新春廣州之行—事件篇

新春廣州之行—事件篇

今個春節假期，無乜野搞，又無錢去其他地方散心，唯有返幾日大陸，因為主要係見下同我感情幾好既堂妹，同佢表妹。雖然我堂妹個表妹同我無親屬關係，但係就由細識到大，都十幾年，耐過我女朋友，而且重同月同日生日，思想、行為都好接近，所以好鬼死熟，乜都傾得，乜都講得。咁啱我堂妹佢今年跟老公去旅行，係年初二先出發，我地多左時間一齊傾計，機會難得，所以今年就年三十返，年初二就走。

講得事件篇，咁就講下今年返去既所見所聞先。首先，不得不由坐火車講起。因為太多人，同票務窗個哥哥話買最快個班開車，d票務員唔會咁好服務態度講得你清清楚楚，糊里糊塗買左火車飛，竟然係無位坐既，咁都算啦，諗住企都係個零鐘，無乜所謂既。上到火車月台發覺，噢~~祖國原來真係進步得好厲害，原來家陣來往廣州同深圳既火車已經換上稱為「和諧號」既高速火車，中途停兩個站都只係一個鐘到就到，認真方便快捷，班次重密過巴士！！d樣又四四正正，服務員d態度同質素好左好多好多！祖國既發展真係一日千里，我地呢d「港燦」真係望塵莫及。

咁上到車，我無位坐嫁嘛，但我經歷過好多好多次坐火車既洗禮，有少少經驗，就行到車廂最後個排既坐位，坐低左，睇下有無人買左飛無上車或者係個系統根本無賣到個坐位出去啦。呢個係我咁多年黎既總結所得，完全沒有鵲巢鳩佔既意思。咁有對母女行到黎，佢講左一個No.啫，我都未等佢地出聲，我已經起身比返佢坐，坐左去另一邊個位，唔知點解，佢地重會不停咁眼望望，望著我，好好奇既樣。到左另一班，成六個人行過黎，都未到位，聽到佢話個幾個No.，其中一個我坐著左，我都未等佢地出聲，立即二話不說企起身，佢地個反應都係一樣。或者佢地覺得成件事好odd，但一向大家都有呢d事發生，而我亦都係自動自覺。我見過有人坐著人地個位，有飛既人講極都唔比返個位人既有，明明坐著，出左去廁所，返黎隔硬比人share左半個位既都有，我無全心要耍無賴，我有自動自覺，係咪我唔啱呢？我唔知點講，但都唔使成程車都不懷好意咁望著我掛~~

當停第二個站既時候，都已經有空位坐，其實第一個站個時已經有嫁啦，只不過我唔想衝過去爭啫。我係第二個站坐到落車，咁我隔離個男人啱啱瞓醒，問左我一句，呢個站係咩乜乜乜呀？咁上下既野啦~~因為佢係對我問，咁我估係問我啦，我咪答佢囉，佢聽完就無出聲，好似我同空氣講完野咁！大佬呀~~你問野個時已經係無稱呼，無乜特「請」我嫁啦，我答左你，你唔該都無聲！？我都唔係第一次幫口同d內地同胞講呢到點行、個度點走嫁啦，但次次問個時又粗聲粗氣，答完佢又轉身就走個d真係屢見不鮮，我每次咁樣一獲，我都心諗，一句「唔該」雖然唔可以使死人，但講左出口總會比人個心舒服少少丫，點解佢地可以咁涼薄既呢？我真係好唔明，所以我都好討厭呢部份既中國人！

