謀事在人、成事在天」要先有人去謀事，個天先會幫忙，所以先造好自己，成功與否，就交比個天去決定，呢個先係人生既真態度，亦係我既信念。

2008年個blog既運作，總算ok，但我希望來年可以有更大既進步，不論係質同量方面都可以更上一層樓！並且希望大家可以繼續支持。另外，希望各位係新一年，如欲留言的話，請在blogspot呢邊留吧！個感覺係實在好多，亦希望大家多D留言，多D提點我，要知道你地既意見係非常非常非常之咁寶貴嫁！

最後係呢度祝大家新年快樂！新既一年都可以心想事成吧！

餘震

餘震


近日好鐘意好鐘意唱呢首歌，今日先嗒真d歌詞，原來……好應……好應棍……


到底一刻也算是緣份 仍然願靠近
誰又理矇矓夜裡 天沉地暗... ...

你的吻 像龍捲風吹過 怎可對抗這吸引
身貼身 如海嘯沖擊我 使我向下沉
再走近 是我完全難自禁
就算知道實在太愚笨 到底一刻也算是緣份 天地淪陷
餘震是浸沒痛苦中 一絲興奮

餘震是靠在你掌心 永遠被困

另一個「女神」

另一個「女神」

近呢幾日，日本av界失去左一個女神。今日我就講下另一個我心目中既女神，睇下片先

福原愛，一個日本乒乓女孩，三歲開始打乒乓球，十五歲就參加雅典奧運，今年就以十九歲之齡成為日本乒乓球隊主將，衝擊2008北京奧運。幾年前，就有朋友係我面前提起過佢，個時無留意，後來睇下呢個妹妹仔又的確幾得意，後來睇過一篇文章，話福原愛既球風明快，而且成日笑，比起我們國家隊既幾個金牌球手，添左幾分親切感，而且佢重要識中文，好有鄰家女孩既感覺。

福原愛，好好波，老實就唔覺，亦唔見得佢會成為世界冠軍，但個種落到場就拼盡既精神！真係好吸引，唔怪得日本新晉網球手錦織圭都被佢吸引，繼而發展為情侶啦~~~真係金童玉女，希望佢地繼續好好戀愛啦，佢地背負住成個大和民族既運動成績，好大壓力嫁！之前福原愛出國比完賽之後，返到成田機場就要向傳媒鞠躬話自己打得唔好，表示拍拖唔會影響到比賽成績咁話！你話幾大壓力、幾慘呢~~

我覺得福原愛既乒壇代表作—"2008年世界乒乓球團體賽"

好鐘意日本人比賽既態度，嬴又喊一餐，輸又喊一餐，個種精神同感覺話比你聽，佢地好投入個比賽，而係對比賽好重視！每次都全力以赴，呢種精神好值得學習！

福原愛都幾多廣告嫁喎~~

希望呢位乒壇奇人，可以有朝一日，闖出一片天啦！

想......想不開

想......想不開


不知道是甚麼原因，或許是我太單純，過了這麼多年，還是懷念著......
還念著一件事......
我的情緒和心情依然被牽動著，既逃不掉，也躲不開，
想了很久，或許只有這首歌可以道出我的心情... ...

從來未發生


或許是我愚昧，或許這個才是實情，到這幾年，這首歌才令我明白了些甚麼... ...

沒有人


過了一陣子，一切如常，我繼續自己生活，但偶爾泛起漣漪，又令我再一次跌入迷茫！

要到甚麼時候，我才不再想？
要到甚麼時候，我才放得下？
要到甚麼時候，我才想得開？

耿耿於懷

真的。假的。不得了

真的。假的。不得了

曾經想過寫blog要給所有人知，但又怕太多相識的人知，因為本身就是個直腸直肚的人，在blog內表達的，寫的，如非自己真正的感受，記下來又有何意義？但如在blog內批評公司、同事、朋友，又會否破壞了彼此的關係呢？要知道這個世界成熟而又心胸廣闊的人並不多，最大問題是很多人接受不了自己被人認為做得不足的地方！這才是一個問題。我的意思不是我對現在身邊的人或事有任何不滿，這點我要先澄清一點！絕對不是！我相信和我很熟的親朋好友都有足夠的能力去包容及接受我的「意見」，這個我倒是不擔心的。

真正令人擔心的是不識我，或者和我不熟的人。我在這裡所說的一字一句都不單單是代表自己，如果只是代表自己的話倒是容易得多，別人會認為我是代表我公司、我家庭，因為這些東西令人誤會或與小人交惡，而陷我公司、家庭於不義的話，我將會是如何的不好意思呢？正所謂「禍不及妻兒」，但人總愛把事情鬧大，不見紅也不罷休的嗜血心態，令我也不太敢放心盡情地表達自己！

和一個Patrick討論這個問題，因為這個原因，他也少更新了blog，因為怕blog內對朋友的評論會破壞大家關係。我就親身經歷過一次，那時在個人網站上寫了女朋友的不是，由於她是個「石器時代」的人，根本不會上網，直到有一次到我家，我給她看了後，她向我興了問罪之師，引起了許多不必要的衝突，所以我發誓以後我再不會讓她去看這個網，連我的「編輯自主」都沒有了，我日後也再不需要這個觀眾了。時至今日，我都沒有告訴她這個blog的存在，懶得解釋，也沒有這個必要！

到現在，我還是有個疑問？當我要發表對對朋友、對家人、對其他人正面意見的時候，我用真實的戶口去發；在發負面意見的時候，我用匿名的戶口去發給一些不相識的人，去發洩我的不滿！那是否很諷刺呢？我身邊的人不可以說真話，對陌生人才可以開懷交心？這是個甚麼世代啊？是不是有甚麼不對了呢？

奇怪奇怪....
........
....

幸與不幸

幸與不幸

http://hk.news.yahoo.com/article/081213/3/9q47.html

過去四年，我一星期有六天都在這個地方走過。如果不是我轉了工，如果不是我當日有工作，那個時間，那個地點，我和女朋友還是會在那兒出現！！


有幸，有不幸

事發時，我剛剛完成在九龍塘的工作，事發後一小時，我還到那兒附近的電腦商場逛，還見到大批人在那兒，就是沒有走過去看個究竟！

幸運是我沒有在那時在那兒出現！
不幸是有人受傷了！
幸運是前去看過究竟的人沒有事！
不幸的是還沒有拘捕到犯案人！


傳統智慧

「執輸行頭慘過敗家」、「八卦」沒有不妥，這是許多人都有的思想，但有否想過這對自己有何益處呢？若果犯案者是故意吸引更多人圍觀，意圖傷害更多的人，後果可能更不堪設想。我媽媽從小就教我，無論發生甚麼意外，都千萬不要去看！這對事、對人都好！


希望傷者們可以沒有後遺之下盡快康復，犯案者能夠早日繩之於法！

結婚......嗎？

結婚......嗎？

星期六，拋低女朋友幫老闆去影佢個朋友婚禮既snapshot。會場係一個教堂，真係富麗堂皇嫁，係呢d地方結婚，肯定令人一世難忘啦！係個婚禮裡面，的確有好多好touching既moment既，唔單止新娘子有喊，就連伴娘同女方家長都有喊，唔知點解，我又諗起以前我有個朋友結婚，另一個朋友做姐妹，飲個時播返d段個時，我個姐妹朋友就無啦啦係我不遠處喊左出黎，我唔知佢係因乜野原因啦，係見到朋友嫁得好掛！

其中一個好特別既環節，因新娘子係小學老師，有一part係佢班學生唱歌送比miss既！嘩！真係好正嫁，尤其是小朋友純真既聲音，真係更加特別，亦都令新娘子再一次流下快樂既眼淚！突然間又湧起左一個念頭，現在的小學生比我個年代醒目咁多，佢地係呢個年紀係個wedding內get到既野又會唔會比我既多呢？呢個問題我覺得幾有趣！

另一個搞笑野，就係當個團契導師分享既時候，請結婚超過五十年既人舉手既時候，咁啱我又要舉起支閃燈，我又唔可以放低手喎，結果就成個教堂既人都望住我嗱，我又尷尬想縮但又唔可以喎！咁個導師就講左句話，佢係攝影個邊既，應該就唔算啦！跟著全場都笑左一陣，我幾咁尷呀！？

到左成個wedding儀式完左，我同老闆坐埋一邊等下，都睇下d相，吹吹水咁！我就話近黎都收到好多人結婚同下年會結婚既消息，而最近我老闆個兩單，都係d大富人家喎！嘩！結婚風風光光，咁個女仔都真係面上貼金啦！不單止係個女仔，連佢屋企都係啦，唔好話我個人膚淺，但我覺得我咁諗都無可厚非，好正常啫！係咪？隨之而黎既感覺，無錯！就係又諗返自己啦！我同女朋友都拍左十隻手指都數唔到既年數啦！我又可以比到d乜野佢呢？我家陣連自己個銀行戶口入面個4位數字都重要苦苦死撐先可以堅持到，你話我又點膽敢去諗結婚呢件事呢？但偏偏呢件事就越黎越緊逼咁，好老實，我感受到我雙肩既壓力越黎越大，呢d壓力唔係來自我女朋友，佢都唔係太緊咁既，但問題係來自己對自己既能力出現在好大既疑問！結婚係責任，係承擔，係無論你點樣死都好，都要死到d野/錢返屋企既壓力呀！我依家真係誠惶誠恐咁過日子，好擔心自己係咪可以比到幸福比我心愛既女人呢？我又會唔會負累到人呢？

