Life Project Episode 1 - Stone

Life Project Episode 1 - Stone


小弟有份參展既攝影展，主題為石．Stone。希望各方友好得閒，而又賞面的話，於4月5日(星期日) 到來參觀，比d意見！

附上過去左既星期日既現場片段~~

十年......還有之後......嗎？

十年......還有之後......嗎?


寫完「十年」好耐，成日覺得，件事好似重差少少野咁......男主角係咪真係咁放得低呢？佢係咪真係可以咁大方呢？係現實生活當中，係咪真係有人做得到呢？換轉係我，我又會點呢？好多疑問，唔知有無人想知呢？我重寫唔寫埋佢好呢？

係咁賣關子，都係想話比大家知，其實「十年」之後，還有一個小小小小的片段，從未公開，內容亦已經八八九九啦.......係最後既結局.......未揀到一個滿意既啫！
唔知大家想要個點樣既結局呢？係男主角去搶新娘咁激丫？定係發爛咋唔影，咁無品呢？如果大家有意見既話，歡迎大家留下言，比d意見喎！


比d tips大家.......係同呢個mv無關既，反而係之前同戴小姐唱k，我唱到佢差d攞鞋掟我就係呢首歌~~

悔。恨

悔。恨

最近好多野都係關於戴小姐，唔知點解，可能近黎多野傾，熟左就自然多話題，多話題，自然好多題材可以用黎寫blog！最近佢有個問題問我：「有無後悔無係屯門讀中學呢？」事源係新聞話有屯門中學生玩4p，佢話屯門咁多野玩，係咪好後悔呢？

其實，我小學畢業，我要搬出去九龍，實在非我意願，我當時都無選擇，我都無得後悔啦~~而當戴小姐第一次係msn度問我個時，我確實係有d難過既！呢d就係典型既講者無心，聽者有意啦！直至個晚食飯，我連椅都未坐，戴小姐就問我同一個問題個時，我個心係沈左一沈，可能佢唔發覺，但我真係好似比人兜心口揼左一槌咁，有d痛~~

我後悔唔係因為無得玩4p，而係小學之後，我覺得自己既日子過得唔好，中學個五年既學校生活好似白過咁！到左我讀預科，甚至到我畢業之後，做緊野，睇返d同學仔，我以前小學成績唔係第一個個，但起碼都係頭幾名丫，事至今日我對我既學業成績係非常不滿既！有時係度諗如果我重留係屯門讀書，我既成績有可能比我出左黎九龍會好既。但周不時冷靜返個人，有時都覺得事情如果唔係咁發生，咁依家既我又係咪真係如我咁諗，係屯門又會一帆風順呢？我又係咪可以好似依家咁幸福呢？有時都好矛盾，但我始終覺得一件事，有一個態度係啱既：「我從來無後悔過做左既事，只係會後悔無去做某d事！」人生有幾多時間丫，做d自己喜歡又唔會影響到人既野，咪ok囉，犯不著要諗咁多，令自己後悔，後悔自己錯過左一些事、一些人。

到左近黎，人成紀大左，成熟左，諗過我如果真係係屯門會出現既情況，雖然都係想像，但就係我以前無去諗過或者諗唔到既結果。我估我可以係屯門升間有名氣、有實力既中學，又可以同我心儀的女仔拍到拖，如是者過左幾年，學業忙，而我又無咁既料讀咁優秀既中學，中三就要為轉校煩惱；女朋友嘛，兩年後就散了，原因嘛？誘惑太多、不解溫柔、我不夠好、太多太多了，還是大家不歡而散，以後也做不了朋友。這個結局，誰也說不定，是好是壞，倒不能盡言！

現在，最重要的還是要應付好目前的事，珍惜好眼下的人，為未來打下好基礎，過去嘛，間中諗下就無問題既，畢竟過左就過左，刻下左既回憶，我地無辦法改變，唯有努力咁去未來舖路，為未來既回憶付出我們的全部！！