另一件事，就係CCTV每年都大搞既春節聯歡晚會嗱！其實我都無追開既，咁啱係人地屋企食完飯無野搞，侷著要睇，咪睇下囉。其實，睇下睇下，發覺裡面既節目內容係好有深度同娛樂性嫁，唔知大家有無因為係大陸野就無睇啦，其中有幾個小品故事係好睇過「無錢」好多劇集添嫁！當中重有一個係叫人唔好酒後架駛既，尤其是發生過事既香港，值得搵下人地既好處借鏡一下既！過左兩日，我睇返報紙，有一篇講春節聯歡晚會既稿，其中一個小題話「晚會內容應顧及一下南方觀眾既口味」，內文我無詳閱，但我就覺得好好笑。一個高手無理由為左一群自以為是既小人，去降低自己既質素去迎合佢地掛，晚會既內容本身係高既，d南方既觀眾又可唔可以提升下自己既質素去欣賞呢d節目呢？好心唔好貽笑大方啦~~CCTV春晚今年其中一個特點就係所有歌手既歌，都只可以唱LIVE，唔唱LIVE既，可以唔使去嫁啦！其中一part係有陳奕迅、成龍同容祖兒，重有一個內地歌手既，而當中最唱唔到既都竟然唔係成龍，大家自己估下係邊個啦，我都費時講啦，而另一part就係兩個農村既農民，之前係參加d全國性既歌唱比賽既，同d係軍隊入面守係負責出黎唱歌、出CD個班既其中兩個一齊唱LIVE，嘩~~~~~真係比十個嘩呀！好聽到呀~~~~~去到巴伐諾堤既級數呀真係，無花無假，個D先真係唱得呀~~香港d歌手？十個有九個半都要收皮呀~~~香港人~~放開眼界，睇北少少啦~~~唔該！！

呢個都好好睇......台灣人係cctv JAM歌~~


醉酒架駛既故事......聽到六成都已經好好笑了



之前雖然多野講，但交到下戲~~~耐心睇下~~~高下立見~~~

新春聯誼活動

新春聯誼活動

原來已經成兩個星期無update個blog，認真唔好意思，對各位竟然有追我blog既小數支持者道個歉先！呢兩個星期掛住打機同造返本書既排版job，已經用左絕大部份放左工返到屋企後既時間，再加上過年，咁就兩個星期啦~~

年初三，約左幾耐下既新春小學同學團拜，最後有五個人去左戴小姐既屋企舉行。大家一見到面，我就話無人有利是派，呢個團拜既意義好似少左好多咁！上到戴小姐屋企，竟然係一齊飲左個tea，hea左一大輪，就開始打麻雀啦~~余小姐原本一馬當先，連食幾舖，之後換我落場都可以取得「開門紅」嫁！可惜就無以為繼，重節節敗退添！換返余小姐落場，點知連之前嬴左既都輸返出黎，我咁樣坐衰左佢個「靚位」，真係唔好意思！

大家一早就要食打邊爐，就算唔打都要有個煱既物體，於是打去「稻香」問下，又有得九點後打邊爐特價喎~~於是就打到八點幾，剛剛好完成四圈就一行人過返巿中心食。都唔係等左好耐，真係九點到入到席，有得食。大家吹吹水，係咁食，搞到十二點先走得！我同阿ben都要趕尾車，而且重要返上戴小姐到攞返個袋，落到樓都十二點幾，阿ben就行去三聖個邊坐小巴，我就行返兆麟個邊個巴士站睇下有無巴士出九龍，點知last個班，幾架車都走晒，唯有打返比戴小姐問下點返出去，於是行返過三聖個邊個巴士站又見返阿ben喎！原來佢個架車都無左，於是乎就一齊沿青山道邊行邊搵車出佐敦道。都行左一陣，終於有紅van，上左車，坐左好耐好耐先出到荃灣，阿ben就係葵芳轉的士，我就出到旺角轉小巴返屋企，嘩！成條荃灣地鐵線行晒咁滯，出到旺角都點半鐘啦，返到屋企就差唔到兩點，認真唔係講笑！