愛係表現出黎既，唔係日日講住就得！女人唔好成日以為d男人無講，就唔愛你先得嫁！人地愛唔愛你？唔通你地自己感覺唔到既咩？唔通你地唔識用個心去感受既咩？我有個朋友，我覺得佢好錫老婆，雖然佢唔認，但從佢平日同老婆個時既表現，個種錫老婆既感覺，連其他人都睇得出！以我所知，佢有份人壽保險，個受益人當然係佢老婆啦！而金額就剛剛係佢依家供緊個層樓既價錢！即係乜野呢？即係如果有乜衫長褲短既話，老婆即時可以贖返層樓，唔使驚供唔起層樓，亦即係解決左老婆日後最大既危機！我以前都上過下d保險sales course，其中一個concept我係好buy既，就係一個人既命係無價既，但每個人總有一個經濟價值，如果人唔係度，但有番一筆同佢有相同經濟價值既錢係度，咁傷心就到此為止，唔會演化成為徬徨無助！試想像下屋企人已經無左你，而你重有層樓未供完！你話幾咁「大穫」，幾咁累「街坊」呢！

所以，結婚嘛......唔係唔想，三年前我就同我女朋友講話想同佢結婚嫁啦，但佢就唔想，而且我亦未有經濟基礎；三年後既今日，我就唔係太想啦，唔係因為愛情變質，而係依家比起當時既情況更加不妙！我既經濟基礎比起三年前更加薄弱！我真係唔敢奢求太多野！我唔想累人累物咋！

結婚嗎？...... 三年之後，又三年嗎？

兩首mtv，正呀~~~

兩首mtv，正呀~~~


兩首歌除左都唱得好之外，我覺得兩個MTV都拍得好靚，好有美感，好拍得出首歌既味道，而且Model們都真係好靚，尤其是白玫瑰入面個女主角.....真係.....真係.....都係留番比大家自己睇啦.....

推介最精采既畫面由2分30秒開始，兩個人都真係交足晒戲，可以話係無得挑剔呀！


白玫瑰



裙下之臣



大家唔知有無留意，兩首MTV既導演都係莊少榮，我睇過好多拍得好好睇既MTV都係出自呢個導演嫁，有時間大家不妨留意下丫！

老爸的新寵

老爸的新寵

老爸自從係威尼B人返黎香港之後，都好似無乜細藝咁，係完成左個大阪之旅後，又係電腦展係我推波助瀾之下，買左部佢都應該「恨」左好耐既私人電腦啦~~而且佢呢幾日都無乜野搞底下，就好似時下d年青人咁上網上到廢寢忘餐。我今晚成點先返到屋企，見佢都重上緊網，我臨沖涼時佢先話我知佢都未沖，叫我唔好沖完關熱水爐，比佢咁講一講，我都愕左一愕！因為我之前都未試過佢會遲得過我沖涼~~

我相信此舉已令我覺得我阿媽有些少不滿，而近日我又積極咁推介我老爸開玩rainbow 6呢類遊戲(其實係我想玩啫~~，而我之前叫我老爸買呢部機都有諗過可以用黎打下機嫁！)我怕我老爸會沉迷得太緊要，真係有d擔心！但總好過無細藝既，而且我老爸都好耐好耐無咁relax啦，有d野玩下都會開心d既，因為我老爸係一個非常十分極度勤力既人(我遺傳唔到，唔知點解！)，佢無野搞，唔做野就會食唔安坐唔落個類人，所以佢家陣日日對住部機都好既，好過佢成日愁眉苦面丫，不過千祈唔好激親阿媽先好呀！~~~最緊要唔好成鬼日煩住我幾時沖涼、幾時食飯同幾時瞓覺呀，唔該！！

我老爸既台灣產新歡：ben蕉 s41 個樣都ok型嫁~~~哈哈

週末狂熱

週末狂熱

每逢週末都想在家休息一下，看戲也好，看電視也好，清理混亂的案頭也好，總知是放慢一下生活節奏！但每當到了星期日晚(就像今日一樣)，這個週末還好像是沒有休息得好！

每個星期五及六總是很晚才想睡，因此也很晚才睡，星期六要陪女朋友，八時要回到家吃飯，11時上網，沒完沒了的四處瀏覽後，四時才進睡。又到星期日，十二時醒來，吃個早餐或和家人「飲餐茶」已經是二時多三時，再左逛逛右逛逛，七時回到家吃過飯，11時上網，又再左顧右盼才驚覺已經凌晨三時，又是時候睡了，要應付一個星期的開始了！

這樣庸庸碌碌地一個又一個的星期過去了，還是沒有好好地調整好自己，疲累的不是肉體，而是心靈。連自己也不記得打從何時開始就常常覺得好累，覺得休息得不好、休息得不夠，就算是罕有地睡夠了八個小時的昨天，一覺醒來還是有點力不從心的感覺。為甚麼呢？我不曉得，我只想找個地方去好好地散心一下，日本固然是好，但沒有錢就甚麼也好不了！連長洲也去不了！近半年的生活，看似非常輕鬆的我，實際上卻是非常非常地沉重。

突然好想失蹤一段時間，一星期好，就算是三天也好，不是要放蹤自己，而是要放鬆自己，好好地想未來的路該怎麼走，現在的我該怎麼辦，過去的事該怎麼忘！昨夜錯過了「最終電」而罕有地得到了一個小時，由彩虹步行回竹園，被寒風吹拂了幾下，腦袋好像清醒了不少，也想到了些甚麼似的。寄望這只是個開始，我能夠逐少逐少地拾回那個已經「散落遍地」的自己，重建那個最強的自己！

剛剛看回舊相，才發現原來我也影過鐘樓

16年後第1次—6小時聚會 (後記)

16年後第1次—6小時聚會 (後記)

其實，當我見完d小學同學之後，發覺我並唔係我自己想像中咁差！我起碼重有優點，有人認同我所做過既野！

我有諗過我屋企齊齊整整，感情路上無風無浪，我其實比許許多多的朋友還要幸運，身邊的每一個人都對我很好！所以我堅持要做「好人」係因為我覺得呢d野係要我平時做「好人」既時候同個天換返黎既，一旦我做得唔好，個天就會係我身上攞走呢d咁寶貴既「財產」！我事業發展得唔好，我無怨過人，我只係怨我自己無認認真真咁去努力！個天算對我不薄，一分耕耘換一分收獲，我信只要我再努力一點，我既事業一定會發展起黎既！

16年後第1次—6小時聚會 (part 2)

16年後第1次—6小時聚會 (part 2)

一行人去到棉登徑落車，就立即搵地膽(佢自己話只係黎過幾次)既戴小姐帶路，其實成條街都係酒吧，我就第一次黎呢d地方，我就覺得間間都差唔多，成班人一路行，好快就行到落街尾，因為沿路既吧都係滿滿地咁，於是乎我地就停左係街尾，有d惆悵緊去邊到飲好呢？咁啱街尾呢間吧又有人開門出黎問我地幾位，我地話8位啦，佢就叫我地入去睇下，因為有位既，要坐逼d咁囉！咁阿ben同戴小姐就入左去睇，ok喎！咪入去坐囉！

坐低無耐，野飲都未叫晒就食晒d薯片啦，咁肚餓，咁剛才又唔食野咁離奇既？咁我又一次發揮點菜點最後既「特殊技」，就係阿ben點個支黑啤啱啱放低，而又叫住阿waitress姐姐唔好懶叻咁斟酒既時候，我發現左本menu到居然有樣叫「blow job」既飲品！而且d成份又cream又盛，真係襯到絕呀！重標明$60 each，我同張經理都笑左一大餐！

跟著又開始傾、傾、傾，真係乜野天南地北都講得一餐，一時又講下李仕SIR上堂點樣拉返佢副假牙入個口度，一時又講下我地d班長領袖生，一時又講返班主任唐老師d出事野，總之乜野係小學發生過既野都講，奇怪既係點解有d野，有三兩個人會記得，有d野只有一個人有印象，其他人好似無發生過咁，真係好搞野，好特別，原來小學個時有咁多得意既野發生過，原來小學個時，簡簡單單既生活原來已經可以好精采！講完小學，又講下大家中學生涯的點點滴滴，8個人無人一齊讀同一間中學，所以大家就開始經歷不同既事、遇到不同既人，就咁走過左十六個年頭，今日係呢度又聚返埋一齊，我相信呢d係大家既緣份！