多得他。superwoman

多得他。superwoman


之前同戴小姐佢地唱k，呢兩首歌，故事聽多左，今日聽返........另一番滋味~~





唯有大家互相支持！鼓勵！面前的難關和險阻，我們一同誇過！！

小學同學再聚會—屯門新星

小學同學再聚會—屯門新星


尋晚，又再一次約埋成班同學仔一齊食飯，今次係食新星打邊爐，屯門碼頭分店！

7點半多d，張經理打電話過黎話：「喂！你係邊呀？」
重做緊野既我.......：「.......公司，就出黎嫁啦........做乜呀？」
張經理：「我啱啱行出去莊過，有一大堆人流喎，驚唔驚呀？一陣要攞定飛先返入去做野喎！」
我：「下？星期一都有人流，唔係嘛？咁你攞定位啦，9位~~~」

到8點鐘，我先係屯門公路度飛馳緊，重瞓得好甜.......收到張經理電話：「喂！call齊人呀！我依家係個喜仔下面呀！你去到邊呀？」
我：「搭緊車............」
張經理：「快d啦~~~~~~~~」
跟著打比d同學仔話佢地知坐係邊..........跟著再繼續瞓.........

去到屯門碼頭，上到商場........點解咁靜既？問左「食蕉」酒樓係邊，行入去向喜字方向行，已經係成枱熟悉既面孔啦~~~重有一個陌生些少既背面，跟著坐低......又係那種感覺返晒黎......同學既感覺真係好！跟著佢地就話比我早到些少既崔小姐對佢地話人都未認得，就話坐低啦~~之後先開始「認人手續」，由於太無難度啦，差唔多認得返晒出黎！

跟著又點下菜呀，食下野呀，吹下水咁，一大盤野食就食左好耐！到余小姐都黎埋之後，就足足九個男女齊齊整整嗱！如是者又一片風花雪月，又食到十點幾，大家都繼續係度吹下水，relax下！我覺得大家都係太攰啦.......好似好多野都差d差d咁，而且跟著個日個個都重有要返9點既後顧，除左我同阿ben之外(兩個唔係住屯門既人)，坐到十一點幾，大家都散水啦！落到輕鐵站，大家你一言我一句，講下點行返屋企咁樣，但天下總無不散之筵席嫁，大家最後都揮晒手咁散，各自返歸！我就好好彩我追到班車返黃大仙，herher聲，十二點半就返到屋企，總算也啦！就係咁結束左今次活動！

諗返轉頭，呢排好攰，而且個個放工，之後個日又要返，大家都硬係唔夠盡興咁，希望下次大家可以就到個weekend一齊出黎啦，如果可以咁樣就perfect啦！

多謝各位，要大家放左工，攰乃乃都重要出席，就係好感動，感激大家之餘，亦希望大家可以keep到呢份友情，成為永遠既朋友啦！

利物浦 vs 阿士東維拉 @ 22.3.2009

利物浦 vs 阿士東維拉 @ 22.3.2009

講到足球，莫伯細細個就好鐘意，至於莫伯既足球生涯，有機會再同大家分享，但在這裡先講返今晚呢場關乎今屆英超誰屬既比賽先。

莫伯係個曼聯fans，不過就唔係死硬派，唔係一味話曼聯點好點好，其他隊就點樣點樣，我只係知道係好波定唔好波，係曼聯打得差，都要照鬧！

前一晚曼聯再輸一場，的確係有點意外，更意外既係車路士同日輸波！令車路士變相進一步退出爭標行列！至於今晚既利物浦呢？我係呢兩個星期睇過以下兩篇文章，而我亦好同意佢地既講法，在此不詳講啦，大家睇下就知，我覺得如果今屆真係失落左聯賽冠軍的確係無話可說，因為係疚尤自取，與人無尤！

http://hk.sports.yahoo.com/090320/42/3azyn.html

http://hk.sports.yahoo.com/090315/42/3ap6x.html

利物浦今晚係咪可以有皇者本色？我同各位拭目以待！！

我係金句王？

我係金句王？

呢兩日同戴小姐傾開計，佢發現好多我講既，寫既都好「金句」......雖然我自問都唔係乜野才子，但有好野當然要同大家分享！以下係呢幾個星期黎既「精華」輯錄，請大家一同參考研究！

1. 做人做事，從來都係對人，唔對事！(我一向都係咁樣認為，而且越覺得自己客觀既人就越主觀，成日提住要客觀d去睇野既人亦都係異於常人咁主觀！)