係小巴到，我同阿ben兩兄弟都耐無坐低傾下計，傾左幾句，我覺得我地咁多個人都去到一個樽頸位，要突破一個局，要睇下有無咁既能耐。又講到我地可以搵返咁多小學同學，突然間搵返一大班朋友，重可以keep得住，的確係一個幸運。而今次食飯，返返屯門，的確係有份歸屬感，有份特別既感情，而且今次出返屯門得我地兩條友，比起上次成班人要坐通霄小巴返入黎，咁唔方便，我地都寧願我地兩個煩d算啦！

食飯個時講開d飲酒既野，都可以話出黎蒲既野，真係令我大開眼界，有時我係好想知究竟d人係抱乜野心態既呢？有d男仔就想灌醉d女仔，攞著數，又有d女仔就人地出酒，自己出命，有人，重要係好多人，蝕底左都無仇報，其實呢d係乜野既心態呢？我好唔明，點解去玩啫，要玩到咁呢？所以逢勸d女仔，玩時玩，唔好玩得咁顛，小心自己，一有乜唔妥就call d信得過既人救自己，唔好逞強，如果唔係後悔、蝕底既都只會係自己！d男仔就唔好以為呢d野好過癮，有乜野事唔使負責任，其實如果有乜事起上黎，報左官府，追查起上黎，條數係入硬你既，到時因一事之快而身敗名裂、身陷囹圄都與人無尤嫁嗱！

最後，其實重想講一樣私人d既野，就係近黎既心情都幾差，好想乜都唔做，好想搵個地方收埋自己一輪，等自己靜下，諗下野，可惜，呢個情況應該係可見既未來都達成唔到，唯有繼續頂落去，又睇下頂到幾耐啦。其實經過尋日既一輪聯誼，心情已經好返好多，但個聯誼活動中有一個小小既遺憾既，至於係咩？我就唔係度講啦，可能有d人會估到既，如果你自命係我既fans，你可以留言估下，如果估得中既.......

......

......

我就話你知啦~~~哈哈~~~真係有人估得中先講啦~~~唔容易嫁哈哈~~

下一篇blog會講返新年個時返大陸既野，大家密切留意啦~~

懶惰的理由

懶惰的理由


唔知乜野原因，自從完成左個「十年大作」之後，個人好似一下子無左目標咁，有d累累地，無乜心機寫返d blog，搞到近黎個blog都好似個天氣咁，有少少冷清！

我都知寫去個自己都幾滿意既大作，都唔係一個可以比自己懶既理由黎既，但係個人就真係好想認真咁休息下，個人成日都好累咁，可能打rainbow6打得夜啦，所以成日都無乜精神，打機~~真係要適可而止，唔可以打太多啦~~

老闆去左成個星期北京，聽日就返，呢幾日都做緊d野，表面上好似我都係放假咁，但其實都係忙忙地，並唔係想像中咁輕鬆嫁！個blog同工作上都有幾多手尾野要跟，其實認真既工作就無既，但個心總想係完成左d野既。就快又新年啦，工作上既野都唔會好忙，反而自己重有d job做緊，係趕之中，又係掌握之內既時間內可以完成。

總括黎講，暫時可以hea，但唔可以太過份，因為要進步，就要時刻保持自己既態度同狀態先得啦~~

女歌手

女歌手


女歌手，我鐘意既都無乜邊幾個，但我尤其鐘意以下呢幾位，又去睇下片先~~~

Arvil Lavigne
Sk8ter Boi <--呢首係我其中一首最喜歡既歌 我對識彈結他既女仔係特別有好感，唔知點解？佢d歌好鬼有力，又rock rock地，雖然我唔太buy佢個look，但佢d歌我都幾鐘意...... YUI