有人同我講過，小學同學比中學同學既感情黎得深厚，因為小學時代大家無機心，上到中學，大家背後可能有好多想法，就算很熟都未必交到心。過左呢晚，我好認同呢點，今晚大家都好開心，我係好強烈好強烈咁感受到既，我相信同我有相同感受既不止得我一個，大家好不單止是享受呢一刻既相聚，更重要的是我們share我們曾經共同擁有既集體回憶！雖然人面早已有所改變，但那種情懷，我相信比畢業那年更加親厚！畢竟我們經歷多了，看膩的、看透的、看化的、早已令我們變得麻木，但那份率真的小學生情懷依然留在大家的心裡面，在這次聚會中再度被喚醒，原來我們曾經過著多麼令人羡慕的純真生活。

快樂既時間過得特別快，又係時候講bye bye，坐坐下坐到都快兩點半，經過6小時不絕既hehe haha，大家都開始累了，於是就埋單散水。出左酒吧，大家都係行返出彌敦道睇下有無通宵小巴。因為譚小姐住元朗，戴小姐同張經理有小巴會經，所以就一架的士落返旺角，而其他人都係坐返的士落弼街，所以就坐另一架車去弼街。去到弼街，我同阿ben一齊等佢地上車先走，等個時發覺自己連聲都沙沙地，唔知係熱氣定講得太多野啦？不過個感覺得就好滿足，因為真係好耐好耐無試過咁開心嗱！咁多位6D班既同學，真係要多謝你地！我相信下次一定會玩得更加開心既！

~完~

四朵花就唔係度貼啦，貼四條草/佬啦！哈哈~~~

16年後第1次—6小時聚會 (part 1)

16年後第1次—6小時聚會 (part 1)


個topic諗過用乜野既，但發現余小姐呢個msn title完全貼晒題，所以就直接借黎用啦！

16年，乜野要16年後再黎一次聚會呢？原來我同小學同學，就咁一別就十六年啦！有部份以前都有聯絡，有見面既，但多得facebook，呢幾個月黎係facebook到不斷咁搵返d小學同學，亦用左差唔多個幾月既時間去安排呢次聚會，雖然到左最後，有d同學仔都係黎唔到，但我相信大家都有野黎唔到，情非得已，總會有下次機會既！

7點幾同阿ben係銅鑼灣做完野，正唔知去邊到逛埋個d時間之際，戴家姐(小學時代已經係咁叫)打黎話firm實幾點，佢剛剛收工，我又咁啱知佢係附近做野，於是就約埋一齊坐地鐵過油麻地！相認之時，發現大家都無乜點變，個樣同小學時代真係一模一樣！到坐地鐵.....唉，年紀大，大家都想搵個位坐過海，所以去到中環先轉車坐過去油麻地。途中比人問候左阿媽一次，因為戴家姐媽咪都識我阿媽，重託戴家姐叫我問候我阿媽喎！咁就真係代我阿媽多謝關心啦！除左咁，重講起翁小姐，講起佢過身既事，大家都有d難過，畢竟都做過兩年同學，而且佢又好好人，好堅強，咁樣就過左身，的確係十分十分之可惜！

到在油麻地，嘩！所有人竟然相繼係八點既時候釋數出現，大家好準時呀！跟著一行人咁行去book定枱既花園酒家打邊爐，雖然係早左半個鐘，但就等到九點先有得食。本來8點半係有張枱既，不過坐電梯門口，比人行出行入，唔好搞啦！好彩係大堂有位坐，有傾有講先可以磨到咁耐咋！上到去打邊爐，一坐低就開始寫野食，但唔知點解就寫在四個烏東，跟著張經理同楊生就唔執輸咁寫在兩個公仔麵！我話，呢d野使唔使咁早食呀？點知到後來，呢個決定原來都無乜錯。

由於有任飲既關係，所以叫左兩jar野，一支竹蔗水，一支酸梅湯。跟著打下打下，吹下水咁，食得都幾快，但就硬係覺得大家都好似無乜點食野咁，但就勁飲野！飲完第一支竹蔗水，叫部長「再來一支」，部長問要乜野，我地話竹蔗水，部長話無竹蔗水喎，得菊花茶咋喎！下？咁我地飲左d乜野呀？點解d味同d色都咁竹蔗水既？而事實上，又真係菊花茶黎嫁喎，大家飲真d，又真係菊花茶喎！但我本身都知佢個支係菊花茶，只係無講比大家知啫，估唔到大家係分唔出竹蔗水同菊花茶喎！

如是者一輪狂風掃一輪落葉，打左一陣，就急不及待咁落公仔麵煮！我真係未試過打邊爐打到中間就開始食麵，跟著戴家姐就發揮大家姐既風範(個人認為)係咁幫我地夾d麵，真係感覺到大家個種熱情呀！彷彿大家一向都無變咁樣！重有d送既蝦，係咁撈上黎，放係到都無人食，重有d生蠔呀，蛽個d就更加食唔落！唔知點解未食夠一輪大家已經呆呆滯滯咁，之唔係d辣椒牛丸囉，食一粒，要飲返兩杯竹蔗水先補得返d辣，大家基本上都係飲飽既，都食唔到d乜野！最後捱下捱下食左幾條菜，已經停晒手係度，重相量下跟著去邊添！

起初都話飲野既，而且以五票屯門、一票元朗、一票九龍同一票青衣咁既居住分佈決定返入屯門飲既，咁我係facebook到約既時候，已經發表左食完之後所有行程都逢陪到底既宣言，屯門咪屯門，我唔會比大家大到既，最多咪出返旺角搭車！~~ 重可以call埋兩個無出黎食飯既同學仔去飲添！但咁啱張經理係席間話住、返工、放工都係屯門，實在太苦悶啦~~~正如某部份天水圍居民一樣：「禾刀好耐妹出過使區囉~~」於是乎都係落老尖飲啦~~~

結賬之時，大家攞晒d大水牛出黎，咁都係等阿ben出左先，之後再計囉！於是乎一行人就咁浩浩蕩蕩咁操上彌敦道好不容易咁震震下既寒風中坐的士去綿登徑，繼續我地呢個下半場既聚會啦~~


待續......

一輪就ko既打邊爐~~~


食完當然要影返張合照

最近一次笑既時候

最近一次笑既時候


上個月有一次同女朋友食飯，我忽然間諗起問佢：「我呢幾年有無笑過呀？(真係好認真！)」

「唔.....(認真咁諗左幾秒) .....無呀！」
「除左去日本囉！」
「係呀！」
「去澳門都有既，我諗，有嬴到錢丫嘛！，做乜我會唔笑既呢？」
「唔知你呢？好似成日褸左成村人咁！」


我其實成日都笑，好多人都見過我成日笑，但係，真係見過我好開心咁笑既人，又有幾多個？

北京之旅~~Day 4

北京之旅~~Day 4

搞下搞下，終於都去到最後一日，呢日要趕埋之前未完成既行程，今日真係超趕！

去完兩個購物點之後，就正式參觀圓明園，呢個曾經比八國聯軍入侵既地方，阿蘇師父話要國民教育既地方，話北京d大學第一堂就係呢度上咁話。

入到圓明園，果然係爛地一塊呀！無乜特別，坐車仔入到去正式遊覽點既入口。嘩！講左咁多日既紅葉，係呢度終於都睇到啦！真係幾靚。跟場地導遊行入去，導遊講解都幾有感情亦好詳細，話左成個花園係點樣比人破壞既！大家一度行一度好開心，其實我就開心唔出，唔知點解，但大伙兒都無乜點聽導遊姐姐講解，四圍走上d遺跡到影相，重好開心添~~我就真係開心唔出去邊囉，係d國恥面前，大家重可以玩得咁開心既？離奇離奇！我以為香港人係咁啫，點知連同團既北方人都係咁，重成日成班係度四圍吐添！甚麼國民教育？點解國民會無乜教育丫？我真係好想知，究竟發生左乜野事？香港都唔好搞乜國情教育啦，教好d人既修養先，佢地自自然然有好既國民教育嫁啦！呢個時候，我突然間有一個念頭，就係如果比八國聯軍入侵呢個係國恥，要我面前既呢班人去搞的話，結果會係點呢？我就諗如果真係要靠呢班人報國仇家恨既話，要監生加個年期比佢，我會講.......還早了三百年！

係圓明園內見到隻白貓，阿導遊姐姐話佢係無人養既，每日有人黎個時，有人比野佢食，就係咁生活，其他地方重有狗添！啊！又係幾奇怪喎，又無人捉走佢既？同隻貓影左好多特寫，而且佢又好乖，企係地，唔會周圍走，又擺下唔同pose咁，幾可愛既！我地差唔多走個時，有其他團既人見到，有個男人監生咁捉住阿白貓要影，結果就嚇走左佢，大佬呀！同你好熟呀？做乜要比你捉住影呀？中國人就係咁，好多野鐘意據為己有，得到少少野就好似好威好得戚咁！