2. 專一同去滾，好似無乜關係喎！(意思係指無必然關連！)
(同戴小姐傾開，佢話：同你一齊有度好.... 你一定唔會去滾，
我：你又知我一定唔會去滾？
跟著佢就話：以我了解.... 你都專一gee
我：專一同滾好似無乜關係喎~~
戴小姐：咁又係wor~~)

3. 從來無人欠你既，係你自己放唔低啫！(尋晚用黎鬧(/提點？)人個時用過既！)

4. 與我何干？關我蛋治！？(早在十年前，我中六那年，已經創出左呢句說話！事至今日，我上星期坐地鐵返屋企既時候，聽到坐我隔離既廿歲「後生過我」既仔同佢女朋友講返呢句說話！當然個男仔唔係話佢女友，只係講緊其他野啫！)


如大家發現我曾經講過d好經典既對白，請大家講返比我知，等我寫返低佢，再結集成書，我發唔發到達都係睇大家啦，請大家幫幫忙吧！謝謝！

我錯......嗎？我想是了！

我錯......嗎？我想是了！



我甚麼都願意做，
有甚麼委屈也不選擇反駁

怎麼做就怎麼錯
好女人不好過，壞男人有錯~~
好男人不好做，是不是這個社會的錯~~

誰都沒有錯........錯的全是我~~ <"_____"> ""


我覺得有些少似我依家既狀況......
我，無話可說，只有憑歌寄意~~
都係繼續長吁短嘆個幾個字：唉~~~~~~~~~~~~~~



後記：
本來今晚係就咁post首歌同上面一段字做blog，點知邊寫邊同女朋友嘈交！！應境到呢~~~哈哈~~無說話講！我可能成為一個好男人的一半資格也沒有吧！當我講完個電話，我對住我間房個窗抖左幾下大氣......









我鼓起我僅餘既勇氣向窗外大叫左一聲........(應該半個竹園都聽到吧！)
之後，我阿媽話我傻，我阿爸話我痴線.......

我邊寫邊聽邊諗......

呢一刻......

我真係好想喊.......

回來/不回來

回來/不回來



你回來，你不回來
儘管天塌下來
但仍然值得與你
沒錯過甚麼再分開

值得嗎？我不曉得，
但最少那份期待......是我久違了的！

爆廠之虞

爆廠之虞

尋日出左去旺角搞影印既野，要等半個鐘先有得攞，咁就貢返上以前間公司度搵人吹下水。真係有乜開心得過舊公司係旺角既中心地段，行到門口有人自自然然開門比我，比我自出自入呢？

見到Janet，行去佢個位度講左幾句，佢話我好似無走過咁~~只不過係佢地既面前少出現左之嘛，咪又係成鬼日返黎~~我未離職之前，平日我食完飯咪又係走過佢地個邊瞓晏覺，幾忙又或者無野搞就走過黎吹水。咁我諗我個時係咪廢人一個呢？大家都係見到我唔做野，我忙個時又無人見！唉！慘！講多幾句，Janet就好開心咁話睇過我影個d相同都有睇過我「十年」篇野，佢問我係咪真嫁~~真人真事？我都係咁講啦，故事黎既啫！！哈哈！！(我當時梗係唔係咁答佢啦！哈哈！Janet你唔好話比人知呀！)不過都多謝Janet，因為我平時都見我個counter係有上升既，但又唔見有人留言，我都唔知邊個睇過，而最估唔到係真係有人會睇我個blog，而Janet重bookmark埋我個blog添，真係好多謝佢既支持！跟著Janet問我驚唔驚比女朋友知，我都係個句，我唔會比佢知！因為會煩丫嘛，近黎已經比佢煩得多，再比佢煩多d我會死嫁啦！