我第一個鐘意既結他女歌手。日本歌，基本上我就一定聽唔明嫁啦，但永遠覺得好聽過香港個D。記得有一次係Cable D MTV台睇過呢個Music vedio既，但後來又唔記得上youtube搵返，又過左一排，竟然係有線電影台睇到YUI自己主演既「太陽之歌」，剛剛開始睇既無耐，就聽到呢首歌，當時都唔記得，直到後來聽下，睇下youtube d片先諗返起原來聽過。最欣賞既係YUI唱歌既時候有種好強既動力，個人會好精神，好打動到人，呢種或者就係一個成功歌手與生俱來既能力。YUI有一個幾大既缺點，之前睇佢既live片段唔多夠氣，最新個隻short stories album既日本版初版限定又未捨得開，所以都未知佢有無進步到，而且收到消息佢今年會休息一年，要再聽，最快都要去到2010年。希望佢會搵到個新方向啦，最好唔係因為合約之類呢d非音樂原因但又直接影響到歌手發展既事啦~~
最新近既一首：I'll Be......好鬼充滿力量既感覺呀~~~



最新最愛：G.E.M.
無意中係阿秋個blog到睇到佢既youtube片段，開頭覺得佢幾無聊，但搵返佢d唱歌片段，加上佢既年紀同學歷與成績(佢讀個間中學係我中七畢業個間既山腳嫁~~)，所以對佢產生左好大興趣。

我可以咁講，佢係有少少傻氣，而且唔覺得係扮出黎個種，呢d就係可愛。唱歌既時候好有吸引力，而且係有實力個種，真係令一眾女歌手汗顏，希望佢可以努力d、好好專心咁發展佢既歌唱事業，為香港樂壇創造另一個神話！！
雖然呢個十七歲既小妹妺好似超低能，又勁搞笑，但係佢唱歌真係勁到.....當然Phoebus既琴技都係一絕啦~~
自己睇啦~~

「十年」製作特輯之二

「十年」製作特輯之二


係一仆一碌之下，終於都交左個比賽文章，雖然係有d麻煩，但總算完成左成件事啦，總算放下左心頭大石。而星期六個日，亦多謝阿蘇同我碰杯恭喜我交左篇文，但其實最重要個內容唔好比我女朋友知，先係最緊要，所以當日示意佢地唔好多講啦，係呢度講返聲唔好意思！

講返個作品，雖然暫時無人問，但叫得造製作特輯，咁點都要講返下個故事。或者有人會好奇，究竟個故事既內容係咪真既呢？我可以話比大家知，部份係真，部份未係真啦！點解咁玄既呢？我都係一句：「文人多大話」，作為一個創作人(沽且當住自己係先啦)，想像力同情感代入能力一定要有返咁上下，作品先有生命，先會有趣，如果每一個故事都係真人真事，咁故事既戲劇性反而無咁突出添！最少，我係咁樣認為。

比賽本來話11號會選十個入圍作品既，家下改到17號，所以我決定篇作品暫時都唔會放係個blog到住，打算入左圍先啦，先再決定。尋晚，睇返其他參賽者既作品，有部份都係幾好既，但我對入圍都有信心既，但講到入選最後三強，睇黎要少少運氣啦！希望大家可以支持我啦。此外，好多謝阿秋姐話我寫得幾好，叫我唔使咁謙，無論如何，我都會繼續努力，係日後寫多d好既故事、好既文章同大家分享！

「十年」製作特輯之一

「十年」製作特輯之一

退隱多年，再次鼓起勇氣

無錯！我就係參加左呢個比賽，作品其實就已經完左工，係最後檢查階段，好快就會係yahoo個邊發佈，到時我會再連結去比大家睇下我既作品。

枉稱十年，因為近十年黎，我都無好好咁寫過d有內容、有氣氛既野，雖然，阿蘇成日同我講，鼓勵我寫多d，再寫好d，因為我係有實力，但我始終認為我自己既實力係未夠班既，再加上懶，而令到我既作品數量少之又少，而談得上有質素既更加係絕無僅有。

到左近呢幾個月，尤其是我轉左新工之後，我發覺自己係改變左，最少係積極左面對自己既理想，面對自己既事業，我重拾左一份久違了的自信，係真真正正既自信，唔係齋講，唔做，至少我想參加呢個比賽，而我又真係踏踏實實咁去完成，我覺得好開心，而且我對呢次呢個作品都幾滿意，因為我係好用心去寫，亦都好罕有咁先係紙到起好個稿，先再打起佢，再final tune。呢d工序，我一向都唔重視，但就係最重要既。

講左咁多廢話，咁究竟幾時有得睇先？唔... ...呢個問題，

最遲... ...