去完圓明園，就去頤和園，呢個頤和園就係當年慈禧住既地方，都幾大嫁，但我對慈禧就無乜特別印象啦，反而有套港產片係由邱淑貞做慈禧既一套三級片，講慈禧的秘密生活，我就好有印象嗱！行行下，因為近湖邊，所以特別凍，咁啱有個人賣粟米喎，我阿媽就拿拿臨買，跟著就成團人個個買黎食。我個支粟米，食食下，睇到個底到有三兩粒係無左既，重有一條好完整下既蟲蟲死左係度添！真係......無野好講，我阿媽已經係第一個揀，都揀到條爛既比我，我真係無野講！

去完頤和園就跟著去食飯，再上去電視塔，其實因為個天氣麻麻地，阿導遊話可以加錢去國家博物館，但好多人，包括阿媽都唔想加錢，所以都係上返電視塔。其實，講真一個國家既博物館既欣賞價值，點都高過一個電視塔多多聲啦，不過，成班師奶阿伯......我可以同佢地計較咩？上到電視塔到，去左露天既觀光層行左一個圈，呢度有寫每個地方既名勝既方向同距離電視塔幾遠，有咁多個地方未去過，有機會真係要去下。落返一層，大家一見有得坐係個cctv主播位既場景到影相就一窩蜂咁影，我都無理佢地，趕快拉住阿媽聽電視塔既導遊講解，實在好多！聽完之後再返去個主播位度影相，都無乜人啫！要坐，其實無乜咁好坐，我有料既坐個真嫁啦，坐個假既又有乜咁值得高興呢？我好唔明白囉！

跟著又去多個係個舊城門「德勝門」城樓既購物點，呢度係賣「皮優」既，我聽過呢家動物有些少邪邪地既，擺出黎損人又不利己，都係睇下聽過就算。反而呢個點外面既禮品，大家就好有興趣啦，尤其是成個旅程中都見到既金色水立方同鳥巢既模型打火機，大家都興高彩烈咁買呀買呀，買到不亦樂乎咁！我同阿媽都係咁睇下就算啦！

睇完之後，就去「按腳」，可以免費按一個鐘既，又可以有熱水浸下腳咁，都應該ok既，點解會係「都應該ok」呢？因為我同阿媽都無按。阿媽唔按係因為身體唔係好受得，而我呢？因為架車黎呢個按腳地既時候，經過北京工人體育場，亦係北京奧運既另一個比賽場地，而我又見咁近，我又見到有路比我偷偷地走去影喎，咁我當然唔浸，竄出去影相啦~~我襯無人留意，我就好快咁走左出去，沿目標方向行過去，途中見到有個北京阿伯係度練門球喎，就影左幾張，同佢傾左幾句啦，由於時間好緊迫，所以匆匆祝阿伯「身體健康！」後就趕過去北京工人體育場了。果然，這裡的人很少，可以係咁影，又係匆匆咁影左幾張，跟著就拿拿聲趕返去，畢竟係竄出黎，遲左返去就唔好啦！返到去，成村人都未按完出黎，去個廁所，返上車走左陣，班團友就出番黎啦！亦係咁比我順利咁過左骨！哈哈！

按完腳，終於都去食呢次北京之旅既最後一餐飯啦！食左d乜？都係個d啦！唔記得！食完之後，有團友話每人夾十蚊人民幣比北京導遊同師機叔叔喎，有d人係唔想比既，咁我都無乜所謂既，人地咁辛苦，每人夾十蚊又唔係好多，但我知有d人係比得有d唔順氣既......但最終全部人都有比既！

食完飯，咁導遊又收左d tips之後，就送左個去世貿天階既地方去睇野，因為個度有個係拉斯維家斯先有既天幕睇，據導遊說，呢個天幕既科技同金錢既投資都好巨型嫁！無返咁上下既經濟實力都做唔到出黎嫁，咁就去睇下囉！去到，成班團友都係企係出面睇，我就同阿媽行入去望上去，個感覺真係好正嫁！係幾好睇既！之後大部份人都返左部車附近，而導遊話有個scene係出名既「飛火流星」，我就企係個天幕邊度睇，到真係有得睇個時，d團友先行返過黎，我心諗大家咁趕住走就唔好黎旅行啦，如果大家夠齊心，要睇完先走，導遊領隊師機都唔會有投訴嫁！點知都未睇完啫，全部人都已經上返晒架車，等我好不情不願咁依依不捨咁行返上車，當我係車尾度睇返去個天幕個度既時候，都重未做完，重好鬼精采添，而且我覺得呢一幕「飛火流星」係好有心做出黎既，而且係有d眾神創世既宏偉景像同場境添！可惜......可惜無辦法睇完佢，令呢個旅程增添多一個遺憾！

旅遊車返到酒店，個個都返去準備第日要返香港，而我就同阿媽講出去行，而呢次出去行，重好特別，彷如呢個先係一個真正既開始......

待續......

圓明園內的貓，竟然在笑....... ^___^

北京工人體育場，奧運足球比賽場之一

打門球的北京老人家

北京之旅~~Day 3

北京之旅~~Day 3

寫左咁耐，都重係寫緊呢到，唉~~無計，繼續寫！

到左北京的第三日啦，今日又係晨咁早就出發，今日先去呢個天安門廣場，再去故宮睇野！

黎到天安門廣場，可以選擇排隊入去睇毛主席紀念堂，但人龍打幾大個圈，如果大家決定唔睇的話，就可以直入故宮，點知有位團友伯伯氣沖沖咁同阿蘇師父講話一定要入去睇，差在未「dup地Lie地」咁話，其實大部份人都唔想入去睇，因為排隊就預左個幾鐘，睇就係睇幾秒，而且重無得影相，唔可以帶袋，唔可以帶電話入去，而且......睇毛主席既......遺體........真係有乜咁好睇呀？我個人既感覺係，若果佢唔係對你恩重如山的話，又有無咁既必要呢？但阿伯就好怒/勞氣咁話個行程上話有既，點都要入，咁無計啦，唯有成團人係天安門廣場逛一輪，等佢地出番黎先入故宮囉！咁實情係除左伯伯同佢老婆都重有幾個人入去既！

咁又再逛一次天安門，今次就近距離d係天安門個城樓前少少既位置影多幾張相，又係咁snapshot下咁，行下行下磨磨左個零鐘。其實，即係咁，遺體有乜好睇，我就真係唔明，而且我對毛主席係無乜特別好感，我曾經睇過一篇文章，佢好似咁講過，如果唔係有毛澤東，中國既盛勢可能會早出現三十年，三十年啊！如果唔係文化大革命，如果唔係中國人將自己既傳統和歷史扭曲，現在的中國會是個怎樣的光境？我阿媽個d就感受更深，上山下鄉，當年萬人操佢都參加過，我阿爸亦參加過。而當年受文化大革命影響既又何止我阿媽阿爸，可以話係不計其數，我亦聽過無數故事，在此暫不多談。為了一己之私，自己的權力，令整個民族受苦受難，配嗎？在這個我連神都不膜拜的年代，我還會拜魔鬼嗎？反過來說，一個先人好地地應該入土為安，但每天還要在那玻璃箱下升升降降，年終無休地供人「瞻仰」，也算不上是「好」吧！

遊完了天安門，終於都要進入故宮了。皇宮真的很大，但不覺得十分美，反而覺得皇帝也很寂寞，後宮很深怨。皇帝說就說是天下的皇，卻也無力出走那圍堵他的四道牆，儘管他的家他媽的大，但可以傾，可以講，可以信的人又可以有多少？他勤政愛民，就只可以日以繼夜地批閱奏摺；他荒淫無道，卻可以落得消遙自在，認真諷刺！而遊覽這裡卻令我想起另外一些事情。懂我的人或許知道我很喜歡日本這地方，但未必知我原來在三年內去了五次日本！去到日本很開心，不單是它真的很好玩，而是我感受到當地的特色，當地的靈魂。而我在北京，或是因為跟隊吧！連半點與當地人接觸的機會都沒有吧！我掌握不到這個城巿的脈絡，呼吸不到這個城巿的氣息，和這個城巿很像格格不入，互不相干。看著那些翻新了的建築物，我心裡面想到既竟然係好假！無錯因為奧運，名勝要翻新，但刷新後的建築，靈魂也像隨褪色的地方上面塗上一層新的顏料一樣，被永遠困著了似的！我不得不與日本作比較，日本就算要翻，也會保留其本身的味道，特色，看上去就算是新的，感覺上的有古樸的味/美，在北京嗎？感受不到！

好不容易走了很久，亦好不容易看完！感覺就是那種.......沒甚麼大不了的感覺！跟著又去了食午飯，又去了好幾個購物點後，來到了日境的鳥巢和水立方。我們下車時，太陽還沒有下山，水立方也未有亮燈。到了那兒，四圍拍了一下，和阿媽拍了幾幅應該其他團友都不會拍得到的相片之後，就回去集合。都是那個故事啦，要是到一個地方，每個人都拍到的，你拍到，並沒有甚麼大不了，要拍到其他人拍不到的才好！而最重要的是其實要拍到不難，多行幾步就可以，問題係你願意比人行多幾多步？