比Janet咁講一講，我又諗起戴小姐早幾日係k度話，如果比女朋友知我係個blog度暢所欲言的話，我係「爆廠」都有份的說！所謂「三人成虎」，一個人講一次我都未驚，但多一個人講多次，我就真係有少少「淆底」！但我又無理由將自己既創作收收埋埋嫁？唔通有真話又唔講得？我真係寧死不屈嫁！無論如何，我都唔會放棄係個blog度表達自己，有d係工作上或者極度私人既唔講得之外，我乜都會係度講，因為呢度真係fans/ friends專區，唔係friends都唔係度睇我無無謂謂咁係度吹水啦！我個人好多野講，但未必個個朋友都可以交代清楚我做緊d乜，我諗緊d乜，唯有係度同大家分享，我先覺得我真係存在係度。

我已經準備緊同寫定幾篇野，如果我真係有朝一日先一步「入土為安」，唔能夠繼續update呢個blog的話，我都會交帶好有人會幫我公開呢d野，比大家知道我更多野，反正......到時大家自然會明白！希望個日唔好咁快到啦，因為我確實係.......未寫.......哈哈！！

希望唔會真係「爆廠」啦！！有d擔心添~~

小學同學的紅白大戰

小學同學的紅白大戰—第一回


戴小姐上星期生日，我無去到，於是約左星期六晚唱番個k補返數。因為太耐無唱k啦，好想好想唱，再加上其實有五個人的話，可以免戴小姐人頭費嫁，但我地無乜積極咁去搵人，所以最後都只係搵埋余小姐一齊出黎唱，余小姐重要燒完野食先過黎，認真厲害！！最估唔到既係家陣真係賤物惡鬥窮人！依家oldway荃灣分店做緊全單六折！重可以溝埋生日優惠一齊用添！你話環境唔好都好，但好多野都係平左既！(好似5號仔......抵呀！)

七點半到齊人，有房，房到有四支咪，環境都算ok啦，都叫闊落既！坐低無耐......我先為男子組打頭陣~~~其實四個人，除左阿ben係我既「穩腳」之外，其餘兩位小姐係無一齊唱過k既！我一開聲，佢地好似有d嚇親咁！戴小姐話我係咪平時生活抑壓得好厲害既人？因為我唱歌係超有感情個種，好似成首歌係為我而寫咁，我話其實我生活壓力唔係好大，只不過我一唱歌就好似上左身咁，d感情係會把把聲咁走出黎咁解啫！

跟著就開始左一大段「李克勤」演唱會，我同阿ben係度唱，兩位小姐都好克制，無乜唱，而當唱到「阿牛」既時候，我非常投入咁唱，而戴小姐同余小姐講，我係咪受左d乜野刺激？點解唱到咁激既，但過左唔夠廿秒，戴小姐再聽下d歌詞之後，佢就恍然大悟咁對我講，話想除左隻鞋「中」我啦~~~哈哈！果然係好朋友呀！而我就繼續好投入好投入咁唱！點知......我後來先發現我開始挑起左兩位小姐既唱k小宇宙，亦唔知係幾時慢慢爆發左出黎！

首先係余小姐率先發動，突然變成「楊千嬅」上身，每個音每個字都唔係楊千嬅影子，而直情係一個楊千嬅坐左係度唱！我地話打開門的話，分分鐘鐘成班人走過黎睇下係咪真係楊千嬅黎左oldway唱k呀！把聲同個腔簡直係同一個人！厲害！

跟著到戴小姐發威啦~~開左個王菲演唱會，但本來唱左一輪都諗唔到似邊個嫁？我只係知道好聽囉！佢把聲係好高，係最高個d位係度飄個種，直到唱「周慧敏」同「林隆璇」既流言！就真係呢晚既第一個高潮位啦~~~我地明明無開過個伴唱，但戴小姐就唱到周慧敏個把聲，如出一轍咁厲害！但好彩我地男子組既正宗台柱阿ben亦立即化身「林隆璇」個下先厲害，結果成首歌就好似現場睇真人演出咁，直頭如果搵部機對住個lcd mon錄起埋d聲，播返比人睇，d人會以為開著左伴唱咁囉！！跟著佢地重合唱左首「萬芳」既新不了情，嘩！我同余小姐又係度聽cd咁囉！厲害到呢~~~