唔... ...
應該係截止日期之前掛~~

唓！！！即係無講過野啦！！！

大家稍安無躁，稍安無躁，好快有得睇......好快......

或者......就係第二日呢！

哈哈~~~

號稱近十年黎最好既作品，終於問世嗱!!

號稱近十年黎最好既作品，終於問世嗱!!

大家係我個msn見到呢句說話，究竟有乜咁巴閉呢？先賣個關子，
比個連結大家，大家一齊估下啦......聽日再同大家分享！

http://hk.myblog.yahoo.com/sony-yui

新一年，原來真的有新氣象

新一年，原來真的有新氣象

新一年，才過了不過3天，就已經遇見了好兆頭。1月1日的網誌一出，被賈小姐立即來過當頭捧喝......這麼一喝，我立即就慚愧起來，原來我就是這麼一個不細心，不解溫柔的莽漢啊！思前想後了不到半天，其實計劃可不是如想像中那麼困難，也不是真的如想像般難以達成的目標。今天滿心歡喜地和女朋友交代好了，終於讓她放下了心，繼而與我一樣展出了久違了的歡顏。

食完午飯後結賬，出示了會員優惠卡，同時也參加結賬抽獎，竟然給我們抽到了一客三文魚刺身啊~~我在那兒光顧了超過兩年，兩年來也從不中到任何獎，但這個新年頭，頭一次就中了，我和女朋友都覺得今年真是超好運的開始啊......

生活的心態改變命運，這年我一開始便抱著正面的態度去面對，這幾天就已經過得不錯了，我相信只要我堅持努力和保持正確的生活態度的話，這年，我必定能過得更豐盛，希望這個好開始可以延續下去吧！

在此，再次要多謝賈小姐的留言，請不要介意你留言的長短，只要你直接地表達、指正我就是了。正如我所說，你們的留言對我可是很寶貴的意見，希望大家可以更熱烈地留言，讓我可以不斷改進自己，演變一個更好的我。

Not A Good Start?

Not A Good Start?


2008年尾，個人難得咁充滿希望咁準備過除夕，點知黎到2009年一開始就悶悶不樂！事緣2008年除夕，本來係想搞活動既，但因為種種不同既原因，乜都搞唔成，唯有帶點無奈咁返屋企食飯。係屋企過，無得出去wet，係有少少郁悶既！點知同女朋友傾傾下電話又鬧起交上黎，唉！本來充滿期待既2009年開始，了無心情，無乜希望，亦無乜興奮，倒數個時都只係選擇係沖涼房沫著身咁過，總括黎講，2009年可以話開得唔太順利！

識我既人都知我個人都唔係咁容易同人嘈既人，搞到我可以起火既，睇怕都唔會係小事！女朋友近黎都對身邊朋友既「喜訊」特別敏感，好多時都有意無意咁比左唔少結婚既壓力比我！唔講大家唔知，呢個問題我地一講起，往往都會嘈起上黎，內容黎黎去去都係個d啦，在此不詳細講！我個人本身唔鐘意下巴輕輕亂咁應承人地d乜野：幾百萬既樓呀，點樣點樣既生活等等，我係預見唔到既我都唔會應承，所以往往就會比人覺得我無責任感，唔敢承諾！但亦好實咁講，承諾係把口度係無用既，唯獨在行動上作承諾先至係實實在在既，我希望我既行動可以比到別人信心，而唔係靠把口！亦希望別人用心去感受，因為「耳聽三分準，眼見未為真」。衷心希望今年我可以用自己既行動話比每一個人知，證明比每一個人睇，我 — 係得既！

Not A Good Start? Looking forward for the BEST ENDING!!