到集合之前，因為奧林匹克公園只有流動的廁所，要去就只有去這些。唉~~都係例牌咁比d北方小朋友啊，師奶啊打下尖咁，最大獲既就係，因為呢d流動廁所係以電子牌係門度顯示有無人，咁lock左度門就會話係有人嫁啦！咁又咁多度門喎，我比人打尖咪行過隔離囉，有一個又顯示無人喎！咁我就一手拉門啦，點知.......... 嘩！嘩！嘩！！！有個北方師奶係度......係去與未去，褲係除與未除之間，個半秒......「菜！」係我心諗，我真係蝕底晒，呢個係第一個反應，第二個反應，就係用左另外個半秒delete左之前個半秒既記憶，將我或者會見到任何野既記憶清除掉，所以到依家我都唔係好肯定我當時睇到d乜，依家只係記得發生過呢件事。呢個潛意識真係好，可以令到好多人去除到好多不安，包括我！唉！中國幾時先會文明起黎呀？中國d運動好多都係得個名，我以前公司個d就係諗口號就諗幾個星期，個活動就搞一個星期，成效就一日幾內會無晒。呢d表面野要做到幾時呢？

坐左陣，等到水立方同玲瓏塔都著左燈，影左幾張。最衰係唔知佢會留低留到開燈，所以無腳架，但都叫做影到下既，過多一陣就去坐車，跟著去食晚飯嗱！

呢晚餐飯就號稱成個行程最好嫁啦，最少間餐廳既行頭好好多先，重會有北京填鴨食！不過都無抱大期望嫁啦~~~到最期待既北京填鴨啦......er.......都係咁囉.......可以講乜野丫？有幾片比你食叫唔錯咁囉，但各位團友好似食得好津津有味咁，咁唔通我大聲講：「都係so so啫！」咁咩！點知我阿媽夜晚返到房同我交換睇法既時候都係一樣，d團友好似無食過好野咁，阿蘇師父就覺得自己have done a good job咁行過黎問大家食得開唔開心咁？我又見大伙兒又真係好衷心咁覺得d野好好食！我同阿媽都諗，大家其實有無食過d真係好好食既野嫁？我只係覺得比起成個行程既膳食叫做似返d樣咋，換句說話講係「無咁削」，但唔代表佢係好好食嫁，大家可唔可以清醒番少少呀？

今日既行程去到呢度為止，因為導遊身體抱恙，今日早d收工，聽日最後博殺先再算！食完餐飯就反酒店休息了！


待續......

北京之旅~~Day 2

北京之旅~~Day 2


終於都講到第二日，呢日開始六點半就morning call，七點半就出發，真係人都顛！每日都係咁，真係慘過返工！


今日一早出到去，以為會即刻去長城，點知......要去左d旅行團必去既地方先！就係買野景點啦！我之前未跟過隊，唔知要搞呢d野！我就真係有d反感呢d野！我比錢黎玩，唔係黎比人煩嫁！買唔買都尷尷尬尬咁，好離奇嫁嘛！第一站去左買d膏貼呀、藥之類既野，但之前都有d sales講下，介紹下咁既！我就覺得幾正啦！因為我全程都無聽，坐係最後個度，由一開始瞓到完，我醒既時候已經係各位搶購緊，失左成個鐘頭知覺，正啊！我阿媽要幫個friend買野，順便叫導遊叫d姐姐送多少少膏貼比我地，後來呢幾塊膏貼都救左我嫁！


離開左呢間膏貼廠之後，再去多個sales點先到長城，今次就無得瞓，因為成程要行既，無得坐。


好啦！到左成個trip其中一個「重中之重」—長城。我地今次去到居庸關！到左，落到車，望上去，都幾高下！心諗，無理由唔行到最高既！咁遠黎到，又全團最後生既我，無乜理由唔去到盡！好啦！成村人行左上個城樓，又影左幾張相，我媽子都決定唔上嫁啦，佢體力無可能應付得黎，所以係起點影完相就係下面行行企企，等回程啦！由於時間只係得個多鐘，咁搞搞下，得返個零鐘，咁我就拿拿臨衝上去啦！點知~~~瀨野啦.......

我的極限！？
成個居庸關去到頂，有七個峰火台！路都幾窄，而且每一級都高低不同，時高時低！而且一定要腳跨到好高先上到，雖然有扶手，但扶手既位置太低，食唔到力。路又窄，過唔到前面人既頭，要過頭就要就咁行，扶手都無得用，但偏偏呢d位人又超多，搞到人都無心機行！行下停下行下停下！用左成十分鐘先上到第一個峰火台，但人又多，而且著得超多衫！好熱！唯有除左其中一件衫先可以再行！好！再行！再過多十幾分鐘，上到第二個峰火台，路依然好多人，但係峰火台無得停，因為峰火台內好食風！一停低就食風，會凍！但又一定要停一停去回一回復！黎到第二個峰火台先後悔放低左d水比阿媽，自己竟然水都無攞上黎。積聚左唔少辛苦既頭兩段路，老實講，平時無乜鍛練既我，已經吃不消，而體力已經消耗左唔少，甚至乎可以講......已經接近極限！再上？有可能嗎？

本著一個信念—山長水遠~~無理由放棄，於是繼續向上走，走一個算一個。筆直的城牆，忽高忽低的梯級，第二至第三個峰火台的路好似特別長！我已經不斷喘氣！無錯係喘不過氣！重要係大口大口咁喘，我記憶裡我無試過喘氣喘得咁勁，直頭係成個人會上下上下咁喘，望著第三個峰火台，手撐著膝頭借力，抽起上身，再用上身上升既力去帶動腳部提起，先上到去，無誇張，我就係咁樣「捱」到第三個峰火台！去到第三個峰火台，呢個地方已經改裝成為小賣店，有咖啡(主要for鬼佬)同d紀念品賣，對我最緊要係有水賣，買左一支水，可以幫我撐下去既！五蚊支，上到黎呢個位，呢個價位係絕對可以接受，而我見到外國人買既價錢好似同我有d出入，鬼佬好似比佢收多幾蚊！再有一個男仔黎買，比四蚊阿賣水姐姐，姐姐話唔夠錢，比返錢阿哥哥仔，阿哥哥仔又放返低支水.......咁我眼見阿哥哥仔同個女朋友仔一齊上黎，買唔到水交唔交代到嫁？呢d正式你唔飲，個女仔都要飲啦，但後來繼續上去，見佢地又無乜野咁......唔通只係香港女仔先會係呢d情況下發老皮？我唔知啦......

黎到呢度，我體力(認真差既體力已經用左八八九九)，我有諗過行返落去，但眼見第四個第五個峰火台就左不遠處，而計算峰火台數目又未過一半，無理由停嫁？於是再一鼓作氣，行上去！第四個峰火台，用左好少時間就去到，因為路係好行左，又短一大截，而且梯級既高低無之前差距咁大，人亦少好多，所以好快就行到，更甚的是我已經見到有團友行完返落黎啦.......而佢地個個年紀都達五十或以上之齡，而且氣都唔喘一口咁.......(唉！認真失禮死人！^__^ """")再加上收到既情報係之後既路係比依家更好走，峰火台之間距離更短！咁就更加令我有信心行上去！

自我反省！？
一路行上去第五關除左見到再一個賣紀念品既地方外，重諗左一d野！行上黎既歷程同工作一樣，開頭係好多人，好難行，但行到有返咁上下高，其實路就會好行左，而都少左人競爭，因為某d原因，可能係體力唔得，可能係思想放棄，所以黎到呢個關口就少左好多人。如果我係頭三關已經放棄的話，根本就唔會知道呢條路係後面幾好行！曾經阿So(係浸會舊同學，唔係領隊蘇師父)話我個人做事放棄得太早，我做事往往就係咁，開頭無耐就無左影，好多野唔係未成功，而係連開始都未有就放棄左！又諗起任達華係「跟蹤」到同徐子珊講：「你咁無恆心，去到邊都唔會成功！」呢d說話一下子彈晒出黎！而我最信奉既說話：「機會只係留比準備夠既人！」都不其然反覆咁諗起！我一方面明知呢個係事實，但我自己就往往無準備好自己，機會唔係好似我阿媽同女朋友咁覺得，無出現過或者我既際遇唔好！而係我自己無好好準備自己，無好好咁去爭取每一個機會， 更唔好話去把握！以踢波為例，每一個前鋒係每次隊友起腳時都要不吝嗇任何力氣衝向龍門，為的都是那可能是可一不可再既龍門甩手機會去「執死雞」！如果我唔努力，機會亦唔會臨到我面前！