阿ben之後重要玩返拿手好戲，扮返阿哥哥唱「為你鐘情」，我就聽過好多次呀，我當然知佢厲害啦！但其他兩位就真係聽到尖叫呀，因為我地三個人聽緊既時候都突然間覺得涼風陣陣呀~~好鬼邪呀！跟著又唱草蜢呀，軟硬個d，我地呢d老餅，唱黎唱去都係d十年八年前既歌，於是戴小姐講左句，個感覺就好似第一次聚返個次食飯咁，唱返呢d歌，呢d屬於我地年代既歌，好鬼死有親切感！新歌我地就識唔到幾多啦！始終都係舊歌好聽d~~就好似草蜢首「忘情森巴舞」咁，十幾年都係那個動作，十幾年黎都係咁跳，但classic就係可以咁樣歷久常新！咁多年以黎都係咁好聽！

原本十點半交場，無人黎請我地走，咪繼續唱囉，唱下唱下，唱到十二點阿經理入黎話要埋我地單啦.......每人唔使一百蚊，四個人都係三百幾！你話係咪真係抵到爛丫？都話左賤物鬥窮人嫁啦~~落到樓下，又係各散東西既時候啦~~咁我又唔係趕住走既，咪同余小姐行返去地鐵站坐巴士囉，一路行，一路傾，都係講開d工作既野，我地呢個年紀既人都好多工作野要面對，無辦法避免既.......等阿余小姐上左巴士，行返上去坐地鐵，明明話尾班車係十二點半嫁，都未夠鐘，竟然關閘喎！唯有死死地氣咁行返去坐小巴囉，經過麥記因為太餓買左個魚柳包食！上左小巴，一陣就開車，架車又快喎，都係半個鐘多d我就返到屋企，結束左呢個咁正既唱k之夜！唔知幾時又可以再唱過呢？好期待呀~~！！

因為佢地唱既version只係k先有......youtube欠逢，有機會再post出黎吧！

莫伯照相館—於婚宴之後隆重開幕

莫伯照相館—於婚宴之後隆重開幕


2月飲左兩餐，兩餐都有幫朋友影相，其中一個除左接新娘之外，跟足成日，另一個就只係去左影行禮。影完個日，已經有朋友問我幾時有相睇，我就話要睇下要做幾耐後期先得，而且都要知會一下朋友，d相可唔可以公開先？因為基本上兩個朋友都係我自己話想去影，當自己儲reference，而唔係朋友要求我幫手，所以我有必要向佢地負責，亦唔可以隨便公開佢地個樣！所以遲遲都未有相可以睇，就係呢個原因！

其實後期包括d乜野呢？大家都覺得係「執相」，其實只係啱左一部份，其實大部份呢d婚宴相都無乜野要執！基本上婚宴呢d野，如果真係要影的話，動輒就影過千張相，試問成千張相，你可以「執」得幾多呢？除非係要揀「精選」黎做相簿，否則執相既機會唔太多，就算真係要執都只係些少色溫同光暗範疇既野！

呢幾日都無update個blog，主要就係因為之前個朋友，因為跟足左一日，所以都想自己做番本相簿，當係reference，呢幾日放工返屋企就係度揀相。要係千幾兩千張相中揀三十至四十張相出黎做相簿，唔係一件容易既事。首先，張相要有氣氛，有內容，要無眨眼，無手震，而最重要既係要~~~~靚！！有相近似既相就要對比一番，再作取捨，單係呢個步驟，千幾張相只係選剩百多張左右，而對於現階段的我黎講，每五張選一張，我都重係嫌太多既！！而且在命中率方面尚有好多空間需要改善！之後是進入做相簿就係另一個階段—排相。相是有了，但如何建構成一輯相、一本相簿，其實還要花許多心思！相片的編排次序，相片的排位，相片互相之間的配合與否都是整本相簿的考量因素，雖然有好些相片覺得是獨當一面的，但與其他相片不配合就唯有忍痛放棄，因為看一本相簿是要看整體，不能只單看一張相，這是現在很多人都忽略了，但同時又係非常重要的一點！

第一本相簿快將完成排位的階段，但進一步的後製還有很長的路要走，希望有機會的話，可以將完成品與大家分享！而今次是莫伯照相館第一次與大家見面，希望日後有更多機會分享下我d劣作同學習攝影既野啦！講住咁多先，下次再同大家講！