就係咁諗諗下，繼續行，行到第五個峰火台，再見到另一班團友回程，其中一個重比左粒「得力素」我食，繼續撐著累腿(唉~~撐~~)，喘著大氣(唉~~削~~)行上去，再黎個反高潮添，竟然有個位要向下行再往上走！搞左咁多野死撐到最後幾步，終於終於都行到第七個，亦係最後一個峰·火·台！第一步踏入去，係一個手持紀念證書既人話賣張證書...... ?0? ，索價四十元人仔！我竭一竭再睇下個境，影左幾張相，再諗下，一場黎到買返張都唔過份丫，而且我阿媽又上唔到黎，見佢之前同個老外都可以刻兩個名，所以話可唔可以刻兩個名，三十蚊，但佢話無位，而且最平三十五，唉~~是但啦，三十五就三十五啦，就齋刻自己算啦！阿sales叔叔問我自己刻定佢刻，咁我當然係要阿sales做啦~~~我手都震曬啦累到，同場有個哥哥仔買先，佢就自己刻個名，佢刻完就阿sales幫我刻個時，阿哥仔用廣東話問我話幾錢？我做口型話三十五，佢啊左一聲！我以為佢係香港人，因為廣東話都幾正，點知佢話係馬來西亞人，屋企人係下面，佢就一支公上黎。到刻完，收錢，阿sales話每人三十啦，大家亞洲人，鬼佬就收四十，無價講~~~啊~~~咁都得？之後請馬來西亞哥仔幫我影左兩張相，跟住話幫佢影，佢話自拍得囉！咁就此告辭啦！就飛奔碌返去啦，因為得返半個鐘咋~~

一路行，一路先影返d相，因為向上行時無乜心情亦無體力咁做，落山都小心翼翼都要差唔多九個字，返到下面，成車人上晒車到等啦！拿拿臨上車，就完成左呢個長城之旅，但個人已經散散地，就快行唔到啦~~~

跟著就去食飯，好鬼肚餓，午飯又唔知食左d乜就完左啦，跟著就去王府井大街行，行左一陣，又去百貨公司睇左d奧運紀念品，都睇啱套五隻福娃做晒所有奧運項目pose既公仔嫁，重有一套發聲公仔送！都係六百幾，齋買發聲公仔都二百幾，平爆啦......但諗諗下都無位放，亦唔會捨得攞出黎用，都係算啦，唔買！跟手去左附近條王府井熟食檔位到食左d野，ok既，d衛生情況都幾理想，d野都ok過我地d團餐既！

到左集合，有幾個人就自己去左鼎鼎大名既北京烤鴨店「全聚德」食片皮鴨，之前問過我地無得去呢間食，而且要去都要另外自己安排時間！其實我黎之前已經好想好想好想試，無得去的確係好失望嫁~~望就望有時間自己去到啦！去到食飯，話就話食御宴喎，我食完就得出左一個結論，呢間御宴如果真係御用的話，我估皇帝食完，個御廚都應該可以殺頭嫁啦！咁我唔多講食過乜野啦！

之後係要加錢睇既表演，睇完可以咁講，唔加的話，我去食全聚德好過啦~~雖然~~有變面睇啫~~走個時，見到有成棚，係成棚咁多既韓國中學生喎，著晒校服，但清一色男仔，黎呢度考察？旅行？點都好啦！係個時，韓國傳出又面臨唔掂咁話，睇落似乎影響唔係太大咁喎！(哈，又係韓國？唔好咁啦.......個排真係好為呢個國家頭痕呀!!)

死到返酒店......散左九成，沖完涼，睇左陣電視先瞓！呢度有成六十幾個台，但無香港既台，有都只係鳳凰衛視。又睇左幾集普通話版既「李小龍傳奇」.....唔.....開始對佢既武術概念有d興趣了！亦開始明白點解咁多人會迷佢咯.....

呢日超長！講住咁多先，待續......

呢度只係山腳，係張相中間，最左手邊那個，只係第三個峰火台，最近最大呢兩個只係城樓！

北京之旅~~Day 1

北京之旅~~Day 1


繼續北京之旅，到左第二日，或許叫做真係有行程既第一日，8:30就morning call，9:30就要上車開始行程。一早起身就去睇北京既特式建築—四合院，坐人力車入到去，我無乜心情聽四合院既主人講野，只係四圍行下，影下相，但個感覺係好鬼人工咁囉！好一般遊客景點，搞到我都無乜興趣。睇完之後就出返黎啦，跟著無耐就去左食飯。

車到左一個好鬼僻咁既地方，外表睇個樣好鬼似就死個d酒家，重話食乜鬼東北菜喎！入到去落在一層，去到地牢咁既食飯地方，是鬼但坐，因為阿蘇師父好求其咁叫d識既人自己分配，結果咪亂咁分囉！d菜就......雖然都有個心理準備d野唔好食嫁啦！團餐加大陸野，可以有乜預期啫？但都唔使咁削掛？有乜食，早已唔記得左！唔知係唔想記得，定真係唔記得，總之就差係嗱！食完飯，因為間野話間廁所壞左，要出黎街口有個公共廁所，呢度有個所長既，都總算係咁上下啦，唔係太恐佈啦！

食完飯，跟手就去左天安門廣場！總算踏足在呢個傳奇既地方，睇電視就見得到，親身去到的確係有d唔同既，同時間，亦見證到祖國真係開始強起來啦！國家博物館個d都開始興建啦，唔知下次黎有無機會參觀到啦？同阿媽行左個圈，影左幾張相，因為之後重有一日會行呢度，所以是但行下就算！當然媽子當年民革時到過呢度，好似係上山下鄉咁上下既日子啦，佢話一隔，就相隔四十年先返到黎呢度啦！

之後，就去左天壇同地壇！實請入到去，又覺得天壇同地壇無乜咁特別，最少無傳說中咁神先！因為d北京行程必到嫁嘛呢度，但睇落又無乜特別啫，都係咁易影左幾張啦！再加上體驗下傳統中國人d逼逼下咁睇野啦，我最憎架啦！睇完個天壇，跟手去左個珠寶玉器巿場咁上既地方「參觀」，呢d賣野點，我都無乜興趣既，但係個巿場到就見到張寫左十二生肖既性格，睇左自己個生肖，同女朋友個生肖。都ok準既！不過我就望住左句說話好耐，諗左好多野囉......「對愛情奮不顧身」... ... @___@ (其實個實際詞語唔係呢個，因為我已經唔記得左啦，不過個意思係咁上下啦。) 我... ... 係咩？雖然係...... 唉！咁啱個時係有d野諗緊煩緊！睇完都係繼續煩！係個玉器巿場底下，有個小food court......可以咁講啦下！阿媽話要食碗野，咁咪食囉！左計右計結果食左碗香港雲吞麵，唉？唔係唔係！係間野個名啫，係食左碗牛腩麵先真！兩個人食左一碗！好食？當然唔講得！又係食你唔死個種囉！跟著又真係差不多食飯啦！呢餐食餃子宴喎！食左成十款到既餃子，味道又唔係有乜咁特別咁，係叫做款多咁解之嘛！係唔知食左d乜落肚之後，就返酒店啦！因為聽日就要挑戰長城啦！加上大家都係早一日唔太夠瞓，所以就早d放大家返酒店啦！

旅遊車返到酒店，我落車個時問阿蘇師父鳥巢係咪好近，可以點坐車去，佢就話其實好近！行過去十五分鐘到就到。跟著我拿拿聲返房準備好d野就出發！係房門口其實已經可以睇到水立方，個時著左黃燈！都幾靚嫁，問過導遊，大約幾時熄燈到，佢話九點半！於是一於衝過去！出發時大約8點9到啦！當然，我都係行啦，都行得幾快啦！由於唔係好熟路，於是乎行錯左少少，咁啱又見到個奧運倒數時計喎！於是set好個腳架，影左幾張咁啦！又未到九點半！向個鳥巢方向行啦！行左幾分鐘，利用自己既方向感，就已經上到鳥巢同水立方個條中軸線，兩座偉大既奧運建築就座落係面前！個心情係幾興奮既！但見都無燈，於是就係橋到諗住影下車流慢快門啦，點知都係學藝未精，影到一塌糊塗，都係算把啦！一場黎到，唔影過鳥巢都唔心息既，又有腳架，心諗，無腳架，曝幾秒就話難啫！有腳架，無開燈又如何？曝夠幾分鐘都一定得啦！於是乎一搞就搞左半個鐘......當然都真係比我影到無開燈既鳥巢啦！我都幾滿意既，但尾中不足就係影唔到自拍啦！我對左幾次嫁啦！又懶得較manuel focus，結果就影左幾張我唔清既鳥巢合照嗱！影左好耐，都係時候返歸啦！沿著中軸線行！依！見到地鐵站喎！尾班車剛剛走，都只係十點半啫，行過黎個時又記得有個地鐵站出口喎，於是落地鐵站行過去啦，起碼無咁凍丫嘛！

行到落去，嘩！真係無人到咁，咁啱有幾個地鐵員工收工，咁例牌又係影左幾張相啦！行返個方向，真係比我去返之前黎個地鐵出口喎！其實個站好細既啫，咁搵到又唔難既，老實！行行下返到酒店，都十一點啦，沖涼之後瞓！因為聽日要行長城，都係要休息下，保留下體力既！就係咁完成左第一日既行程啦！


待續......


唔知點解真係幾鐘意鳥巢！真係唔知點解！呢度令我諗起劉翔......

北京之旅~~Day 0

北京之旅~~Day 0

去完北京都有一個星期，都係時候回顧下個旅程。
雖然去，就麻麻地想去嫁啦，不過陪阿媽去，算啦，我無錢，阿媽都照請我去。但問題係成班都係有番咁上下年紀，又係跟區議員團，心諗都係唔好咁大期望啦。

有專車來回香港機場，但就晚機去早機返，五點幾上翠竹到等上車，阿區議員領隊好似懶熟咁同我送車既阿爸同我呢個細莫生打招呼。老老實實，我個人唔係咁buy佢，我阿媽都係，咁樣同我懶熟法......我都唔會有乜特別感覺。

開車啦，到左機場，要我地成班人企係到等左差唔多成個鐘，又話機位緊張，又話盛，機位緊張還機位緊張丫，我地有位嫁嘛，佢搞到成村人咁緊張做乜鬼？搞搞下，搞到我阿媽連飯都無食就要入閘......重要有個男團友話，你地要食野，求先就行去食丫嘛.......真係O晒，成村人等，又唔知幾時得，點行開呀？老闆！~~~

呢樣都未最戲玉！佢分完boarding pass之後，有幾個人可以坐頭等啦，呢樣野我無乜所謂既，都係坐香港快運啫，但竟然每個party，即係當我同我阿媽咁計啦，我坐第12行，我阿媽坐25行？又點搞呀領隊~~~上機先換？依家坐巴士呀？上到機都忙著起飛啦，邊有咁多時間同d人換來換去呀？

最後終於上到飛機，最後發現部機又窄到死，都無乜心情搞一大輪野換位，坐低無耐就起飛！部機都ok既，但我見d空姐姐姐都有d狼狽，因為細機，飛得唔定，所以佢地做野時都幾辛苦！派餐時重成盒蕃茄汁跌落我腳邊，係爆開左少少，但都好彩無中我！~~重有係空中有一下氣流，好似玩海盜船咁，有一下成個人完全失重，嘩~~~個一刻，我只諗到我.......真係會死嫁！當然，我膽細就係啦，少少野都會嚇親既人，而近排我都懷疑自己有d心理病，好似焦慮症同強迫症呢d咁！不過未睇醫生，未經證實！

幾個鐘頭後，到左北京首都機場，搞定手續，出到閘都快凌晨十二點幾，一出閘頭見到既第一間舖頭，竟然！竟然！竟然就係大名鼎鼎既「starbucks」，再隔離係德州烤雞(KFC)，再行下就見到EMS(國內速遞公司)既劉翔，重有一直好見親眼見到既奧運長雲banner，算係咁囉......

到出左機場，要上旅遊巴，唔知點解阿領隊(以後稱為蘇師父)黎之前就話按報團既先後，編旅行車坐既位置，以後咁多日都跟那個位~~下？唔使咁呀？咁大個人~~佢重厲害到自己係巴士到放好左d no.紙，跟著讀名跟no.坐喎.......喂！蘇師父，家陣露左天，得幾度到咋，大家又凍又累，唔好玩啦，好彩當地地接而又識講廣東話既導遊話，唔好分住啦，返上車先啦阿蘇師父，聽日再搞啦~~跟著就成班人上晒車.......又好出奇咁，成班村民又好鬼聽話咁記得自己個老冧，又坐返自己個老冧位......跟著個幾日，都再無人調過位啦咁~~~

拿拿聲返到酒店，分房，我阿媽攞左房卡，上到去，依？一張雙人床？於是諗住行返去同蘇師父話搞錯左！點知行返出黎個時發現d夫婦就兩張床，d fans就一張雙人床！最後就同對夫婦換左房就ok！安頓好後，再諗清楚發生既事，同阿媽既結論就係~~~阿蘇師父拿住d房既時候搞錯晒d單人床同雙人床既記號，搞到分錯房既編排~~~好野！同一日錯咁多野，重話帶過咁多次團添~~~認真佩服！可能因為唔係選舉年，今年又係自動當選，所以無乜心做野掛......算啦......差都係預期中既，但咁差就係第一次見，拿拿臨搞好佢，明天(都已經成點啦，重明乜鬼野天丫)9點幾又出發，唔諗咁多，瞓先~~~就係咁樣結束左day 0 既行程！

待續...

四首歌、四個故事、四種心情

明年今日 (無緣無分)



味道 (有分無緣)

吻別的位置 (有緣無分)



合久必婚 (有分有緣)

我真的受傷了？

我真的受傷了？

近來發覺自己的心靈好像很是脆弱，不知是甚麼原因，只覺得心緒不寧。

因為某個原因，在架上拿出張學友的「活出生命dvd」來播。一聽之下，感受良多。記得之前買這dvd是覺得張學友把這些歌唱得很動聽，而且大部份都是大熱作品，就算是像我這個一毛不拔，不輕易購買唱片的人，也沒有經過太多的考慮後就買回家裡去。回到家裡，誰料就只聽過一遍，就覺得失去了那種特別感，之後便把它置之高閣了。直到近兩個星期，被某事纏繞，心裡很是不舒服，忽地就想起了一首歌，剛好張學友也在這碟中翻唱過，於是乎造就了這次的「重逢」。

張學友的歌聲，歌曲的旋律，一字一句地觸動我的心靈，每一首歌，彷彿都為我而唱，每一首都在我的心中泛起陣陣的漣漪。老歌的功力是肯定的，但張學友入木三分的演繹更是實力的證明，輕描淡寫地散發著一種氣度，「歌神」之名當之無愧。現在這輩歌手中，有實力接過「歌神」匾額的不外乎李克勤和陳奕迅，其他大都未成氣候。李克勤或許是我個人主觀一點，但論實力，應該是當今樂壇無出其右，可惜的是，見他多年來也像走不出譚校長的陰影下，歌唱技巧上未有太大突破，而在形格上也不像那個級數的類型。對比起來，陳奕迅是較為近似的，他沒有甚麼不好，但就是欠缺了那種說不出的「火喉」，就差這麼一點點才到那個境界。

再聽下去，到王宛之唱「我真的受傷了」的時候，悲涼的感覺一下子就填滿了我，不知道為了甚麼有種悲從中來的感覺，很想哭一場，但又不知道是為了甚麼。以為到外地走走，人會放鬆一點，頭腦會清醒一點，怎料根本沒有半點幫助！為甚麼好像失落了些甚麼似的，不知道、不清楚、也不明白。

我，這個脆弱的我是否真的受傷了？......

11月的slogan~~

11月的slogan~~


It's time to be realistic, Spark......

Welcome to the real world!

사랑해요

당신을 영원히 놓치십시오

AV vs 工作

AV vs 工作


一向都沒有於人前掩飾我對AV的熱愛，沒錯是AV —「Adult Video」，不是什麼audio之流的東西。我一向都非常敬佩廠商對AV製作竭而不捨精神，那種一絲不苟，認真的態度，是我們想像不到的。直到近來，看過這個部落格之後，我對av的認識加深了，更加令我反省我一貫的工作態度。


首先，大家，尤其是女性，以為av的內容不堪入目，認為只有「鹹濕」的男性才好此道而已。如果這樣想的話，就大錯特錯了。其實，如果以較大規模而又正統的AV製作公司計算，背後曾負出努力的人可能是不計其數。因為由選擇合適人選，到決定女優出道會走那一種路線，到出道前的培訓，往往都十分講究。到女優預備好，AV片內的劇本也需要進行非常仔細的策劃，亦是相當高的一門學問，而導演需要對每一幕、每一個場景，進行分鏡拍攝的預算，再與其他相關部門溝通如何設定燈光、化妝、道具等，這比我們所欣賞到的製成品(約兩小時的DVD)花上多百倍，甚至千倍的時間。所以我十分同意部落格內筆者所提出的一點：AV從來都是一場SHOW！沒有計劃以外，只有預期之內，一切遵從本子辦事，不能多，也不能少，容不下隨意性，更遑論「天才波」！所以，AV片子內的東西，當是娛樂就可以了，不要太認真，因為所有東西都是「演」出來的，所有故事都是編出來的，你一旦對它認真，你便被開了一個玩笑了。


再想到我的工作，我現在雖然與「攝影師」的名字還相距十萬八千里，但與老闆相處多時，大概也聽過不少我們工作的一些基本要有的想法和態度，其實和拍AV是同出一轍的。


攝影的重點，從來都不在乎被攝物的實體到底漂不漂亮，重點都不在於把產品的本質表現出來，而是令人看起來「覺得」它吸引。AV女優和食物一樣要拍得漂亮也要避重就輕，發掘她/它的優點：這個動作看起來太笨拙，令人失去性趣；這個角度看起來很「油膩」，令人沒有「食慾」；這個燈光看起來很鮮美，令人食指大動。這，才是真真正正的拍攝現場。


老闆拍的每一樣東西，事前都清楚整個劇本，如何分鏡，用甚麼鏡頭，用多少燈，一切都心中有數，尤其是出外景，帶備的東西就只會是「準確值」，絕不會多，也更不會少的「大約值」。這亦正正是我多年來在外所學不到的東西，也或許是令我停滯不前的態度。沒有方向，不清楚自己要些什麼，就算有方向，也沒有好好準備參考資料，就算有資料，也沒有全面分析好事情的利弊。就這樣浪費了不少光陰，浪費了不少人生。我相信「機會是留給準備最充分的人」，但我時時刻刻都問自己，我又準備過些什麼呢？我又錯失過多少個機會呢？我憑我以往在學校內的實戰經驗，令我常常錯誤地以為自己的「執生」能力是一流的，但想深一層，如果所有事都在我預計之內的話，「執生」又會否是我最下手的一著呢？


我現在的工作今時今日再冒不起要「執生」的風險，只要一子有錯，就會滿盤皆落索。我要進步，我要成長，就要做好最全面的準備，最終成功與否，雖然也像個AV女優的發展一樣福禍難料，但我總相信我也可以不靠運氣，不相信命運，不管路有多崎嶇，路有多遙遠，以自己的能力，踏實地走每一步，終可以創造我人生的頂峯。


事後話：
話說回頭，自從看了這部落格後.......我看AV的數目也每下越況...... ^___^ ""





設計對白：

乜AV真係有咁好睇咩？

自我形象的落差

自我形象的落差


一向以為自己是個成熟穩重的人，現在忽然發現自己很是「好」玩！；
一向以為自己是個循規蹈矩的人，現在突然發現自己任意莽為！；

面對心目中的自己，面對真正的自己，有點迷茫，有點模糊，
我該怎樣面對？我該怎樣應付？......
我既不能駕馭真實的自己，又不能負載心目中的自己。
這個殘局，誰來接手？

心內、身內的能量亂竄，完全不受控制，心與身無法合一，
這樣失速下去......
最終只有粉身碎骨的份兒！

該如何？
應如何？
當如何？
如何是好？
身心俱疲配上心力交瘁......
不管如何，我都不要再做命運的籌碼......

大概......這是個好開始

大概......這是個好開始


近兩日，就是這兩天，發生了兩件主動預計之外和被動預計之外的事，兩件事都令我非常煩惱，令我兩晚都睡不了。

主動的那件，令我明白，有些東西錢是買得到，但感覺是買不了的，珍惜是最好的方法，「多好玩的東西早晚會放低」，唯有感覺才會歷久常新。

被動的那件，令我明白，有些東西早知總好過遲知，雖然今次真的「瀨嘢」瀨到正！但樂觀一點，現在知道，可以挽救的機會還有許多，而且今次大概還有點幸運，或許可以「過關」，最重要最重要的是我今次竟然會理智地告訴自己，這就是我進步的空間，要奮鬥的目標，這樣的錯以後都不要再犯就行了。只有錯過，才會警剔；只有錯過，才會學會。我相信，肯努力，我還是可以成功的！


唔知點解，覺得有d似小學生既作文........重要係比人罰留堂作個隻~~~哈哈

返工後首次出job

返工後首次出job

早兩日跟老闆/師傅(我唔敢自命係人地徒弟，我怕我才疏學淺，有辱師門啊！)第一次出job，今次係幫一本雜誌(Exxx)拍專題。我覺得今次呢個題目好有趣同我亦有好密切既關係，等到文章出街之後，再同大家分享吧！請大家多多捧場喎！！謝謝！！

奶o野

奶嘢


上一篇和大家討論過「瀨嘢」，今次和大家討論另一個近來都弄得滿城風雨的「奶嘢」。以為「瀨嘢」已經夠大牽連，想不到奶嘢更是「牽一髮、動全身」。


莫非賺錢就是這麼重要？這是我的見解，內地很多商人對錢總是想昏了頭，「可以沒道德、可以沒良心、但不可以賺不到錢」，「貨是假的，只有鈔票才是真道理」。這次事件源於奶站加入化學品，令奶的重量及數量增加，也同樣是為了賺取更大利潤。據新聞報導指出，部份奶農是知道有這種事的，但就無人向奶品製造商舉報。問題就出現了，如果連奶農都知道是有問題的話，製造品商有可能完全不知情嗎？最少與奶站接觸的人員必會略知一二吧！


向上推一個層面，奶品製造商中原本根本沒有檢驗三聚氰胺這個項目，事件發展到最近，各產品作詳細檢查後才發現大量製品都含有三聚氰胺，不單是內地的奶製品，連外國品牌的產品也都驗出含有該化學品，這時才急急忙忙回收有關產品。


這總結出甚麼呢？無疑，國內的各類型產品的質素雖然一向為人所垢病，但今次奶製品所牽涉的品牌卻不單單來自國內，國外的也有不少。你可能認為廠房設在國內，原材料有問題就該由廠方承擔有關責任。但無可否認，作為一個誇國品牌，亦需要對產品負上責任，斷不能把所有問題及責任都推到中國的頭上去。「吉佰利」、「卡伕」、「Luton」等等都是國際知名的大品牌，三聚氰胺這東西都絕對有檢查的必要吧，到現在才發現，根本就是整個品牌的事，根本沒有任何理由可以逃避責任。


當然，我這樣說不是為了維護我國，但公平一點，各方面都應負上不同程度的責任才算合理。然已，國家的進步與食品安全、科技發展、國民教育是不可分割的，這個成長過程都是痛苦的，是無可避免的。我只期望事情可以盡快得到解決，受影響的人可以盡快回復健康，最重要最重要的還是政府可以從中吸取教訓，為日後各類產品的質素保證打下基礎，為國家成為堂堂正正的大國而舖路！

「瀨嘢」

「瀨嘢」


近幾個月黎政府都應左我一句......「瀨嘢總係接二連三」，「瀨嘢」既重點唔重於「瀨」既過程，而係來自「接二連三」！
權哥既政府既「瀨嘢」可由以下說起：
1. 由四川地震開始，救援變延遲其他人救援；
2. 係未得中央同意既情況下，自組「曾家軍」，最離罩既係竟然有d人係擁有外國國藉；
3. 係有利益輸送既疑點底下，比政府舊人加盟商界；
4. 阿爺叫佢坐鎮睇住奧馬，佢就四圍貢，登台做show；
5. 毒奶粉出晒事，政府依然後知後覺，好似乜都唔關佢地事咁；
6. 金融大海潚，話無乜影響啫，其實都人心惶惶。
呢d「瀨嘢」有好多都未必關權哥事，亦唔係佢搞出黎，但問題係佢應付應對呢d事既能力認真係「強差人意」，比人既感覺係無能，無能都唔緊要，但都唔好扮有料丫，唔該！之前董伯伯既資質平庸又硬頸，但起碼佢比人既感覺係勤勤懇懇，從不躲懶。反觀權哥，佢叻唔叻我就唔肯定，但佢扮叻之下做左好多蠢事就有目共睹，周圍飛有幾多時間留係香港體察民情亦係寥寥可數。
「瀨嘢」呢樣嘢有兩款，簡單d講就係「天亡我也」同「自作孽」。「天亡我也」就係你做足準備，所有嘢都係控制之內，但就有d外來意外發生，可以係無端端發生，也可以係由一d無謂既人造成，但最少問題唔係出於自己，自己已克守本份，問心無愧！
「自作孽」呢？就係自己無嘢搞嘢，或者亂咁嚟，唔理後果，耍小聰明，求其可以「過骨」就算。呢種「瀨嘢」就無人可憐，而權哥亦係呢一種。
身為一個地方領導，地區既榮與辱就要一同承擔，甚至乎要更有承擔，這是個人情操和責任感的問題，和個人能力無關。每個人能夠盡己任者，就已值得敬佩，除非你話比人聽你唔願意做，咁我地就唔可以對你有期望，但問題係你自己走出嚟話要選既，做唔到嘢就預左比人插！不過，話說回來，權哥可能覺得自己又唔係由群眾走出嚟既，而且佢本人一向「視民望如浮雲」，佢無乜必要睇著個「天」做人啫.......情況可能真係如此，但我相信「人/權在做、天/爺在看」，亦相信「天有不測之風雲，人有霎時之禍福」，亦相信只要你肯做得更差，一定會有超過五十萬人上街遊行，到時你想鞠躬下台，恐怕連半個機會也沒有！




係囉......呢d咪叫做「瀨嘢」囉.....
(圖本取自facebook終極無間道問題)